Con pa Organisa un Biblioteca Teocratico

SHEREZADE, un hobencita spañó sabí, tabatin cuater aña di edad ora su maestra a informá e klas cu nan ta bai kleur plachinan di “Santa Claus.” Mesora, Sherezade a pidi pa dispens’é. El a splica cu su concenshi lo no permiti’é haci esei.

Sorprendí p’e obhecion aki, e maestra a bis’é cu esei tabata manera djis kleur e plachi di un popchi i cu no tin nada malu den esei. Sherezade a contestá: “Si ta solamente un popchi e ta, lo mi preferá di pinta e popchi mi mes si yufrou no tin nada contra.”

Na un otro ocasion e maestra a manda e klas kleur e bandera nacional. Atrobe Sherezade a puntra si e por a haci algu otro. Como splicacion, el a conta e maestra e relato di Sadrac, Mesac i Abednego.​—⁠Daniel 3:​1-28.

No hopi tempu despues e maestra a bel e mama di Sherezade pa expresá su asombro. “Bo yu muhé na varios ocasion a papia cu mi tocante su concenshi,” el a bisa. “Bo por imaginá esei? Un mucha muher di su edad splicando mi pakico su concenshi ta molesti’é! Tende, mi no ta di acuerdo cu loke bo ta siñand’e, pero mi ta sigurá bo cu bo ta logrando. I mi kier pa bo sa cu mi ta kita mi pechi pa bo yu muhé.”

Con un mucha muher di cuater aña di edad por adkerí un concenshi entrená bíblicamente? Su mama, Marina, ta splica cu Sherezade tin su mes biblioteca teocrático den su kamber. E biblioteca ta incluí su copianan personal di E Toren di Vigilancia, cua el a marca, su literatura pa predicá i tur e publicacionnan di Watchtower Society cu a ser publicá desde cu el a nace. E artículo faborito den su biblioteca ta e casetnan di Mi buki di relato bíblico, cua e ta scucha tur anochi miéntras cu e ta sigui e relato den su buki. Tabata e relatonan bíblico aki cu a capacit’é p’e tuma e decisionnan mencioná ariba.

Un biblioteca bon organisá por yuda abo i bo yunan? Pakico un biblioteca di cas ta necesario?

“Un Biblioteca No Ta un Luho”

“Un biblioteca no ta un luho, sino un dje cosnan necesario di bida,” Henry Ward Beecher a declará. Sin duda casi nos tur tin un dje cosnan “necesario di bida” aki, aunke sin nos sa. Con asina? Pasobra asta si nos tin den nos posesion nada mas cu e Bijbel, nos tin loke bo por yama un biblioteca.

Bijbel ta realmente un biblioteca teocrático extraordinario. Den siglo cuater, Jerome a inventá e frase latin Bibliotheca Divina (Biblioteca Divino) pa describí e coleccion completo di bukinan inspirá cu nos ta yama e Bijbel. Jehova a proveé nos e biblioteca sagrado aki pa duna nos yudansa práctico, instruccion i guia. E ta algu cu nunca nos mester considerá como insignificante. E solo echo cu nos ta poseé e Bijbel completo ta nificá cu nos tin un biblioteca mas extenso cu mayoria sirbidor di Dios tabatin den pasado.

Ora manuscritonan caru skirbí na man tabata tur loke tabata disponibel, poco cas privá por tabatin un Bijbel completo, si nan tabatin un mes. Ora Pablo a deseá pa studia e Scritura durante su último encarcelacion na Roma, e tabatin cu pidi Timoteo trece p’e algun rol for di Asia Menor​—⁠probablemente partinan dje Scritura Hebreo. (2 Timoteo 4:13) Sin embargo, snoanan tabata contené un coleccion di rol, i tantu Jesucristo como apostel Pablo a haci uso dje bibliotecanan aki den nan trabou di predicá. (Lucas 4:​15-17; Echo 17:​1-3) Felismente, awor e Scritura ta muchu mas accesibel cu nan tabata den e promé siglo.

Gracias n’e invento di imprenta, awe casi tur sirbidor di Dios​—⁠sea cual sea nan idioma​—⁠por obtené e Bijbel completo na un costo razonabel. Tambe nos tin e oportunidad único pa complementá e “biblioteca” sagrado aki. Pa mas cu un siglo caba, e “esclabo fiel i discreto” a bin ta percurá alimento spiritual n’e tempu apropiado.​—⁠Mateo 24:​45-47.

