Loke e Buki Ta Contene

Ora un persona drenta un biblioteca pa promé biaha, e por haña cu e coleccion di buki ta lagu’e keda tur turdí. Pero cu un poco splicacion tocante e órden den cua e bukinan ta poní, pronto e ta siña con pa localisá bukinan. Asina tambe, ta mas fácil pa busca algu den Bijbel ora bo ta comprendé con su contenido ta hincá den otro.

E PALABRA “Bijbel” a ser derivá dje palabra griego bi·bliʹa, cu a nificá “rolnan di papiro” of “bukinan.”¹ En realidad, Bijbel ta un coleccion​—un biblioteca​—di 66 buki individual, di cua nan skirbimentu a extendé over di un 1.600 aña, desde 1513 P.E.C. te rond di 98 E.C.

E promé 39 bukinan, rond di tres cuart di Bijbel su contenido, ta conocí como e Scritura Hebreo, ya cu nan a ser skirbí principalmente na e idioma ei. E bukinan aki generalmente por ser dividí den tres grupo: (1) Histórico, Génesis te cu Ester, 17 buki; (2) Poético, Job te cu E Cantica di Sálomon, 5 buki; i (3) Profético, Isaías te cu Malakías, 17 buki. E Scritura Hebreo ta conta e historia dje principio dje tera i di humanidad i tambe e historia dje antiguo nacion di Israel, for di su comienso te cu siglo cincu P.E.C.

E sobrá 27 bukinan ta conocí como e Scritura Griego Cristian, pasobra nan a ser skirbí na griego, e idioma internacional dje tempu ei. Básicamente nan ta ordená segun tópico: (1) e 5 bukinan histórico​—e Evangelionan i Echonan, (2) e 21 cartanan, i (3) e Revelacion. E Scritura Griego Cristian ta enfocá riba e siñansa i actividadnan di Jesucristo i su disipelnan den e promé siglo E.C.