Capítulo 63

Mas conseho di correccion

DURANTE CU Jesús i su apóstolnan tabata den e cas den Capernaum ainda, nan a papia riba algo además dje argumento dje apóstolnan tocante cua tabata mayor. Esei tabata un incidente cu por a sosode també durante nan bolbimento pa Capernaum, ora Jesús no tabata presente personalmente. Apóstol Juan a bisa: “Nos a mira un cierto homber usa bo nomber pa saca demoño i nos a purba di kité, pasobra e no tabata compañános.”

Ta parce cu Juan a considera e apóstolnan como un grupo exclusivo cu título di curandero. P’sei el a kere cu e homber tabata haci obra poderoso incorrectamente pasobra e no tabata miembro di nan grupo.

Sin embargo, Jesús a conseha: “No purba di kité, pasobra no tin hende cu ta haci obra poderoso riba base di mi nomber cu por zundrámi lihé; pasobra ken cu no ta contra nos ta na fabor di nos. Pasobra ken cu ta duna boso un copi awa pa bebe pa motibo cu boso ta pertenece na Cristo, berdaderamente mi ta bisa boso, di ningun manera lo e perde su recompensa.”

No tabata necesario pe homber sigi Jesús personalmente pa ser na fabor di dje. E congregacion cristian no a ser establecí ainda, pues, aunque e no tabata un parti di nan grupo, esei no kier men cu e tabata di un otro congregacion. E homber realmente tabatin fe den e nomber di Jesús i p’sei a logra saca demoño. E tabata haci algo cu a compara favorablemente cu loke Jesús a bisa a merece un recompensa. Jesús a mustra cu door cu e tabata haci esei, e no por perde su recompensa.

Pero, kico lo a pasa si e palabra i accion dje apóstolnan a haci e homber trompica? Esei por ta mashá serio! Jesús a bisa: “Ken cu ta haci trompica un dje chikitonan aki cu ta kere, ta mihor pe si un piedra di molina cu burricu ta drai ta poní rond di su nek i e realmente ser tirá den lamá.”

Jesús a bisa cu sigidor di dje mester kita for di nan bida cualkier cos tanto stimá como man, pia, of wowo cu por hácinan trompica. Mihor falta tal cos stimá i drenta den e Reino di Dios en bez di keda cuné i ser tirá den Gehena (un lugar pa kima sushi cerca Jerusalem), locual a simboliza destruccion eterno.

Jesús també a adverti: “Percura pa boso no desprecia un dje chikitonan aki; pasobra mi ta bisa boso cu nan angel den cielo semper ta mira e cara di mi Tata cu ta den cielo.” Anto el a ilustra ki precioso ta e “chikitonan” ora el a conta di un homber cu tabatin cien carné pero a perde uno. E homber a laga e 99 pa busca esun perdí, segun Jesús, i ora el a hayé el a alegra mas riba dje cu riba e 99. Anto Jesús a conclui: “Di igual manera, no ta un cos deseabel pa mi Tata cu ta den cielo pa un dje chikitonan aki perece.”

Posiblemente teniendo presente e argumento dje apóstolnan un cu otro, Jesús a urgi: “Tene salu den boso, i mantene paz entre un i otro.” Salu ta duna mas smak na cuminda sin smak. Pues, salu simbólico ta loke ta haci loke bo ta bisa mas fácil pa acepta. Teniendo salu asina ta yuda conserba paz.

Pero, debí na imperfeccion humano, tin bez cu pleitu serio ta presenta. Jesús també a duna guía pa trata cu esei. Jesús a bisa: “Si bo ruman ta comete picá, bai saca na cla su falta abo cuné so. Si e ta scuchábo, bo a gana bo ruman.” Jesús a conseha: Si e no ta scucha, “hiba hunto cu bo un of dos mas, afin cu door di boca di dos of tres testigo, tur asunto ta establecí.”

Solamente como último recurso, segun Jesús, hiba e asunto ne “congregacion,” esta, na superintendente responsabel dje congregacion cu por tuma un decision hudicial. Si e pecador no ta acepta nan decision, Jesús a conclui, “lagué ser pa bo mescos cu hende dje nacionan i manera cobrador di belasting.”

Ora nan tuma tal decision, superintendente tin cu pega estrechamente ne instruccion den e Palabra di Jehova. Asina, ora nan ta haya un persona culpable i ta merece castigo, e huicio ‘a ser mará den cielo caba.’ I ora nan ta “los riba tera,” es decir, haya hende inocente, e huicio a ser “gelós den cielo” caba. Segun Jesús, den tal deliberacion hudicial, “unda cu tin dos of tres reuní den mi nomber, ei mi tá meimei di nan.” Mateo 18:6-20; Marco 9:38-50; Lucas 9:49, 50.

▪ Den e dia di Jesús, pakico no tabata necesario pa hende compañé?

▪ Ki serio ta e asunto di haci un dje chikitonan trompica, i con Jesús a ilustra e importancia di tal chikitonan?

▪ Kico probablemente a conmove Jesús pa conseha su apóstolnan pa tene salu den nan?

▪ Ki nificacion tin di ‘mara’ i ‘los’?