Areglo Nobo pa Bibliotekanan di Salòn di Reino

Pa hopi aña kaba, kongregashonnan rònt mundu ta benefisiá di nan biblioteka di Salòn di Reino, anteriormente yamá biblioteka di e Skol di Ministerio Teokrátiko. Den pasado, a ser konsiderá ku ta nesesario pa kada kongregashon tin su propio biblioteka. Sin embargo, dor ku awor hopi Salòn di Reino ta wòrdu usá dor di mas ku un kongregashon, di kua algun ta kongregashon di otro idioma, ta parse ku ta mas mihó pa tin un solo biblioteka di Salòn di Reino, unu bon surtí i al dia, pa kada grupo di idioma na kada Salòn di Reino. Salònnan di Reino ku tin mas ku un sala di ouditorio, mester tin un biblioteka pa kada grupo di idioma ku ta reuní einan.

Ta di sperá ku e areglo aki lo skapa espasio i baha gastu. Ademas, poniendo e bukinan di dos òf mas kongregashon huntu probablemente lo resultá den un mihó biblioteka. Por warda bukinan ku sobra pa usa nan despues ora ku konstruí un otro Salòn di Reino nobo. Si e Salòn di Reino tin un kòmpiuter ku Watchtower Library riba CD-ROM, esei lo por ta masha útil pa algun ruman.

Pa kada biblioteka di Salòn di Reino, un ruman hòmber, preferiblemente un di e superintendentenan di e Skol di Ministerio Teokrátiko, lo sirbi komo bibliotekario. Tiki-tiki e tin ku agregá publikashonnan apropiá na e kolekshon, markando di un manera kla riba e kaft parti paden di kada un ku nan ta pertenesé na e biblioteka di Salòn di Reino. Por lo ménos un bes pa aña, e mester kontrolá pa wak si no tin un publikashon ta falta i hasi sigur ku e publikashonnan ta den bon kondishon. No mag bai kas ku e publikashonnan di e biblioteka aki!

Tur esnan ku ta asosiá ku e kongregashon ta sigui apresiá e bibioteka di Salòn di Reino mashá. Laga nos demostrá ku personalmente nos ta balorá e provishon aki dor di kuid’é i dor di us’é pa buska “e konosementu di Dios.”​—⁠Pro. 2:⁠5.