Parti 2
Un Tera Liber di Sufrimentu
1, 2. Cua punto di bista diferente hopi hende tin?
SIN embargo, miyones di hende mundialmente tin un punto di bista totalmente diferente. Nan ta anticipá un futuro maraviyoso pa humanidad. Nan ta bisa cu pronto, aki riba tera mes, lo tin un mundu completamente liber di maldad i sufrimentu. Nan tin confiansa cu loke ta malu pronto lo ser eliminá i un mundu completamente nobo lo ser establecé. Nan asta ta bisa cu e fundeshi dje mundu nobo aki ta ser poné awor aki mes!
2 E hendenan aki ta kere cu e mundu nobo lo ta liber di guera, crueldad, crímen, inhusticia i pobresa. Esei lo ta un mundu sin malesa, tristesa, lágrimanan i asta morto. Na e tempu ei hende lo crece te na perfeccion i biba pa semper den felicidad den un paradijs terenal. Wel, asta esnan cu a muri lo ser resucitá i haña e oportunidad di biba pa semper!
3, 4. Pakico tal personanan ta sigur encuanto nan punto di bista?
3 E punto di bista aki dje futuro ta simplemente un soño, simplemente kere den loke lo bo tin gana di dje? Nó, di ningun manera. Cu e binidero Paradijs aki ta inevitabel ta fundá riba un fe cu base sólido. (Hebreo 11:1) Pakico nan ta asina sigur? Pasobra e Creador todopoderoso dje universo a primintí esei.
4 Encuanto Dios su promesanan, e Bijbel ta bisa: “Ni un solo palabra di tur e bon palabranan cu Jehova boso Dios a papia cu boso a faya. Nan tur a ser realisá pa boso. Ni un solo palabra di nan a faya.” “Dios no ta un hende cu e mester conta mentira . . . E mes a bisa esei i lo e no haci’é i el a papia i lo e no cumpli cuné?” “Jehova di ehércitonan a hura, bisando: ‘Siguramente net manera mi a calculá, asina mester sosodé; i net manera mi a consehá, esei ta loke lo ser realisá.’”—Hosué 23:14; Número 23:19; Isaías 14:24.
5. Cua preguntanan tin cu ser contestá?
5 Sin embargo, si Dios su propósito tabata pa establecé un paradijs terenal liber di sufrimentu, pakico el a permití cosnan malu sosodé na promé lugar? Pakico el a warda seis mil aña te cu awor aki pa coregí loke ta robes? Tur e siglonan di sufrimentu ei por ta indicá cu Dios no ta realmente interesá den nos, of asta cu e no ta existí?