Ún Leproso So A Mustra Gratitut

Despues ku Hesus a evitá ku Sanedrin lo a laga mat’é, el a bai Efraim, un stat ku tabata keda un poko nortost di Herúsalèm. El a keda einan, huntu ku su disipelnan, leu for di su enemigunan. (Huan 11:54) No tabata falta masha tempu pa selebrashon di e Pasku Hudiu di aña 33  di promé siglo. Pues, Hesus mester a bolbe kuminsá biaha. El a kue direkshon nort, pasa via Samaria, pa bai Galilea. Tabata su último bishita na e region ei promé ku el a ser matá.

Na komienso di su biahe, segun ku e tabata pasa di un pueblo pa otro, el a topa dies hòmber ku lepra. Algun tipo di e malesa akí por a pone ku gradualmente un persona ta pèrdè vários parti di su kurpa, manera orea, dede di man òf di pia. (Numbernan 12:10-12) Segun e Lei di Dios, un persona ku lepra mester a grita “impuru! impuru!” i e mester a biba apartá for di otro hende.—Levítiko 13:45, 46.

P’esei, e dies leprosonan a keda na un distansia for di Hesus. Pero nan tabata grita: “Hesus, Maestro, tene miserikòrdia di nos!” Ora Hesus a mira e hòmbernan akí, el a bisa nan: “Bai i laga e saserdotenan mira boso.” (Lukas 17:13, 14) Asina Hesus a mustra ku e tabata respetá e Lei di Dios, ku tabata bisa ku ta e saserdotenan tabatin e outoridat pa deklará ku un leproso a kura di su malesa. Despues ku e saserdote deklará e persona limpi, e por a biba atrobe entre hende bon di salú.—Levítiko 13:9-17.

E dies leprosonan tabatin konfiansa ku Hesus tabatin poder pa hasi milager. Nan a kuminsá kana pa bai serka e saserdotenan sin ku nan a kura ainda. Na kaminda, nan fe den Hesus a ser rekompensá. Sí, nan a kuminsá mira i sinti ku nan a ser kurá!

Nuebe di nan a sigui nan kaminda. Ta ún so, un samaritano, a bira bai bèk pa buska Hesus. Dikon? Pasobra e tabata masha gradisidu pa loke Hesus a hasi p’e. E “tabata glorifiká Dios na bos haltu” ya ku el a komprondé ku ta Dios tabata esun ku realmente a yud’é haña su salú bèk. (Lukas 17:15) Ora el a haña Hesus, el a tira su kurpa abou dilanti di dje i a gradisié.

Hesus a puntra e hendenan ku tabata huntu kuné: “No ta tur dies a kura? Unda e otro nuebenan a keda? No tabatin ningun ku a bini bèk pa duna gloria na Dios ku no ta e hòmber akí di otro nashon?” Anto el a bisa e samaritano: “Lanta ariba i sigui bo kaminda; bo fe a kura bo.”—Lukas 17:17-19.

E milager ei a duna mas prueba ku Hesus tabatin Yehova Dios su sosten. E leproso ku a bini bèk no solamente a ser kurá pero a haña tambe e oportunidat di sigui e kaminda pa bida. Awendia, Dios no ta usa Hesus pa hasi e tipo di milagernan akí. No opstante, si nos pone fe den Hesus, nos tambe por ta riba e kaminda pa bida eterno. Nos ta mustra ku nos ta gradisidu meskos ku e samaritano a hasi?