Programanan Educacional

Testigonan di Jehova ta conocí mundialmente pa nan obra di educacion bíblico.

DEBI n’e importancia cu nan ta atribuí na nan obra di educacion bíblico, algun hende por pensa cu nan no ta interesá den educacion seglar. Pero esei no ta e caso. Pa siña otronan, un maestro mester ricibí siñansa promé, i esaki ta rekerí e debido entrenamentu i instruccion. Pues, ademas di haci bon uso di educacion seglar, Testigonan di Jehova a beneficiá pa hopi aña di diferente programa educacional i scolnan manehá dor dje Sociedad Watch Tower. Esakinan a yuda Testigonan i otronan pa mehorá nan mes mentalmente, moralmente i spiritualmente.

Por ehempel, den hopi pais e Testigonan a enfrentá un desafio special—con pa siña hende cu tabatin poco of ningun oportunidad pa a ricibí educacion adecuado i pues no por lesa ni skirbi. Pa atendé n’e necesidad aki, e Sociedad Watch Tower a organisá programanan di alfabetisacion.

Por ehempel, na Nigeria, programanan di alfabetisacion a ser dirigí dor di Testigonan di Jehova desde 1949. Pa 1961, miles di nigeriano asina a siña lesa i informenan disponibel ta mustra cu entre 1962 i 1994, un total adicional di 25.599 adulto a siña lesa i skirbi mediante e programanan aki. Un investigacion recien a mustra cu mas cu 90 porciento di Testigonan di Jehova den Nigeria por a lesa i skirbi, compará cu ménos cu 50 porciento dje resto dje poblacion. Na México, e Sociedad Watch Tower a dirigí programanan di alfabetisacion desde 1946. Durante 1994, a siña mas cu 6.500 persona lesa i skirbi. Entre 1946 i 1994, a yuda mas cu 127.000 persona siña lesa i skirbi. Programanan di alfabetisacion tambe a ser organisá den hopi otro pais, manera Bolivia, Camerun, Hondúras i Zambia.

Tal programanan di alfabetisacion hopi bes a haña reconocimentu dje autoridadnan educacional den e paisnan unda nan a tuma lugá. Por ehempel, na México un funcionario público a skirbi: “Mi ta gradecido cu boso cooperacion, i na nomber dje gobierno di estado mi ta haci yega na boso nan mas sincero felicitacion pa boso noble obra progresivo p’e beneficio dje pueblo treciendo e lus di conocimentu p’e analfabetanan. . . . Mi ta deseá boso éxito den boso obra educacional.”

E Scol di Ministerio Teocrático

Debí cu nan ta atribuí gran importancia na nan obra di educacion bíblico, Testigonan di Jehova ta trata pa mehorá nan abilidad pa splica siñansanan bíblico na otronan. Pa percurá e clase di yudansa aki, den cada un dje mas cu 75.000 congregacion rond mundu, un reunion yamá e Scol di Ministerio Teocrático ta ser tené semanalmente. Tur esnan cu ta inscribí den e scol, sea nan ta Testigo of no, ta haña turno pa duna un presentacion breve riba un tópico preselectá dilanti un auditorio. Anto, sea cual sea nan edad, e studiantenan ta ricibí conseho for di un instructor cu e propósito di entrená nan den abilidadnan oratorio i di lesamentu público. Asta esnan mas chikitu, asina cu nan por lesa, por inscribí nan mes i ricibí e entrenamentu aki, locual ta resultá di ser útil pa nan riba otro terenonan tambe, incluyendo nan educacion seglar. Hopi educador a comentá cu alumnonan Testigo sa expresá nan mes hopi bon.

Ademas, cada congregacion di Testigonan di Jehova ta ser animá pa tin den nan Salon di Reino, of lugá di reunion, un biblioteca conteniendo publicacionnan cu ta yuda den studio bíblico, diccionarionan i otro publicacionnan di referencia. E biblioteca aki ta disponibel pa tur cu ta asistí na e reunionnan n’e Salon di Reino. Lesamentu ta ser animá calurosamente den nan congregacionnan i cada famia di igual manera ta ser animá pa tin un biblioteca di famia cu un surtido amplio di publicacionnan pa satisfacé e necesidadnan di muchanan i adultonan.

Otro Scolnan

Tambe e Sociedad Watch Tower ta manehá scolnan pa entrenamentu di misioneronan homber i muher, i tambe scolnan pa entrená hombernan cu tin responsabilidadnan ministerial den congregacionnan local. E scolnan aki ta evidencianan adicional cu Testigonan di Jehova ta atribuí gran importancia na educacion.

[Komentario na página 13]

Lesamentu ta ser animá calurosamente den nan congregacionnan, i cada famia di igual manera ta ser animá pa tin un biblioteca di famia cu un surtido amplio di publicacionnan

[Plachi na página 12]

Studiantenan den e Scol di Ministerio Teocrático ta ricibí entrenamentu oratorio i di lesamentu público