Capítulo 17

Mi mester kita for di scol?

PA mas cu 25 aña John ta e oficial responsabel pa haci mucha bai scol. (Scol ta obligatorio na América.) Mucha ausente, pues, tin cu pensa duro pa inventa excuus cu John no a tende ainda. El a bisa: “E muchanan a bisámi tur cos caba, tal como ‘Mi a decidi di bira malu awe’ . . . ‘Mi abuelo na Alaska a muri.’ ” Cua excuus John a gusta mas? Esei tabata di tres mucha homber cu a bisa cu nan “no por haya e scol pasobra tabatin mucho neblina.”

Tal excuus bergonzosamente swak ta ilustra e falta di deseo di hopi mucha di bai scol, hopi bez tal como indiferencia (“Mi ta sopone cu scol ta bon”) te na enemistad mes (“Scol ta fies! Mi ta odié”). Por ehempel, Gary a lanta pa bai scol i un bez a sinti malu di stoma. El a bisa, “Ora mi a yega cerca scol, mi a soda asina hopi i a bira tanto nervioso . . . mi a keda obligá di bai cas.” Hopi hoven di igual manera ta sufri di un mala gana crónica di bai scol​—algo cu docter ta yama fobia di scol. Hopi bez esei ta principiá cu violencia na scol, of crueldad di otro mucha, i presion pa haya bon punto. Hovenan asina (bao di algun presion di nan mayornan) por bai scol, pero nan ta sufri di nervio constante i asta di ansha fisical.

Sin embargo, no ta un sorpresa cu un cantidad alarmante di hovenan ta decidi di no bai scol mes! Na América so, tur dia mas cu dos i mei miyón alumno di scol primario i segundario ta ausente! Un artículo den The New York Times a bisa cu asina hopi (rond di een derde) ta “crónicamente ausente” den scol segundario di New York “cu ta casi imposibel pa síñanan.”

Otro hoven ta dal paso asta mas drástico. Un hoven yamá Walter a bisa: “Scol tabata fastioso, demasiado estricto.” El a kita for di scol segundario. També un mucha muher yamá Antonia a kita. E tabatin dificultad cu les. El a puntra: “Con mi por a haci mi les si mi no por comprende loke mi tabata leza? Mi solamente a sinta ei i a bira cada bez mas bobo, pues, mi a kita.”

Admitidamente, problema serio ta plaga sistema di scol rond di mundo. Pero esei ta un motibo pa perde tur interés den scol i kita? Ki efecto kitamento por tene riba bo bida despues? Tin bon motibo pa keda den scol te cu bo gradua?

E balor di educacion

Miguel a bolbe bai scol segundario pe haya diploma cu e no a haya. Ora e tabata puntrá pakico, el a bisa, “Mi a realiza cu mi tabatin mester di un educacion.” Pero, exactamente kico ta “educacion”? E capacidad di repiti un cantidad impresivo di dato? Esei no ta un educacion no mas cu un montón di bloki ta un cas.

Educacion mester preparábo pa un bida adulto existoso. Allen Austill, hoofd di scol pa 18 aña, a menciona “e educacion cu ta siñábo con pa pensa, pa resolve problema, loke ta razonabel i irrazonabel, e capacidad fundamental di pensa claramente, pa sa kico ta datos i pa conoce e conexion entre e piezanan i e cos henter. Pa haci huzgamento i distincion, pa siña con pa siña.”

I con scol ta cuadra cu esei? Siglonan den pasado rey Salomón a skirbi proverbio “pa duna hende sin experencia sabiduría, pa duna hoven conocimento i e capacidad di pensa.” (Proverbio 1:​1-4) Sí, hovenan ta falta experencia. Sin embargo, scol por yudábo cria i cultiva e capacidad di pensa. Esei ta e capacidad di no simplemente repiti datos sino també con pa analizánan i engendra idea productivo for di nan. Aunque hopi hende ta critica e moda di siña di scol, scol sí ta forzábo pa usa bo mente. Ta cierto cu, resolviendo problema di meetkunde of memorizando un lista di fecha histórico no por parce di relaciona cu bo bida ne momento ei. Pero manera Barbara Mayer a skirbi den su buki na inglés E guía pa sobrebiba den scol segundario: “Tur hende no ta bai corda tur datos i pida di conocimento cu maestro ta gusta pone den proefwerk, pero e capacidad di siña con pa studia, i con pa planea, nunca lo ser lubida.”

Tres profesor di universidad cu a studia efecto di largo plazo di educacion a conclui similarmente cu “hende cu e mihor educacion sí tin un conocimento mas amplio i profundo, no simplemente di datos di buki sino dje mundo actual, i mas probablemente lo busca conocimento i keda sintoniza cu fuente di informacion. . . . Tal diferencia a ser hayá di a permanece apesar di edad i hopi aña despues di scol of di colegio.”​—The Enduring Effects of Education.

