Juan A Batisá Hesus

MIRA e palomba baha riba kabes di e hòmber. E hòmber ta Hesus. Awor e tin rònt di 30 aña di edat. I e hòmber huntu kuné ta Juan. Nos sa algu di dje kaba. Bo ta kòrda ku ora Maria a bai bishitá su prima Elisabèt, e beibi den su barika a salta di goso? E beibi ei ku no a nase ainda tabata Juan. Pero kiko Juan i Hesus ta hasiendo einan?

Juan a kaba di hinka Hesus bou di awa den Riu Hordan. Asina ta batisá hende. Un hende ta hink’é bou di awa anto despues sak’é. Dor ku Juan tabata batisá hende, nan a yam’é Juan Boutista. Pero pakiko Juan a batisá Hesus?

Wèl, Juan a hasié pasobra Hesus a bini i a pidi Juan batis’é. Juan tabata batisá hende ku kier a mustra ku nan a sinti duele ku nan a hasi kosnan malu. Pero Hesus a hasi kosnan malu pa kual e mester a sinti duele? Nunka, pasobra e tabata e Yu di Dios mes for di shelu. P’esei, el a pidi Juan batis’é pa un otro motibu. Laga nos mira ki motibu e tabatin.

Promé ku Hesus a akudí na Juan, e tabata un karpinté. Karpinté ta un hende ku ta traha kos di palu, tal komo mesa, stul i banki. Hosé, kasá di Maria, tabata un karpinté, i el a siña Hesus tambe e trabou di karpinté. Pero Yehova no a manda su Yu na mundu pa ta un karpinté. E tabatin un trabou spesial pa Hesus hasi, i e tempu a yega pa Hesus kuminsá hasié. Pues, pa e mustra awor ku el a bini pa hasi e boluntat di su Tata, Hesus a pidi Juan batis’é. Dios a gusta esei?

Sí, pasobra despues ku Hesus a sali for di awa, un bos di shelu a bisa: ‘Esaki ta mi Yu, esun ku mi ta aprobá.’ Tambe, a parse ku shelu a habri i un palomba a baha riba Hesus. Pero esei no tabata un palomba di bèrdat. E tabatin forma di palomba so. En realidat esei tabata e spiritu santu di Dios.

Awor Hesus tabatin ku pensa riba hopi kos, i p’esei el a bai na un lugá solitario pa 40 dia. Satanas a bini serka dje ei. Satanas a purba tres bes pa hasi Hesus violá e leinan di Dios. Pero Hesus no a hasié.

Despues di esei, Hesus a bolbe i a kontra ku algun hòmber ku a bira su promé siguidónan, òf disipel. Algun di nan tabata yama Andres, Pedro (yamá Simon tambe), Felipe i Natanael (yamá Bartolomeo tambe). Hesus i su disipelnan nobo a bai na e distrito di Galilea. Na Galilea nan a keda na Kana, e pueblo di Natanael. Hesus a bai un fiesta di kasamentu ei i a hasi su promé milager. Bo sa kiko esei tabata? El a hasi awa bira biña.