Capítulo 81

Mas esfuerzo pa mata Jesús

SIENDO cu ta tempo di friu, Jesús tabata camna bao di dak den e sector yamá hadrai di Salomón. Esei tabata na un banda dje tempel. Hudío a rondoné ei i a cuminza puntra: “Pa cuanto tempo bo ta tene nos alma den suspenso? Si bo ta Cristo, bísanos francamente.”

Jesús a contesta: “Mi a bisa boso, i toch boso no ta kere.” Jesús no a bísanan directamente cu e tabata Cristo, manera el a bisa e muher samaritana ne poz. Pero, en efecto, el a revela su identidad ora el a splica pa nan cu e tabata di region djariba i a existi promé cu Abraham.

Sin embargo, Jesús tabata kier pa hende yega ne conclusion pa nan mes di cu e tabata Cristo, comparando su actividad cu loke e Bijbel a profetiza cu Cristo lo haci. P’sei el a manda su disípelnan promé pa no bisa ningun hende cu e tabata Cristo. I p’sei el a sigi bisa hudío opositor: “Obra cu mi ta haci den e nomber di mi Tata, eseinan ta duna testimonio di mi. Pero boso no ta kere.”

Pakico nan no a kere? Pa falta di evidencia di cu Jesús tabata Cristo? No, pe motibo cu Jesús a dúnanan ora el a bísanan: “Boso no ta mi carnénan. Mi carnénan ta scucha mi boz, i mi ta conocénan, i nan ta sigími. I mi ta dúnanan bida eterna, i nan nunca di ningun manera lo ser destruí, i ningun hende por ráncanan for di mi man. Loke mi Tata a dunámi ta algo mayor cu tur otro cos, i ningun hende por ráncanan for di man di mi Tata.”

Anto Jesús a menciona su relacion estrecha cu su Tata, splicando: “Ami i e Tata ta uno.” Siendo cu Jesús tabata riba tera i su Tata tabata den cielo, e claramente no a bisa cu e i su Tata ta literalmente, of físicamente, uno. Mas bien, e kier men cu nan ta uno den propósito, cu nan ta den unidad.

E palabra di Jesús a haci hudío rabia, i nan a coge piedra pa maté, mescos cu nan a haci promé, durante e fiesta di tabernáculo, of di tent. Cu curashi, Jesús a enfrenta esnan cu kier a maté, i a puntra: “Mi a demonstra hopi obra excelente dje Tata. Pa cua obra boso ta matámi?”

Nan a contesta: “Nos no ta piedrábo pa obra excelente, sino pa blasfemia, sí, pasobra abo, aunque bo ta hende, bo ta hacíbo dios.” Siendo cu Jesús nunca a bisa cu e tabata dios, pakico hudío a bisa esei?

Evidentemente pa motibo cu Jesús a bisa cu e tabatin poder cu nan a kere cu Dios so por tin. Por ehempel, el a caba di bisa dje “carnénan,”“mi ta dúnanan bida eterna,” locual ta algo cu ningun hende por haci. Pero, hudío a pasa por halto dje echo cu Jesús a admiti cu el a recibi autoridad di su Tata.

Jesús a mustra cu el a confirma cu e ta menos cu Dios, puntrando: “No ta pará skirbí den boso Ley [den Salmo 82:6], ‘Mi a bisa: “Boso ta dios”’? Si el a yama ‘dios’ esnan contra ken e palabra di Dios a bini, . . . boso ta bisámi kende e Tata a santificá i a despachá na mundo, ‘Bo ta blasfema,’ pasobra mi a bisa cu, Mi ta Yiu di Dios?”

Siendo cu e Scritura a yama asta huez humano inhusto “dios,” ki falta hudío por a haya den Jesús ora el a bisa, “Mi ta Yiu di Dios”? Jesús a agrega: “Si mi no ta haci obra di mi Tata, no kerémi. Pero si mi ta hácinan, aunque boso no ta kerémi, kere e obra, pa boso por yega di sa i por sigi sa cu e Tata ta den union cu mi i ami ta den union cu e Tata.”

Ora Jesús a bisa esei, hudío a purba di cogé. Pero el a scapa, mescos cu el a haci promé ne fiesta di tabernáculo. El a bandona Jerusalem i a bai pariba di rio Jordan unda Juan a cuminza bautiza casi cuater aña promé. Ta parce cu e sitio ei no ta leu for di oriya di zuid di Lamá di Galilea, un biahe di dos dia of mas for di Jerusalem.

Hopi hende a bini pa mira Jesús den e lugar ei i a cuminza bisa: “Juan, realmente, no a haci un solo siñal, pero tur loke Juan a bisa tocante e homber aki tabata e berdad.” Pues, hopi hende a pone fe den Jesús ei. Juan 10:22-42; 4:26; 8:23, 58; Mateo 16:20.

▪ Jesús tabata kier pa hende indentifiqué como Cristo pa medio di kico?

▪ Di ki manera Jesús i su Tata ta uno?

▪ Pakico, evidentemente, hudío a bisa cu Jesús tabata haci su mes un dios?

▪ Con e referencia di Jesús na Salmo ta mustra cu e no a bisa cu e tabata igual cu Dios?