Capítulo 53

Un gobernante sobrehumano deseabel

ORA Jesús milagrosamente a alimenta miles di hende, e pueblo a keda asombrá. Nan a bisa: “Esei siguramente ta e profeta cu tin cu bini na mundo.” Nan a conclui cu Jesús no ta solamente e profeta mayor cu Moisés, sino també e por ta un gobernante sumamente deseá. P’sei, nan a planeá pa cogé i hacié rey.

Sin embargo, Jesús tabata na haltura di loke nan a planeá. P’sei, el a move lihé pa evita pa nan obligué cu forza. El a despidi dje multitud i a manda su disípelnan barca rumbo Capernaum. Anto el a retira na montaña pa haci oracion. Jesús a pasa henter anochi ei su so.

Poco promé cu dia a habri Jesús a tira un bista for dje lugar halto ei i a mira cu un bientu fuerte tabata lanta un lamá bruto. Siendo cu tabata casi e tempo di pascu hudío, tabatin un luna cla i Jesús a mira e boto cu su disípelnan luchando pa nabega contra ola. E hombernan tabata rema cu tur nan forza.

Ora Jesús a mira esei, el a baha for di montaña i a cuminza camna riba awa den direccion dje boto. E boto a nabega pa cuater of cinco kilometer ora Jesús a yegué. Sin embargo, el a haci como si lo e sigi camna i a pasé. Ora e disípelnan a miré, nan a grita: “Ta un fantasma!”

Pa consolánan, Jesús a bisa: “Ta ami; no tene miedu.”

Pero, Pedro a bisa: “Señor, si ta abo, mandámi bini cerca bo riba e awa.”

Jesús a bisa: “Bin!”

Anto, Pedro a baha for di boto, a camna riba awa den direccion di Jesús. Pero, mirando e tempestad di bientu, Pedro a spanta i cuminzando sink, el a grita: “Señor, salbámi!”

Jesús a saca su man un bez i a cogé, bisando: “Abo di poco fe, pakico bo a entrega na duda?”

Despues cu Pedro i Jesús a subi den e boto, e bientu a cai, i e disípelnan a keda asombrá. Pero, nan mester a asombrá? Si nan a capta “e nificacion dje pan,” comprendiendo e milagro grandi cu Jesús a haci algun ora promé ora el a alimenta miles di hende cu cinco pan so i dos piscá chikito, anto nan lo no a keda tanto asombrá di cu e por a camna riba awa i calma e bientu. Pero, awor, e disípelnan a rindi homenahe na Jesús i a bisa: “Bo realmente ta e Yiu di Dios.”

Den poco tempo nan a yega na Genesaret, un sabana bonita i fructífero cerca Capernaum. Nan a hancra e boto ei. Pero ora nan a yega tera, e pueblo a reconoce Jesús i a plama den e tera tur rond buscando hende enfermo. Nan a hiba eseinan riba nan cama i ora nan solamente a mishi cu e franja dje mantel di Jesús, nan tabata hací completamente sano.

Mientras tanto, e multitud cu a mira e alimentacion milagroso dje miles di hende a descubri cu Jesús a bai. Pues, ora boto di Tiberio a yega, nan a barca rumbo Capernaum pa busca Jesús. Ora nan a hayé, nan a puntré: “Rabí, ki ora bo a yega aki?” Jesús a squalnan, manera nos lo mira pronto. Juan 6:14-25; Mateo 14:22-36; Marco 6:45-56.

▪ Despues cu Jesús a alimenta e miles di hende milagrosamente, kico e pueblo kier haci cu Jesús?

▪ Kico Jesús a mira desde e montaña unda el a retira, i kico el a haci e ora ei?

▪ Pakico e cosnan ei no mester a asombrá e disípelnan?

▪ Kico a pasa despues cu nan a yega tera?