Un Reino Partí den Dos

Tanten ku Sálomon tabata adorá Yehova, tabatin pas na Israel. Pero, Sálomon a kasa ku hopi hende muhé estranhero i e kasánan akí tabata adorá imágen. Tiki-tiki, Sálomon a kambia, i e tambe a kuminsá adorá dios falsu. Yehova tabata masha rabiá. El a bisa Sálomon: ‘Lo mi kita Israel for di bo famia i partié den dos. I lo mi duna e parti mas grandi na un di bo sirbidónan, i bo famia lo goberná riba un parti chikitu so.’

Despues, Yehova a hasi otro kos pa nan por a komprondé mas mihó loke el a bisa nan. Un di e sirbidónan di Sálomon, ku yama Yeróboam, tabata biahando ora el a topa Profeta Ahías. Ahías a sker su paña den 12 pida, i el a bisa Yeróboam: ‘Lo mi ranka e reino kita for di Sálomon i partié den dos. Tuma dies pida pa bo, pasobra lo bo bira rei riba dies tribu.’ Ora Rei Sálomon a tende esei, e kier a mata Yeróboam! Pues, Yeróboam a hui bai Egipto. Ku tempu, Sálomon a muri i su yu hòmber Rehóboam a bira rei. Ora Yeróboam a mira ku no tabatin peliger mas, el a bini Israel bèk.

E ansianonan di Israel a bisa Rehóboam: ‘Si bo trata e pueblo bon, nan lo sirbi bo pa semper.’ Pero, e amigunan mas yòn di Rehóboam a bis’é: ‘Bo mester ta duru ku e pueblo! Laga nan traha mas duru!’ Rehóboam a hasi loke su amigunan yòn a bis’é. El a trata e pueblo masha malu, i nan a bai kontra dje. Nan a hasi Yeróboam rei di e dies tribunan. E reino di e dies tribunan ei tabata konosí komo e reino di Israel. E otro dos tribunan a bira konosí komo e reino di Huda, i nan a keda leal na Rehóboam. Asina, e 12 tribunan di Israel a parti den dos.

Herúsalèm tabata keda den e reino di Rehóboam. Yeróboam no tabata ke pa su pueblo bai adorá na Herúsalèm. Dikon nò? Pasobra Yeróboam tabatin miedu ku e pueblo lo a bira lomba p’e i bolbe serka Rehóboam. P’esei, el a traha dos bisé di oro i el a bisa su pueblo: ‘Herúsalèm ta keda muchu leu. Mihó boso keda adorá Dios aki.’ E pueblo a kuminsá adorá e bisénan di oro, i nan a bolbe lubidá Yehova.