E Reino Ta Ser Dividí

BO SA pakiko e hòmber ta kibra su mantel na pida-pida? Yehova a bis’é hasié. E hòmber aki ta Ahias, profeta di Dios. Bo sa kiko ta un profeta? E ta un hende ku Dios ta bisa for di antemano kiko ta bai sosodé.

Ahias ta papiando ku Jeroboam. Jeroboam ta un hòmber ku Salomon a enkargá ku algun trabou di konstrukshon. Ora Ahias a topa ku Jeroboam riba kaminda, Ahias a hasi un kos straño. El a kita e mantel nobo ku e tabatin bistí i a kibr’é na 12 pida. El a bisa Jeroboam: ‘Tuma 10 pida pa bo mes.’ Bo sa pakiko Ahias a duna Jeroboam 10 pida?

Ahias a splika ku Yehova lo kita e reino for di Salomon. El a bisa ku Yehova ta bai duna 10 tribu na Jeroboam. Esei kier men ku dos tribu so lo keda pa Roboam yu hòmber di Salomon goberná.

Ora ku Salomon a tende loke Ahias a bisa Jeroboam, el a bira mashá rabiá. El a purba mata Jeroboam. Pero Jeroboam a hui bai Egipto. Despues di poko tempu Salomon a muri. E tabata rei pa 40 aña, pero awor su yu hòmber Roboam a bira rei. Ayá den Egipto, Jeroboam a tende ku Salomon a muri, i p’esei el a bolbe na Israel.

Roboam no tabata un bon rei. El a trata e pueblo asta mas kruel ku su tata Salomon. Jeroboam i algun otro hòmber importante a bai serka Rei Roboam i a pidié pa trata e pueblo mihó. Pero Roboam no a skucha. De echo, el a bira asta mas kruel ku promé. P’esei e pueblo a hasi Jeroboam rei riba 10 tribu, pero dos tribu, esnan di Benjamin i Huda, a keda ku Roboam komo nan rei.

Jeroboam no tabata ke pa su pueblo bai Yerusalèm pa adorá den e tèmpel di Yehova. P’esei el a traha dos bisé di oro i a pone e pueblo di e reino di 10 tribu adorá nan. Pronto e tera a yena ku krímen i violensia.

Den e reino di dos tribu tambe tabatin difikultat. Ménos ku sinku aña despues ku Roboam a bira rei, e rei di Egipto a bini pa bringa kontra Yerusalèm. El a kohe hopi tesoro for di e tèmpel di Yehova bai kuné. Pues, ta pa un tempu masha kòrtiku e tèmpel a keda manera Salomon a trah’é.