E Hóben Hesus den Tèmpel

MIRA e hóben papia ku e ansianonan ei. Nan ta maestro den e tèmpel di Dios na Yerusalèm. I e hóben ta Hesus. El a krese basta kaba. Awor e tin 12 aña di edat.

Ta un sorpresa pa e maestronan ku Hesus sa asina tantu kos di Dios i di kosnan skirbí den Beibel. Pero pakiko Hosé ku Maria tambe no t’ei? Unda nan ta? Ban mira.

Tur aña Hosé tabata hiba su famia Yerusalèm pa e selebrashon spesial yamá Pasku Hudiu. E kaminda di Názarèt pa Yerusalèm ta largu. No tabatin outo ni no tabatin bùs. E kosnan ei no a eksistí e tempu ei. Kasi tur hende tabata kana na pia, i a dura rònt di tres dia pa nan yega Yerusalèm.

E tempu ei e famia di Hosé tabata grandi. Nan tabatin yu mas yòn ku Hesus pa kuida. Wèl, e aña ei ya Hosé ku Maria huntu ku nan yunan a kuminsá kana e kaminda largu pa bai bèk nan kas na Názarèt. Nan a pensa ku Hesus tabata kana ku otro hende. Pero ora nan a para na fin di dia, nan no por a haña Hesus. Nan a busk’é serka pariente- i amigunan, pero e no tabata ku nan! P’esei nan a bolbe na Yerusalèm pa busk’é ei.

Porfin nan a haña Hesus serka e maestronan. E tabata skucha nan i hasi pregunta. I tur hende a keda asombrá di e sabiduria di Hesus. Pero Maria a puntra: ‘Mi yu, pakiko bo a hasi e kos aki ku nos? Ami ku bo tata a keda masha preokupá buskando bo.’

Hesus a kontestá: ‘Pakiko boso ta buska mi? Boso no sa ku mi mester ta den kas di mi Tata?’

Sí, Hesus tabata gusta ta kaminda e por a siña tokante Dios. Nos tambe no tin ku sinti asina? Na su pueblo Názarèt, Hesus tabata bai reunion pa adorashon tur siman. Dor ku semper el a presta atenshon, el a siña hopi kos for di Beibel. Laga nos ta meskos ku Hesus, i sigui su ehèmpel.