Con Jesus Por Cambia Bo Bida?

JESUCRISTO tabata un Gran Maestro cu a biba na Palestina casi 2.000 aña pasá. Nos sa masha poco tocante su infancia. Sin embargo, un echo bon establecí ta cu ora e tabatin rond di 30 aña di edad, el a cuminsá su ministerio pa “duna testimonio di e berdad.” (Juan 18:37; Lucas 3:21-23) E cuater disipelnan cu a skirbi relatonan di su bida ta concentrá riba e tres aña i mei cu a sigui.

Durante su ministerio, Jesucristo a duna su disipelnan un mandamentu cu por sirbi como un remedi contra hopi enfermedad di mundu. Kico esei tabata? Jesus a bisa: “Mi ta duna boso un mandamentu nobo, pa boso stima un e otro; mescos cu ami a stima boso, pa boso tambe stima un e otro.” (Juan 13:34) Sí, e solucion pa hopi problema di humanidad ta amor. Na un otro ocasion ora a puntra Jesus cua ta e mandamentu di mas grandi, el a contestá: “‘Bo tin cu stima Jehova bo Dios cu henter bo curason i cu henter bo alma i cu henter bo mente.’ Esaki ta e mandamentu di mas grandi i esun promé. E di dos, semehante na dje, ta esaki: ‘Bo tin cu stima bo próhimo mescos cu bo mes.’”—Mateo 22:37-40.

Jesus a mustra nos cu palabra i accion con pa stima Dios i próhimo. Laga nos considerá algun ehempel i mira kico nos por siña for di dje.

Su Siñansanan

Den un dje sermonnan mas conocí di historia, Jesucristo a bisa su siguidónan: “Ningun hende por sirbi como esclabo pa dos doño; pasobra sea lo e odia esun i stima e otro, of lo e pega na esun i despreciá e otro. Boso no por sirbi como esclabo pa Dios i pa Rikesa.” (Mateo 6:24) Jesus su siñansa pa pone Dios na promé lugá den nos bida awe ainda ta práctico, ora cu asina tantu hende ta kere cu placa ta e solucion pa tur problema? Ta cierto cu nos mester di placa pa tene cabes riba awa. (Eclesiástes 7:12) Pero, si nos laga “Rikesa” bira nos doño, “amor pa placa” lo dominá nos i controlá henter nos bida. (1 Timoteo 6:9, 10) Hopi hende cu a cai den e trampa aki, na final a perde nan famia, nan salú i asta nan bida.

Di otro banda, si nos acudí na Dios como nos Doño, esei ta duna nos bida nificacion. Como e Creador, e ta e Fuente di bida, i p’esei, e so ta digno di nos adoracion. (Salmo 36:9; Revelacion 4:11) Esnan cu siña tocante su cualidadnan i yega na stim’é ta sinti nan impulsá pa warda su mandamentunan. (Eclesiástes 12:13; 1 Juan 5:3) Dor di haci esei, nos ta beneficiá nos mes.—Isaías 48:17.

Den e Sermon Riba Ceru, tambe Jesus a siña su disipelnan con pa mustra amor pa próhimo. El a bisa: “P’esei, tur loke boso kier pa hende haci na boso, boso tambe di igual manera tin cu haci na nan.” (Mateo 7:12) E palabra “hende” cu Jesus a usa aki ta incluí asta nos enemigunan. Den e mésun sermon, el a bisa: “Sigui stima boso enemigunan i haci oracion pa esnan cu ta persiguí boso.” (Mateo 5:43, 44) Un amor asina lo no resolvé tur e problemanan cu nos ta enfrentá awe? E lider hindú Mohandas Gandhi a haña cu si. El a bisa un biaha: “Ora [nos] obra di acuerdo cu e siñansanan cu Cristo a trece den e Sermon Riba Ceru, nos lo a resolvé e problemanan . . . di henter mundu.” Si hende aplicá Jesus su siñansanan tocante amor, nan por resolvé hopi trobel di humanidad.

