Riba Seru di Oleifi

ESEI ta Hesus riba Seru di Oleifi. E kuater hòmbernan huntu kuné ta su apòstelnan. Nan ta Andres ku Pedro, ku ta ruman di otro, i Santiago ku Juan, ku tambe ta ruman di otro. Bo por mira e tèmpel di Dios na Yerusalèm leu ayá.

A pasa dos dia desde ku Hesus a drenta Yerusalèm riba un buriku yòn. Awor ta djamars. Mas trempan den dia Hesus tabata den e tèmpel. Einan e saserdotenan a purba gara Hesus pa mat’é. Pero nan tabatin miedu di hasi esei pasobra e pueblo tabata gusta Hesus.

Hesus a yama e lidernan religioso ei ‘kolebra i yu di kolebra!’ Anto Hesus a bisa ku Dios lo kastigá nan pa e mal kosnan ku nan ta hasi. Despues di esei Hesus a subi Seru di Oleifi i e kuater apòstelnan a kuminsá hasié pregunta. Bo sa kiko nan ta puntra Hesus?

E apòstelnan ta puntr’é tokante kosnan di futuro. Nan sa ku Hesus lo pone fin na tur maldat riba tera. Pero nan ke sa na ki tempu esei lo sosodé. Na ki tempu Hesus lo bini atrobe pa reina komo Rei?

Hesus sa ku e siguidónan di dje riba tera lo no por mir’é ora e bini atrobe. Esei ta pasobra e lo ta den shelu i nan lo no por mir’é ei. P’esei Hesus a bisa su apòstelnan algun di e kosnan ku lo sosodé riba tera ora e ta reinando komo Rei den shelu. Kua ta algun di e kosnan ei?

Hesus a bisa ku lo tin guera grandi, hopi hende lo bira malu i hopi lo tin hamber, krímen lo empeorá i lo tin temblor grandi. Hesus a bisa tambe ku e bon nobo tokante e reino di Dios lo ser prediká den henter mundu. Nos ta mira ku e kosnan ei ta sosodé den nos tempu? Sí! Anto p’esei nos sa sigur ku Hesus ta reina awor den shelu. Pronto lo e pone fin na tur maldat riba tera.