Capítulo 132

Na man drechi di Dios

BASHAMENTO di spiritu santo na Pentecoste tabata evidencia cu Jesús a yega di nobo den cielo. E vision duná un poco despues na disípel Steban també ta duna prueba cu el a yega na cielo. Net promé cu Steban tabata piedrá pa su fiel testificacion, el a sclama: “Mira! mi ta weita cielo habrí i e Yiu di hende pará na man drechi di Dios.”

Na man drechi di Dios, Jesús a spera e mandamento di su Tata: “Bai, dominando meimei di bo enemigonan.” Pero entretanto, te cu el a dal paso contra su enemigonan, kico Jesús a haci? El a goberna, of a reina, riba disípel ungí di dje, guiando nan den nan actividad di predica i preparando nan pa bira, via resureccion, rey asociado cuné den e Reino di su Tata.

Por ehempel, Jesús a scoge Saul (conocí mihor despues como Pablo, su nomber romano) pa hiba e delantera den e trabao di haci disípel den otro país. Saul tabata celoso pe Ley di Dios, pero guía religioso hudío a desvié. Como resultado, Saul no solamente a aproba dje matamento di Steban sino a bai na Damasco cu autorizacion di sumosacerdote Caifás pa bolbe na Jerusalem treciendo bao di arresto cualkier homber i muher cu el a haya ei cu tabata sigidor di Jesús. Sin embargo, ora Saul tabata riba camina, un luz briyante a luza rond di dje di ripiente i el a cai na suela.

Un boz di un fuente invisibel a puntra: “Saul, Saul, pakico bo ta persigími?” Saul a puntra: “Ken bo tá, Señor?”

El a haya e contesta: “Mi ta Jesus, cu bo ta persigi.”

Jesús a bisa Saul, cu e luz milagroso a ciega, pa drenta den Damasco i spera instruccion. Anto Jesús a presenta den un vision na Ananías, un disípel di dje. Jesús a bisa Ananías tocante Saul: “E homber ei ta un baso escogí pa hiba mi nomber ne nacionan i també na rey i yiu di Israel.”

En berdad, cu e apoyo di Jesús, Saul (conocí awor como Pablo) i otro evangelizador a disfruta di éxito tremendo den nan trabao di predica i siña. Realmente, rond di 25 aña despues dje presentacion di Jesús na dje riba camina pa Damasco, Pablo a skirbi cu e “bon nobo” tabata “predicá den tur creacion cu ta bao di cielo.”

Despues cu hopi mas aña a pasa, Jesús a duna un serie di vision na su apóstol stimá, Juan. Pa medio di vision cu Juan a detayá den e buki bíblico di Revelacion, en efecto, el a sigi biba pa mira Jesús bolbe cu poder di Reino. Juan a bisa cu “pa medio di inspiracion” e tabata transportá den tempo te ne “dia di Señor.” Cua “dia” esei tá?

Un estudio cuidadoso di profecía bíblico, incluyendo e profecía di Jesús mes tocante e último dianan, ta revela cu e “dia di Señor” a cuminza den e aña histórico di 1914, sí, durante e generacion actual! Pues, tabata na 1914 cu Jesús a bolbe invisiblemente, sin celebracion público i cu solamente fiel sirbidor di dje sabiendo di su bolbimento. Ne aña ei Jehova Dios a duna Jesús e mandamento di bai dominando meimei di su enemigonan!

Obedeciendo mandamento di su Tata, Jesús a haci cielo limpi di Satanás i su demoñonan, tirando nan abao ne tera. Despues di a mira esei sosode den un vision, Juan a tende un boz celestial proclama: “Awor a sosode salbacion i poder i e reino di nos Dios i autoridad di su Cristo!” Sí, na 1914 Cristo a cuminza reina como Rey!

Ki bon nobo esei tá pa adorador di Jehova Dios den cielo! Nan tabata urgí: “Alegra cielo i boso cu ta biba den dje!” Pero, con e situacion tá pa hende riba tera? E boz di cielo a sigi: “Ai di tera i di lamá, pasobra e Diabel a baha cerca boso, mashá rabiá, sabiendo cu ta kedé poco tempo mas.”

Nos ta den e poco tempo awor aki. Hende actualmente ta ser separá sea pa drenta den e mundo nobo di Dios of sufri destruccion. Realmente, bo mes destino ta ser determiná awor abase dje manera cu bo ta reacciona ne bon nobo dje Reino di Dios cu ta ser predicá mundialmente bao di direccion di Cristo.

Ora e separacion di hende ta caba, Jesucristo lo sirbi como Agente di Dios pa libra mundo di tur e sistema di Satanás i di tur hende cu ta apoyé. Jesús lo cumpli cu e kitamento di tur maldad den e gera cu e Bijbel ta yama Har–Magedón, of Armagedón. Despues, Jesús, como e Persona mas grandi di universo despues di Jehova Dios mes, lo coge Satanás i su demoñonan i máranan pa mil aña den un “abismo,” es decir, den un estado di inactividad semehante di morto. Echo 7:55-60; 8:1-3; 9:1-19; 16:6-10; Salmo 110:1, 2; Hebreo 10:12, 13; 1 Pedro 3:22; Lucas 22:28-30; Colosense 1:13, 23; Revelacion 1:1, 10; 12:7-12; 16:14-16; 20:1-3; Mateo 24:14; 25:31-33.

▪ Despues cu Jesús a subi na cielo, unda e tabata situá, i kico el a spera?

▪ Jesús a reina riba ken despues di a subi na cielo, i con su gobernacion ta ser manifestá?

▪ Na ki tempo e “dia di Señor” a cuminza, i kico a sosode na su principio?

▪ Cua trabao di separacion cu ta na progreso awendia ta afecta cada un di nos personalmente, i e separacion ta ser hací riba cua base?

▪ Ora e trabao di separacion ta termina, ki suceso lo sigi?