Capítulo 9
E hubentud di Jesús cu su famía
ORA Jesús tabata crece den Nazaret, esei tabata un pueblo basta chikito i no importante. E tabata situá den ceru di un districto yamá Galilea, no leu for di valle bonita di Jezreel.
Ora Jesús tabatin kizás rond di dos aña di edad, José i María a hibé ei ora nan a sali for di Egipto, i ta parce cu e tabata e único yiu di María. Pero no pa hopi tempo. Cu tempo, Santiago, José, Simón, i Hudas a nace, i María i José a haya yiu muher també. Cu tempo Jesús tabatin, na mínimo, seis ruman homber i muher menor cuné.
Jesús tabatin otro pariente també. Nos sa caba di su primo Juan, cu tabata mayor cuné i a biba na un distancia di hopi kilometer den Hudea. Pero bibando mas cerca den Galilea tabatin Salomé, cu ta parce di ser ruman muher di María. Salomé tabata e casá di Zebedeo, pues nan dos yiu, Santiago i Juan, tabata primo di Jesús. Nos no sa si durante su crecimento Jesús a pasa hopi tempo cerca e muchanan ei, pero despues nan a bira compañé íntimo di dje.
José tabatin cu traha mashá duro pa sostene su famía creciente. E tabata carpinté. José a cria Jesús como su mes yiu, p’sei Jesús ta ser yamá “yiu di carpinté.” José a siña Jesús ser carpinté també, i Jesús a siña bon. P’sei hende a bisa di Jesús despues, “Esei ta e carpinté.”
E bida dje famía di José tabata edificá rond dje adoracion di Jehova Dios. Conforme cu e ley di Dios, José i María a duna nan yiunan instruccion spiritual ‘ora nan a sinta den nan cas, ora nan a camna den camina, ora nan a bai drumi, i ora nan a lanta.’ Tabatin un sinagoga den Nazaret, i nos por keda sigur cu José a hiba su famía ei també cu regularidad pa nan adora ei. Pero sin duda nan a haya nan mayor gozo haciendo biahe cu regularidad ne tempel di Jehova Dios den Jerusalem. Mateo 13:55, 56; 27:56; Marco 15:40; 6:3; Deuteronomio 6:6-9.
▪ Por lo menos, cuanto ruman homber i muher menor Jesús tabatin, i con ta yámanan?
▪ Ken tabata tres primo di Jesús bon conocí?
▪ Cua ofishi seglar Jesús a practica despues, i pakico?
▪ Cua instruccion vital José a duna su famía?