Pero ta improbabel cu nos lo saca pleno probecho dje informacion balioso aki si nos no organisá un biblioteca teocrático personal. Con nos por haci esei? E promé paso, naturalmente, ta pa obtené e bukinan cu un biblioteca asina mester. E ta bal e esfuerso, siendo cu lo e permití nos pa tin na man e informacion exacto cu nos mester pa trata cu problema i contestá preguntanan di Bijbel.

Cua Bukinan Mi Mester?

Bo a yega di puntra bo mes con lo bo por solucioná un problema di comunicacion den bo matrimonio of con lo bo por yuda bo yunan bisa no na droga? Con lo bo por yuda un amigu cu ta sufriendo di depresion? Bo por splica claramente ki evidencia nos tin cu Dios ta existí i pakico e ta permití maldad? Kico e bestia color di scarlata di Revelacion capítulo 17 ta representá?

Esakinan i un cantidad di otro pregunta por ser contestá si bo tin un biblioteca teocrático adecuá. E Watchtower Society a publicá buki, foyeto i artículonan den revistanan cu ta cubri un campo completo di tópiconan bíblico. Ademas, e literatura aki ta trata cu asuntunan di famia, ta edificá nos fe den Dios i Bijbel, ta permití nos mehorá nos abilidad di predicá i ta yuda nos comprendé profecianan di Bijbel.

Mayoria dje publicacionnan imprimí dor dje Sociedad durante e último 20 añanan ainda ta disponibel. Si bo a drenta e berdad recientemente, lo ta bale la pena pa bo obtené tur e publicacionnan obranan aki cu ta disponibel den bo idioma. Kisas tin volúmennan di E Toren di Vigilancia den un idioma [cu bo ta comprendé]. Excelente obranan di referencia, manera Perspicacia para comprender las Escrituras i Gran Concordancia, tambe a ser publicá den vários idioma. Sin embargo, adkiriendo e bukinan ta solamente e promé paso.

Organisá Bo Biblioteca!

Sa cu bo tin e buki un caminda ta un cos, pero haña esun cu bo mester ta un otro cos. Si nos mester perde un cantidad di tempu buscando e publicacion di referencia cu nos mester, probablemente nos lo perde interes den e asuntu. N’e otro banda, si nos tin nos bukinan bon areglá, na un lugá cumbiniente, nos lo ta muchu mas incliná pa haci investigacion personal.

Si ta posibel, ta probechoso pa tin e mayor parti di bukinan teocrático na un solo lugá. Nos por traha reki di buki, i hopi biaha basta barata, si nos no por cumpra nan trahá caba, i nan no tin nodi tuma muchu lugá. Acceso fácil n’e biblioteca tambe ta importante. Bukinan wardá den zolder generalmente ta haci nada mas cu coge stof so.

E siguiente paso ta pa organisá e bukinan. Djis un poco tempu dedicá pa areglá e bukinan den un ordu lógico ta duna recompensa.

Kico si mayoria di bo famia no ta Testigo di Jehova? Aunke kisas lo bo no por organisá un biblioteca manera lo bo kier, den bo mes kamber bo por tin un reki di buki cu ta contené por lo ménos algun publicacion bíblico.

Un Biblioteca Teocrático Por Yuda Edificá Spiritualidad

Unabes nos tin nos bukinan areglá, nos mester di un sistema pa yuda nos localisá e informacion. Nos memoria por faya nos, i kisas nos no conocé personalmente e contenido di cada buki den nos biblioteca teocrático. No obstante, tur e informacion den e biblioteca ta fácilmente accesibel. Si e Índice de las publicaciones Watch Tower ta disponibel den un idioma [cu bo ta comprendé], e por permití nos haña informacion specífico riba casi tur tópico den un tempu corticu.