Su Obranan

Jesus no solamente a siña berdadnan profundo tocante con pa mustra amor, sino tambe el a practicá loke el a siña. Por ehempel, el a pone interes di otro hende riba esnan di dje mes. Un dia Jesus i su disipelnan tabata asina ocupá yudando hende, cu nan no tabatin tempu ni pa come. Jesus a mira e necesidad pa su disipelnan sosegá un poco, i el a hiba nan na un lugá solitario. Pero ora nan a yega ei, nan a haña un multitud ta warda nan. Con abo lo reaccioná si bo haña bo cu un multitud cu ta verwagt pa bo traha, miéntras cu abo ta sinti cu bo tin cu sosegá un ratu? Wel, Jesus “a sinti duele di nan” i “a cuminsá siña nan hopi cos.” (Marco 6:34) E interes aki den otro hende semper a impulsá Jesus pa yuda nan.

Jesus a haci mas pa hende cu solamente siña nan. El a duna yudansa práctico tambe. Por ehempel, na un ocasion el a alimentá mas cu 5.000 hende cu a keda scuch’é te atardi lat. Djis despues di esei, el a alimentá un otro multitud grandi—e biaha aki mas cu 4.000 hende—cu a scuch’é pa tres dia largu i cu no a sobra nada di come. N’e promé ocasion, el a usa cincu pan i dos piscá, i n’e di dos, shete pan i algun piscá chikitu. (Mateo 14:14-22; 15:32-38) Milager? Sí, e tabata un hacidó di milager.

Tambe Jesus a cura hopi enfermo. El a cura hende ciegu, coho, leproso i surdu. Imaginá bo, el a asta lanta morto! (Lucas 7:22; Juan 11:30-45) Un biaha un leproso a rogu’é: “Si bo solamente kier, bo por haci mi limpi.” Con Jesus a reaccioná? “Cu esei el a sinti duele di dje, i a saca su man i a mishi cuné, i a bis’é: ‘Mi kier. Sea limpi.’” (Marco 1:40, 41) Cu e milagernan ei, Jesus a demostrá su amor pa esnan afligí.

Abo ta haña ta difícil pa kere den e milagernan di Jesus? Algun hende ta haña cu sí. Pero corda cu Jesus a haci su milagernan den público. Asta su opositornan, kendenan a purba pulushá cuné na tur ocasion, no por a nenga cu e tabata un hacidó di milager. (Juan 9:1-34) Ademas, su milagernan tabatin un propósito. Nan a yuda hende identifik’é como Esun mandá pa Dios.—Juan 6:14.

Ora Jesus a haci milager, e no tabata busca atencion pa su mes. Mas bien, el a glorificá Dios, e Fuente di su poder. Un biaha na Capernaum, e tabata den un cas yen di hende. Un homber paralítico kier a ser curá pero e no por a drenta. Di manera cu su amigunan a pon’é riba un kot i bah’é dor di dak. Ora Jesus a mira nan fe, el a cura e paralítico. Como resultado, e hendenan a “glorificá Dios” i a bisa: “Nunca nos a mira un cos asina.” (Marco 2:1-4, 11, 12) Jesus su milagernan a trece alabansa na Jehova, su Dios, i a yuda esnan den necesidad.

Sin embargo, curacion milagroso dje enfermonan no tabata e forsa principal tras di Jesus su ministerio. Un persona cu a skirbi un relato di Jesus su bida a splica: “A skirbi esakinan pa boso kere cu Jesus ta e Cristo, e Yu di Dios, i cu, dor di kere, boso por haña bida pa medio di su nomber.” (Juan 20:31) Sí, Jesus a bini na tera pa hende creyente por haña bida.

Su Sacrificio

Kisas bo ta puntra: ‘Jesus a bini na tera? Di unda el a bini?’ Jesus mes a bisa: “Mi a baha for di shelu pa haci, no mi boluntad, sino e boluntad di esun cu a manda mi.” (Juan 6:38) Promé cu el a bira hende, el a existí como e Yu unigénito di Dios. Anto kico tabata e boluntad di Esun cu a mand’é na tera? Segun Juan, un dje escritornan di Evangelio, “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) Con esaki tabata posibel?

