Capítulo 85

Buscando loke ta perdí

JESÚS tabata ansioso pa busca i haya hende cu humildemente kier sirbi Dios. P’sei el a busca i a papia cu tur hende tocante e Reino, incluyendo hende conocí como pecador. Awor tal hende a hala cerca pa scucha.

Mirando esei, fariseo i scriba a critica Jesús pasobra e tabata den compañía di hende cu nan a considera como indigno. Nan a keha: “E homber ei ta recibi pecador i ta come cu nan.” Den nan dignidad nan tabata hopi mas halto cu esei! Fariseo i scriba a trata hende gewoon como tera bao di nan pia. Realmente, nan a usa un expresion hebreo ʽam ha·ʼaʹrets, “hende di tera,” pa nan mustra nan desprecio pa hende asina.

En cambio, Jesús a trata tur hende cu dignidad, bondad, i compasion. Como resultado, hopi hende humilde asina, incluyendo hende cu tabata bon conocí como practicante di malecho, tabata ansioso pa scuché. Pero, kico dje crítico di fariseo di Jesús pasobra el a haci esfuerzo pa yuda hende cu fariseo a considerá como indigno?

Jesús a contesta nan kehamento usando un comparacion. El a papia desde e punto di bista di fariseo mes, como si nan ta husto i ta sigur den e tao di Dios, mientras cu ʽam ha·ʼaʹrets despreciabel a dwal i ta den un estado di perdicion. Leza loke el a puntra:

“Kende di boso cu tin cien carné, ora e ta perde uno di nan, no ta laga e nobentinuebe atrás den mondi i ta bai busca esun perdí te cu e hayé? I ora e hayé, e ta poné riba su scouder i ta alegra. I ora e yega cas e ta yama su amigo i beciñanan hunto, bisando nan, ‘Alegra cu mi, pasobra mi a haya mi carné cu tabata perdí.’”

Anto Jesús a haci un aplicacion dje cuenta, splicando: “Mi ta bisa boso cu lo tin mas alegría den cielo riba un pecador cu ta arrepenti cu riba nobentinuebe hustonan cu no tin mester di arrepentimento.”

Fariseo a considera nan mes di ser husto i p’sei no tabatin mester di arrepentimento. Ora algun di nan a critica Jesús dos aña promé pasobra el a come cu cobrador di belasting i pecador, Jesús a bísanan: “Mi a bini pa yama, no hende husto, sino pecador.” Fariseo santo, cu no a mira nan necesidad di arrepentimento, no a causa ningun gozo den cielo. Pero pecador berdaderamente arrepentí sí.

Pa duna dobel énfasis ne punto di cu restoracion di pecador perdí ta un causa pa gran alegría, Jesús a conta un otro comparacion. El a bisa: “Cua hende muher cu tin diez moneda di dracma, si e ta perde un moneda di dracma, no ta cende lampi i ta bari su cas i ta busca cuidadosamente te cu e ta hayé? I ora e hayé, e ta yama su amiga i beciñanan hunto, bisando, ‘Alegra cu mi, pasobra mi a haya e moneda di dracma cu mi a perde.’”

Anto Jesús a duna un aplicacion similar. El a sigi bisa: “Pues, mi ta bisa boso, gozo ta surgi den angel di Dios riba un pecador cu ta arrepenti.”

Ta ki extraordinario e interés amoroso di angel di Dios pe restoracion di pecador perdí! Esei tabata specialmente cierto siendo cu na antes tal ʽam ha·ʼaʹrets humilde i despreciá eventualmente a califica como miembro dje Reino celestial di Dios. Como resultado, nan ta alcanza un puesto den cielo mas halto cu puesto di angel mes! Pero, en bez di sinti envidia of menospreciá, angel humildemente ta aprecia cu tal hende pecador a enfrenta i a vence situacion den bida cu por equipánan pa sirbi como simpático i misericordioso rey i sacerdote celestial. Lucas 15:1-10; Mateo 9:13; 1 Corintio 6:2, 3; Revelacion 20:6.

▪ Pakico Jesús a asocia cu hende conocí como pecador, i cua crítico el a recibi for di fariseo?

▪ Con fariseo a considera hende gewoon?

▪ Jesús a usa cua comparacion, i kico nos por siña for di nan?

▪ Pakico alegría di angel ta extraordinario?