Mas importante cu tur, un educacion por equipábo pa cumpli cu bo responsabilidad cristian. Si bo a establece bon costumber den studiamento i a domina e arte di leza, ta mas fácil pa bo studia e Palabra di Dios. (Salmo 1:2) Ya cu bo a siña den scol con pa expresa bo mes, ta mas fácil pa bo siña e berdad bíblico na otro hende. Conocimento di geschiedenis, di wetenschap, di aardrijkskunde, i di wiskunde ta igualmente útil i por yudábo relacionábo cu hende di varios pasado, interés i creencia.

Scol i empleo

Scol també tin un impacto grandi riba e posibilidad di bo empleo di futuro. Di ki manera?

E sabí rey Salomón a bisa di trahador capaz: “Lo e staciona su mes dilanti rey; lo e no staciona su mes dilanti hende gewoon.” (Proverbio 22:29) Esei ta cierto ainda awe. Segun Ernest Green di Departamento di Empleo di E.U.: “Hopi cos den bida por lagábo atrás si bo no tin ofishi.”

Ta di comprende, anto, cu e posibilidad di empleo di esnan cu ta kita for di scol ta pober. Walter (mencioná anteriormente) a siña esei na moda duro. “Hopi bez mi a solicita trabao i no por a hayé pasobra mi no tabatin diploma.” El a sigi: “Tin bez cu hende ta usa palabra cu mi no ta comprende, i mi ta sintími estúpido.”

Hovenan di 16 te 24 aña di edad cu a kita for di scol segundario i ta sin trabao “ta casi dos bez e cantidad di otro hoven cu a gradua i casi tres bez e cantidad total cu no tin trabao.” (The New York Times) “Esnan cu no ta sigi haya educacion ta cera porta pa oportunidad,” segun autor F. Philip Rice den su buki na inglés E adolescente. Hoven cu a kita probablemente no a domina e capacidad básico di haci e trabao di mas senciyo.

Paul Copperman a skirbi den su buki na inglés E fraude di siña leza i skirbi: “Un investigacion reciente ta indica cu aproximadamente e capacidad di leza di siete aña di scol ta necesario pa haci trabao di koki, ocho aña di scol pa haci trabao di mecánico di auto, i nuebe of diez aña di scol pa haci trabao di tene inventario.” El a sigi: “Mi ta kere cu ta razonabel pa bisa cu e trabao di maestro, di verpleegster, di boekhouder, of di engineer ta exigi un capacidad di leza mas halto cu e nivel mínimo.”

Claramente, anto, alumno cu realmente ta aplica nan mes pa siña capacidad básico, tal como lezamento, lo tin oportunidad hopi mas mihor pa haya trabao. Pero, cua ta un otro beneficio pe resto di bo bida cu bo por saca for di asistencia na scol?

Bo ta un mihor persona

E beneficio pe resto di bo bida ta cu bo ta conoce bo fortaleza i bo debilidad. Michelle, cu recientemente a acepta un trabao den e campo di computer, a bisa: “Den scol mi a siña con pa traha bao di presion, con pa tuma examen i con pa expresa mi mes.”

Un otro hoven a bisa: ‘Scol a siñámi con pa considera fayo.’ E tabatin e tendencia di considera otro hende, i no su mes, como e causa di su mes fayo. Otro hoven ta beneficia di disiplina dje rutina di scol. Hopi hende ta critica e sistema di scol pe motibo ei, bisando cu esei ta sofoca mente hoven. Pero Salomón a conseha hovenan pa “conoce sabiduría i disiplina.” (Proverbio 1:2) Scol unda cu tin disiplina en berdad ta produci mente disipliná ma creativo.

P’sei ta razonabel pa bo saca pleno probecho for di bo aña di scol. Con bo por haci esei? Láganos cuminza cu e trabao mes cu bo ta haci den scol.

Pregunta pa consideracion Capítulo 17

◻ Pakico tanto hoven no ta gusta scol? Kico bo ta pensa dje asunto?

◻ Con scol ta yuda hovenan desaroya e capacidad di pensa?

◻ Con kitamento for di scol por afecta bo calificacion di futuro di haya trabao, i pakico?

◻ Cua otro beneficio personal por resulta di perseverancia den scol?

[Komentario na página 135]

“Mi simplemente a sinta ei birando cada bez mas bobo, pues mi a kita.”

[Komentario na página 138]

“Un investigacion reciente ta indica cu aproximadamente e capacidad di leza di siete aña di scol ta necesario pa haci trabao di koki, ocho aña di scol pa haci trabao di mecánico di auto, i nuebe of diez aña di scol pa haci trabao di tene inventario”

[Plachi na página 136]

E disiplina cu bo ta siña den scol por beneficiábo pe resto di bo bida

[Plachi na página 137]

E posibilidad di empleo ta scur pa hovenan cu no a domina e capacidad básico siñá den scol