KAPÍTULO 9
Hesus A Lanta Na Názarèt
HOSE KU MARIA TA HAÑA MAS YU
HESUS TA SIÑA UN OFISHI
Hesus a lanta na Názarèt, un stat masha chikitu i insignifikante ku tabata keda na Galilea, un region yen di seru. Názarèt tabata situá wèst di un lago grandi ku nan tabata yama Laman di Galilea.
Kisas, ta tempu ku Hesus tabatin dos aña di edat, Hose ku Maria a sali for di Egipto i a bai biba na Názarèt. Probablemente, Hose ku Maria no tabatin mas yu e tempu ei. Mas despues, Hesus a haña ruman. Su ruman hòmbernan tabata yama Santiago, Hose, Simon i Hudas. Hose ku Maria a haña yu muhé tambe. Pues, Hesus tabatin por lo ménos seis ruman part’i mama..
Ta klaru ku Hesus tabatin mas famia. Nos a tende kaba di Elisabèt i di Elisabèt su yu hòmber Huan, kendenan tabata biba na Hudea, den zùit, basta kilometer leu for di Názarèt. Pero ta parse ku Hesus tabatin un tanta tambe, kende aparentemente tabata ruman muhé di Maria. Su nòmber tabata Salomé, i e tabata biba djis pegá ku nan na Galilea. E tabata kasá ku Zebedeo i nan tabatin dos yu hòmber, Santiago i Huan, kendenan tabata primu di Hesus. Nos no sa si Hesus a pasa hopi tempu ku e primunan akí na chikitu, pero despues nan a bira su apòstel i su bon amigu.
Hose tabatin ku traha duru pa e por a sostené su famia. E tabata karpinté. El a lanta Hesus komo su propio yu, p’esei hende tabata yama Hesus “yu di e karpinté.” (Mateo 13:55) Hose a siña Hesus e trabou di karpinté, i Hesus tabata un bon trahadó, pasobra hende tabata yam’é “e karpinté.”—Marko 6:3.
No opstante, adorashon na Yehova tabata na promé lugá den bida di Hose i su famia. No tin duda ku Hose ku Maria tabata hasi esfuerso pa instruí nan yunan den e kaminda di Yehova, manera e Lei di Dios tabata bisa: ‘ora nan tabata na kas, tabata kana riba kaminda, ora di drumi i ora nan lanta.’ (Deuteronomio 6:6-9) I komo ku tabatin un snoa na Názarèt, nos por tin sigur ku Hose tabata hiba su famia regularmente snoa pa adorá Yehova. De echo, Beibel ta bisa ku Hesus ‘tabatin kustumber di bai snoa riba dia di sabat.’ (Lukas 4:16) Hose i su famia tabata disfrutá tambe di nan biahenan regular pa e tèmpel di Yehova na Herúsalèm.