Capítulo 12

E bautismo di Jesús

ROND di seis luna despues cu Juan a cuminza predica, Jesús, cu awor a haci 30 aña di edad, a bai cerca Juan na rio Jordan. Pa ki motibo? Pa haci un bishita social? Jesús tabata simplemente interesá den e manera cu e trabao di Juan a progresa? No, Jesús a pidi Juan bautizé.

Juan a keda contra un bez. El a puntra: “Bo ta esun cu mester bautiza ami, i bo ta bini cerca mi?” Juan tabata sa cu su primo Jesús tabata un Yiu special di Dios. P’sei, Juan a bula cu alegría den barica di su mama ora María, den estado cu Jesús, a bishitánan! Elisabet, mama di Juan, sin duda a bisa Juan tocante esei despues. I Elisabet també por a bisé tocante anuncio di angel dje nacimento di Jesús i tocante presentacion di angel dilanti wardador di carné e anochi cu Jesús a nace.

Pues, Jesús no tabata un hende straño pa Juan. I Juan tabata sa cu e bautismo cu el a haci no tabata pa Jesús. Su bautismo tabata pa hende cu a arrepentínan di nan picá, pero Jesús no tabatin picá. Toch, apesar di keho di Juan, Jesús a insisti: “Lagué ser asina e biaha aki, pasobra dje manera ei ta apropiado pa nos cumpli cu tur loke ta husto.”

Pakico tabata husto pa Jesús bautiza? Pasobra e bautismo di Jesús tabata un símbolo, no di arrepentimento di picá, sino di su presentacion di su mes pa haci e boluntad di su Tata. Jesús tabata un carpinté, pero awor e tempo a yega pe cuminza e ministerio cu Jehova Dios a mandé na tera pa haci. Bo ta kere cu Juan a spera pa algo sobresaliente sosode ora el a bautiza Jesús?

Wel, Juan a bisa despues: “Esun mes cu a mandámi pa bautiza den awa a bisámi, ‘Riba ken cu bo mira e spiritu bahando i kedando riba dje, esei ta esun cu ta bautiza cu spiritu santo.’” Pues, Juan tabata spera pe spiritu di Dios baha riba un hende cu el a bautiza. P’sei, kizás Juan realmente no a keda sorprendí anto, ora Jesús a subi for di awa, i el a mira “e spiritu di Dios baha riba dje manera paloma.”

Pero, mas cu esei a sosode ora Jesús a bautiza. ‘Cielo a habri’ pé. Kico esei kier men? Evidentemente esei ta nifica cu ora el a bautiza, e memoria di su bida prehumano den cielo a bolbe pé. Asina, Jesús por a corda completamente su bida como un yiu spiritual di Jehova Dios, incluyendo tur loke Dios a papia cuné den cielo durante su existencia prehumano.

Además, ne tempo di su bautismo, un boz di cielo a proclama: “Esaki ta mi Yiu, esun stimá, cu mi a aprobá.” Esei tabata boz di ken? E boz di Jesús mes? Naturalmente cu no! Esei tabata e boz di Dios. Claramente, Jesús tabata e Yiu di Dios, i no Dios mes, manera algun hende ta bisa.

Sin embargo, Jesús tabata un yiu humano di Dios, mescos cu e promé homber, Adam. Despues di a duna detaye dje bautismo di Jesús, disípel Lucas a skirbi: “Jesús mes, ora el a cuminza su trabao, tabatin mas o menos trinta aña di edad, siendo yiu, segun cu hende a opina, di José, yiu di Helí, . . . yiu di David, . . . yiu di Abraham, . . . yiu di Noé, . . . yiu di Adam, yiu di Dios.”

Mescos cu Adam tabata un ‘yiu humano di Dios,’ Jesús també tabata. Jesús tabata e homber mas importante cu hamás a biba, locual ta keda bisto ora nos ta examina e bida di Jesús. Sin embargo, na su bautismo, Jesús a drenta den un relacion nobo cu Dios, birando també e Yiu spiritual di Dios. Awor, den un sentido, Dios a yamé pa bolbe na cielo, principiando Jesús riba un camina cu a hiba na entréga di su bida humano pa semper den sacrificio pa humanidad condená. Mateo 3:13-17; Lucas 3:21-38; 1:34-36, 44; 2:10-14; Juan 1:32-34; Hebreo 10:5-9.

▪ Pakico Jesús no tabata un hende straño pa Juan?

▪ Siendo cu Jesús no a comete picá, pakico el a bautiza?

▪ Den bista di loke Juan tabata sa di Jesús, pakico e no por a keda sorprendí ora e spiritu di Dios a baha riba Jesús?