Capítulo 52

Jesús milagrosamente a alimenta miles di hende

E 12 apóstol a caba di disfruta di un paseo notable di tur Galilea pa predica. Awor, un poco tempo despues di morto di Juan bautista, nan a bolbe cerca Jesús i a conté di nan experencia maraviyoso. Mirando cu nan tabata cansá i cu tabatin tanto hende cu a bai i bini cu nan ni sikiera tabatin tempo pa come, Jesús a bisa: ‘Láganos bai nos so na un lugar solitario unda nos por descansa.’

Bordando nan boto, probablemente cerca Capernaum, nan a bai, rumbo pa un lugar isolá, evidentemente pariba di Jordan mas ayá cu Betsaida. Pero, hopi hende a míranan bai, i otronan a tende di dje. Tur eseinan a corre dilanti na oriya, i ora e boto a yega tera, nan tabatei pa contra cu nan.

Bahando for di boto i mirando e multitud grandi, Jesús a compadecénan pasobra e hendenan tabata manera carné sin wardador. Pues, el a cura hende enfermo di nan i a cuminza síñanan hopi cos.

Tempo a pasa lihé, i disípel di Jesús a bini cerca dje i a bisa: “E lugar ta isolá, i e ora ta laat caba. Despidi di nan pa nan pasa den campo i pueblo tur rond i cumpra algo pa nan come.”

Sin embargo, Jesús contestando a bisa: “Boso dúnanan algo pa come.” Anto, siendo cu Jesús tabata sa caba loke lo e haci, el a pone Felipe na prueba i a puntré: “Unda nos por cumpra pan pa eseinan come?”

Desde e punto di bista di Felipe, e situacion tabata imposibel. Sí, tabatin rond di 5.000 homber, i probablemente hopi mas cu 10.000 hende contando hende muher i mucha també! Felipe a contesta: “Dos cien denario [un denario tabata e pago di un dia di trabao ne tempo ei] di pan no ta yega pa nan, pa cada un haya un poco.”

Kizás pa mustra cu ta imposibel pa alimenta tanto hende, Andrés a bisa: “Aki ta un mucha homber cu tin cinco pan di cebada i dos piscá chikito,” i a agrega, “Pero kico ta esei pa tanto hende?”

Siendo cu tabata tempo di primavera, net promé cu pascu hudío di aña 32 EC, tabatin hopi yerba berde. Pues, Jesús a manda su disípelnan bisa e pueblo sinta riba e yerba den grupo di 50 i di 100. El a tuma e cinco pan i e dos piscá, a mira den cielo, i a pronuncia un bendicion. Anto el a cuminza kibra e pan i parti e piscá. El a duna esei na su disípelnan, cu, en buelta, a partié cu e pueblo. Asombrosamente, tur hende a come te cu nan a keda satisfecho!

Despues Jesús a bisa su disípelnan: “Recoge pida cu a resta, di manera cu nada ta desperdí.” Ora nan a hacié, nan a yena 12 macuto cu loke a sobra di loke nan a come! Mateo 14:13-21; Marco 6:30-44; Lucas 9:10-17; Juan 6:1-13.

▪ Pakico Jesús a busca un lugar privá pa su apóstolnan?

▪ Unda Jesús a hiba su disípelnan, i pakico nan no por a haya sosiego?

▪ Ora e tempo a bira laat, kico e disípelnan a sugeri, pero con Jesús a atende ne pueblo?