Bijbel ta revelá con morto a bira e suerte inevitabel pa humanidad. E promé pareha humano a ricibí bida for di Dios cu e prospecto di biba pa semper. Sin embargo, nan a scoge pa rebelá contra nan Formador. (Génesis 3:1-19) Como resultado di e accion aki, esta e promé picá humano, e desendientenan di Adam cu Eva a haña e herencia indeseá di morto. (Romanonan 5:12) Pa por duna humanidad un berdadero bida, mester eliminá picá i morto.

Ningun científico por eliminá morto dor di un tipo di ingenieria genético. Pero, e Creador di humanidad tin e medio pa hiba hende obediente na perfeccion di manera cu nan por biba pa semper. Bijbel ta yama e percuracion aki e rescate. E promé pareha humano a bende nan mes i nan desendientenan den sclabitud na picá i morto. En bes di sigui un bida como hende perfecto, obediente na Dios, nan a scoge un bida independiente di Dios, tumando nan mes decision en cuanto loke ta bon i loke ta malu. Pa cumpra bida humano perfecto bek, mester a paga un prijs cu tabata ekivalente n’e bida humano perfecto cu nos promé mayornan a perde. Como cu hende a heredá imperfeccion, nan no tabata den condicion pa percurá e prijs ei.—Salmo 49:7.

Di manera cu Jehova Dios a intervení pa yuda. El a transferí e bida perfecto di su Yu unigénito n’e matris di un bírgen, cu a duna lus na Jesus. Algun década pasá, tal bes lo bo a rechasá e idea di un nacementu bírgen. Sin embargo, awe científiconan a traha copia di cierto mamíferonan i a introducí gene di un animal den un otro. Ken anto, tin derecho di cuestioná e Creador su abilidad pa desviá for dje proceso normal di procreacion?

Cu e existencia di un bida humano perfecto, e prijs pa rescatá humanidad for di picá i morto a bira disponibel. Pero e baby cu a nace riba tera como Jesus, tabatin cu crece pa bira e “dokter” capas pa suministrá e “remedi” pa cura e enfermedadnan di humanidad. El a haci esaki dor di hiba un bida perfecto sin picá. Jesus no solamente e mira e angustia di humanidad pecaminoso, sino tambe a experenciá e limitacionnan físico di ser hende. Esaki a hacié un dokter asta mas compasivo. (Hebreonan 4:15) E curacionnan milagroso cu el a efectuá durante su bida riba tera a proba cu e tin tantu e boluntad como e poder pa cura enfermo.—Mateo 4:23.

Despues di un ministerio di tres aña i mei aki riba tera, Jesus su opositornan a mat’é. El a mustra cu un hende perfecto por ta obediente n’e Creador asta bou di e pruebanan di mas grandi. (1 Pedro 2:22) Su bida humano perfecto sacrificá a bira e prijs di rescate, capas pa rescatá humanidad for di picá i morto. Jesucristo a bisa: “Ningun hende tin amor mas grandi cu esaki, cu un hende entregá su alma na fabor di su amigunan.” (Juan 15:13) Riba e di tres dia despues di su morto, Jesus a ser resucitá na bida spiritual, i algun siman despues el a subi na shelu pa presentá e prijs di rescate na Jehova Dios. (1 Corintionan 15:3, 4; Hebreonan 9:11-14) Dor di haci esei, Jesus por a aplicá e mérito di su sacrificio di rescate na esnan cu siguié.

Abo lo ta dispuesto pa beneficiá for dje medio aki pa cura enfermedad spiritual, emocional i físico? Esei ta rekerí fe den Jesucristo. Pakico abo mes no ta bai e Dokter? Bo por haci esei dor di siña tocante Jesucristo i su papel den salba humanidad fiel. Testigonan di Jehova lo yuda bo gustosamente.

[Plachi na página 5]

Jesus tin tantu e boluntad como e poder pa cura enfermo

[Plachi na página 7]

Con Jesus su morto ta toca bo?