Un Mucha Ku A Pega Soño

AYAYAI, mira! Kiko a sosodé ei? Algu grave a pasa e mucha drumí na suela? Mira! Un di e hòmbernan ku ta sali for di e kas ta Pablo! Bo ta mira Timoteo tambe einan? Ta for di bentana e mucha a kai?

Sí, esei ta loke a kaba di sosodé. Pablo tabata duna un diskurso na e disipelnan ei na Troas. E tabata sa ku lo e no mira nan atrobe pa hopi tempu pasobra e tabatin ku subi barku e siguiente dia. P’esei el a sigui papia te meianochi.

Wèl, e mucha hòmber aki yama Eutiko. E tabata sintá na bentana i el a pega soño. El a pèrdè balansa i a kai dor di e bentana for di e di tres piso te na suela! Pues, bo mes por komprondé pakiko e hendenan ta parse asina preokupá. Ora e hòmbernan a hisa e mucha, ta nèt manera nan a pensa. E tabata morto!

Ora Pablo a mira ku e mucha ta morto, el a drumi riba dje i bras’é. Despues el a bisa: ‘No preokupá, e ta bon!’ I di bèrdat e ta bon! Esei ta un milager! Pablo a restorá su bida! Un goso a yena e multitut.

Nan tur a bai ariba atrobe i a kome. Pablo a sigui papia te ku di dia a habri. Pero bo por tin sigur ku Eutiko no a pega soño atrobe! Anto Pablo, Timoteo i esnan biahando ku nan ta subi barku. Bo sa unda nan ta bai?

Pablo ta na final di su di tres biahe di predikashon, i e ta bayendo kas. Durante e biahe ei el a pasa tres aña den e stat di Efeso so. P’esei, e biahe ei ta mas largu ku esun di dos.

Despues di a sali for di Troas, e barku a pasa un temporada na Mileto. Siendo ku Efeso ta djis un par di kilometer for di ei, Pablo a manda yama e ansianonan di e kongregashon pa bini na Mileto p’e papia ku nan pa último bes. Despues, ora a yega e momentu pa e subi barku, nan a keda masha tristu pa mira Pablo bai!

Por fin e barku a yega Cesarea bèk. Miéntras ku Pablo tabata kedando na kas di e disipel Felipe, profeta Agabo a duna Pablo spièrtamentu ku nan lo enkarsel’é ora e yega Yerusalèm. I bèrdat, asina a sosodé. Anto despues di a keda den prizon pa dos aña na Cesarea, nan a manda Pablo Roma pa Cesar e emperador romano husg’é. Laga nos mira kiko a sosodé durante e biahe pa Roma.