Julián, kende a sirbi pa hopi aña como pionero special i anciano, ta splica cu e Índice ta masha balioso den siña su yu menor haci studio personal. “Jairo, kende tin siete aña di edad, a bini cas for di scol un par di dia pasá i puntrá mi, ‘Papi, kico e Sociedad a bisa tocante dinosaurio?’ Nos a bai direct den e Índice i a busca e palabra ‘dinosaurio.’ Casi mesora nos a haña un ¡Despertad! cu artículonan principal riba e tópico. [8 di februari, 1990] E mésun dia ei, Jairo a cuminsá les’é. E sa caba cu nos biblioteca tin informacion probechoso riba prácticamente tur tópico. Personalmente, mi ta convencí cu ora nos yunan siña haci bon uso di un biblioteca teocrático, e ta yuda nan crece spiritualmente. Nan ta siña razoná, i ademas, nan ta descubrí cu studio personal por ta masha deleitabel.”

Fausto, e tata di Sherezade mencioná den e introduccion, ta haña cu bo mester cuminsá entrená e yunan mas pronto posibel pa usa un biblioteca teocrático. “Nos ta mustrando Sherezade caba, kende tin seis aña awor, con pa usa e Índice,” e ta splica. “Siendo cu e ta fasiná cu e prospecto dje Paradijs terenal, nos a cuminsá mustrand’e e palabra ‘paradijs’ den e Índice i despues busca e artículonan di Toren di Vigilancia cu ta ser mencioná. Generalmente nos a djis mustr’é e plachinan. No obstante, dor dje método aki el a siña cu e Índice ta e clave pa haña informacion den nos biblioteca di cas. Nos tabata sa cu el a capta e punto ora el a regresá for di scol un dia cu un pregunta tocante celebracionnan di Pascu di Resureccion. ‘Pakico nos no ta busca algu cu e Índice?’ el a puntra su mama.”

Sin importá nos edad, Bijbel ta animá nos pa “haci sigur di tur cos; tene firme na loke ta excelente.” (1 Tesalonicense 5:21) Esaki ta rekerí pa nos examiná loke e Scritura ta bisa. (Echo 17:11) Si nos tin un biblioteca teocrático bon organisá, un investigacion asina por ta un placer. Cada biaha cu nos usa exitosamente nos biblioteca pa prepará un discurso, pa haña conseho práctico riba con pa trata un problema, of pa busca informacion interesante, lo e inculcá den nos e balor práctico di nos biblioteca.

E mayornan di Sherezade ta bisa claramente: “Den un famia cristian, un biblioteca teocrático definitivamente no ta un luho!”

[Box on page 30]

CON BO POR ORGANISA BO BUKINAN?

No tin regla estricto riba con pa organisá bo bukinan. Sin embargo, e siguiente divisionnan lógico ta ilustrá un manera con lo bo por organisá bo bukinan segun contenido.

1. Bukinan cu ta contené un análisis versículo pa versículo di cierto partinan di Bijbel

(Ehempelnan: E homber mas importante cu hamás a biba, Revelacion​—⁠su gran culminacion ta cerca!, “Las naciones sabrán que yo soy Jehová” ... ¿cómo?, “Hágase tu voluntad en la Tierra”)

2. Bukinan relacioná cu bida di famia

(Ehempelnan: Logrando felicidad den bida di famía, Loke hovenan sa puntra​—⁠contesta práctica, Mi buki di relato bíblico)

3. Bijbelnan i publicacionnan di referencia

(Ehempelnan: Traducción del Nuevo Mundo de las Santas Escrituras (Con Referencias), otro Bijbelnan, Índice de las publicaciones Watch Tower, Gran Concordancia, Perspicacia para comprender las Escrituras, The Kingdom Interlinear Translation of the Greek Scriptures, un bon diccionario)

4. Bukinan cu ta ser usá p’e Studio di Buki di Congregacion i e Scol di Ministerio Teocrático

5. Audiocaset i video

6. Volúmennan di E Toren di Vigilancia i ¡Despertad!

7. Historia di Testigonan di Jehova

(Ehempelnan: Anuario de los testigos de Jehová, Los testigos de Jehová, proclamadores del Reino de Dios)

8. Buki i foyetonan cu nos ta usa regularmente den nos ministerio

(Ehempelnan: Bo por biba pa semper den Paradijs riba tera, Razonamiento a partir de las Escrituras, La vida... ¿cómo se presentó aquí? ¿Por evolución, o por creación?, El hombre en busca de Dios, Uní den adoracion dje único Dios berdadero)

[Caption on page 31]

Sherezade ya a bira un bon studiante di Bijbel

[Caption on page 31]

Aunke yong, e hobencito aki ta usando un biblioteca teocrático