Capítulo 92

Diez leproso curá durante e biahe final di Jesús pa Jerusalem

JESÚS a stroba esfuerzo dje Sanedrín di maté ora el a bandona Jerusalem i a bai ne stad di Efraín, kizás rond di 24 km nortoost di Jerusalem. El a keda ei cu su disípelnan, leu for di su enemigonan.

Sin embargo, e tempo di pascu hudío di aña 33 EC a yega cerca, i pronto Jesús tabata riba camina di nobo. El a pasa door di Samaria i te na Galilea. Esei tabata su último bishita ne tera ei promé cu su morto. Durante cu e tabata den Galilea, probablemente e i su disípelnan a compaña otronan cu tabata riba camina pa Jerusalem pe celebracion di pascu. Nan a scoge e rumbo di districto di Perea, pariba di rio Jordan.

Pronto den camina, ora Jesús a drenta den un pueblo sea den Samaria of Galilea, diez homber cu lepra e contra cuné. E maleza terribel ta destrui poco poco miembro di curpa—dede di man i pia, orea, nanishi, i lip. Como proteccion pa otronan contra infeccion, e Ley di Dios ta bisa tocante hende leproso: “E mester tapa e bigote i sclama, ‘Impuro, impuro!’ Tur e dianan cu e plaga ta cuné, lo e keda impuro. . . . E tin cu biba isolá.”

E diez homber leproso a obedece restriccion dje Ley pa hende leproso i a keda leu for di Jesús. Pero, nan a grita cu boz fuerte: “Jesús, Instructor, tene misericordia di nos!”

Mirando nan di leu, Jesús a manda: “Bai i mustra boso na sacerdote.” Jesús a bisa esei pasobra e Ley di Dios a autoriza sacerdote pa declara e curacion di hende leproso cu a recobra dje enfermedad. Asina hende leproso a recibi aprobacion pa biba atrobé cerca hende di salud.

E diez leproso tabatin confianza den e poder milagroso di Jesús. P’sei, nan a bai purá pa mira sacerdote, aunque nan no tabata curá ainda. Ora nan tabata riba camina, nan fe den Jesús tabata recompensá. Nan a cuminza mira i sinti e restoracion di nan salud!

Nuebe dje homber leproso curá a sigi nan camina, pero e otro homber leproso, un samaritano, a bolbe pa busca Jesús. Pakico? Pasobra el a keda asina agradicido pa loke a pasé. El a alaba Dios cu un boz fuerte, i ora el a haya Jesús, el a cai na su pia i a agradicié.

Contestando, Jesús a bisa: “Diez a wordu hací limpi, no ta berdad? Unda, anto, ta e otro nuebe? Ningun a wordu hayá cu a bolbe pa duna gloria na Dios sino e homber aki di un otro nacion?”

Anto el a bisa e samaritano: “Lanta i sigi bo camina; bo fe a curábo.”

Ora nos ta leza dje curacion di Jesús dje diez homber leproso, nos mester tuma na pecho e les cu su pregunta ta indica: “Unda, anto, ta e otro nuebe?” E falta di gratitud di parti dje nuebenan ta un falta serio. Nos, mescos cu e samaritano, ta demonstra nos gratitud pa loke nos ta recibi di Dios, incluyendo e promesa sigur di bida eterna den e husto mundo nobo di Dios? Juan 11:54, 55; Lucas 17:11-19; Levítico 13:16, 17, 45, 46; Revelacion 21:3, 4.

▪ Con Jesús a stroba esfuerzo di maté?

▪ Unda Jesús a bai despues, i cu cua destino?

▪ Pakico e diez homber leproso a para leu, i pakico Jesús a bísanan bai mira sacerdote?

▪ Cua les nos mester siña for di tal experencia?