Lès 3

Ken Jesucristo Ta?

Pakico Jesus ta ser yamá Dios su Yu “primogénito”? (1)

Pakico e ta ser yamá “e Palabra”? (1)

Pakico Jesus a bini na tera como hende? (2-4)

Pakico el a haci milager? (5)

Kico Jesus lo haci den e futuro cercano? (6)

1. Jesus a biba den shelu como un persona spiritual promé cu el a bini na tera. E tabata e promé creacion di Dios, i p’esei e ta ser yamá e Yu “primogénito” di Dios. (Colosensenan 1:15; Revelacion 3:14) Jesus ta e único Yu cu Dios a crea su so. Jehova a usa Jesus prehumano como su “obrero maestro” pa crea tur otro cos den shelu i riba tera. (Proverbionan 8:22-31; Colosensenan 1:16, 17) Dios a us’é tambe como Su portabos principal. Ta p’esei Jesus ta ser yamá “e Palabra.”—Juan 1:1-3; Revelacion 19:13.

2. Dios a manda Su Yu na tera dor di transferí su bida na e matris di Maria. Pues Jesus no tabatin un tata humano. Ta p’esei e no a heredá ningun picá of imperfeccion. Dios a manda Jesus na tera pa tres motibu: (1) Pa siña nos e berdad tocante Dios (Juan 18:37), (2) pa warda integridad perfecto, percurando un modelo pa nos sigui (1 Pedro 2:21), i (3) pa sacrificá su bida pa libra nos di picá i morto. Pakico esaki tabata necesario?—Mateo 20:28.

3. Dor di desobedecé e mandamentu di Dios, e promé homber, Adam, a cometé loke Bijbel ta yama “picá.” Di manera cu Dios a sentenci’é na morto. (Génesis 3:17-19) Ya e no tabata satisfacé e rekisitonan di Dios mas, di manera cu e no tabata perfecto mas. Poco poco el a bira bieu i a muri. Adam a pasa picá over na tur su yunan. Ta p’esei nos tambe ta bira bieu, ta bira malu i ta muri. Con humanidad lo por a ser salbá?—Romanonan 3:23; 5:12.

4. Jesus tabata un humano perfecto mescos cu Adam. Sin embargo, distinto di Adam, Jesus tabata perfectamente obediente na Dios asta bou dje prueba di mas grandi. P’esei e por a sacrificá su bida humano perfecto pa paga pa Adam su picá. Esaki ta loke Bijbel ta yama e “rescate.” Dje manera aki Adam su yunan lo por a ser librá for di condenacion na morto. Tur cu pone nan fe den Jesus por ser pordoná di nan picánan i ricibí bida eterno.—1 Timoteo 2:5, 6; Juan 3:16; Romanonan 5:18, 19.

5. Ora Jesus tabata riba tera, el a cura esnan enfermo, a alimentá esnan hambrá i a calma tempestadnan. El a asta lanta e mortonan. Pakico el a haci milager? (1) El a sinti duele di hende cu tabata sufriendo i e kier a yuda nan. (2) Su milagernan a duna prueba cu e tabata e Yu di Dios. (3) Nan a mustra kico lo e haci pa humanidad obediente ora e ta goberná e tera como Rey.—Mateo 14:14; Marco 2:10-12; Juan 5:28, 29.

6. Jesus a muri i Dios a resucit’é como un criatura spiritual i el a regresá shelu. (1 Pedro 3:18) Desde e tempu ei, Dios a hacié Rey. Pronto Jesus lo kita tur maldad i sufrimentu for dje tera aki.—Salmo 37:9-11; Proverbionan 2:21, 22.

[Plachi na página 7]

Jesus su ministerio a incluí siñamentu, hacimentu di milager i asta e sacrificio di su bida pa nos