Capítulo 10

Biahe pa Jerusalem

PRIMAVERA a yega. I tabata tempo pe famía di José, hunto cu amigo i pariente, haci nan biahe anual di tempo di primavera pa Jersualem pa celebra pascu hudío. Ora nan a sali pa haci e biahe di 105 km, tabatin excitacion manera costumber. Awor Jesús tabatin 12 aña di edad, i a anticipa e fiesta cu un interés special.

Pa Jesús i su famía, pascu hudío no tabata un asunto di un dia. Nan a keda també pe sigiente fiesta di siete dia di pan sin zuurdeeg, locual nan a considera como parti dje tempo di pascu. Como resultado, e biahe henter for di nan cas den Nazaret, incluyendo nan estadía den Jerusalem, a ocupa rond di dos siman. Pero e aña ei, debí na algo cu a enbolbe Jesús, nan a tarda mas.

E problema a sali na cla ora nan tabata bolbe for di Jerusalem. José i María a sopone cu Jesús tabata den e grupo di pariente of di amigo cu a biahá hunto. Pero e no a presenta ora nan a para pa pasa anochi, i p’sei nan a bai busqué den nan compañénan di biahe. Nan no por a hayé na ningun parti. P’sei José i María a bolbe tur e distancia te na Jerusalem pa busqué.

Nan a busqué un dia henter pero sin hayé. E segundo dia nan no a hayé tampoco. Finalmente dia tres nan a bai ne tempel. Ei mes, den un sala dje tempel, nan a mira Jesús sintá hunto cu maestro hudío, scuchando nan i haciendo pregunta.

María a puntré, “Mucha, pakico bo ta trátanos asina? Atá bo tata i mi cu afliccion mental tabata buscábo.”

Jesús a keda sorprendí cu nan no tabata sa na unda pa hayé. El a púntranan: “Pakico boso tabatin cu buscámi? Boso no sa cu mi mester ta den e cas di mi Tata?”

Jesús no por a comprende pakico su mayornan no tabata sa esei. Anto, Jesús a bolbe cas cu su mayornan i a keda sumiso na nan. El a sigi progresa den sabiduría i den crecimento físico i den e fabor di Dios i di hende. Sí, desde su hubentud padilanti, Jesús a pone un bon ehempel no solamente den buscamento di interés spiritual sino també den mustramento di respet pa su mayornan. Lucas 2:40-52; 22:7.

▪ Cua biahe di primavera Jesús a haci regularmente cu su famía, i pa cuanto kilometer?

▪ Kico a sosode durante e biahe ora Jesús tabatin 12 aña di edad?

▪ Ki ehempel Jesús a pone pa hovenan djawe?