Kiko si Mi No Gusta Bai Skol?

Loke bo por hasi

Mira skol komo algu positivo. Purba di mira mas ayá. Kisas no ta tur loke bo ta haña na skol ta importante pa bo, por lo ménos no pa awor akí. Pero ora bo siña tokante diferente tópiko, bo ta haña mas konosementu di e mundu rònt di bo. Esei lo yuda bo “bira tur kos pa tur sorto di hende,” es desir, lo bo tin e abilidat di por papia ku hende di diferente background i adaptá bo mes na nan. (1 Korintionan 9:22) Por lo ménos loke bo siña na skol ta mehorá bo kapasidat di pensa, i esei sigur lo yuda bo den futuro.

Desaroyá un aktitut positivo pa ku bo dosentenan. Si bo ta haña ku un dosente ta laf, djis focus riba e informashon i no riba e persona. Kòrda, bo dosente kisas a duna e mesun lès ei masha hopi biaha kaba na otro klasnan. Pues, por ta difísil p’e pa keda ku e mesun entusiasmo ku e tabatin tempu ku el a kuminsá duna e lès ei.

Tep: Hasi anotashon, pidi bo dosente na un manera respetuoso pa e duna mas informashon i mustra ku bo ta interesá den e tópiko. Kisas e ta pega ku bo entusiasmo.

Kere den bo mes: Skol por saka na kla talentonan ku bo mes no tabata sa ku bo tin. Pablo a bisa Timoteo den un karta: “No neglishá e don di Dios ku bo a risibí.” (2 Timoteo 1:6) Aparentemente, Timoteo a haña un don di spiritu santu, pero e mester a kultivá e “don” ei pa e no bai pèrdí. Klaru ku bo no a haña podernan spesial di Dios pa bo por siña bon na skol. Pero bo tin bo talentonan. Skol por yuda bo deskubrí nan i asta desaroyá talentonan nobo.