Caha Di Pregunta

◼ Cua publicacionnan mester pone den e biblioteca dje Scol di Ministerio Teocrático?

Un abundancia di publicacionnan spiritual a ser percurá pa beneficiá e pueblo di Dios. Ya cu hopi publicador no tin tur esakinan personalmente, e biblioteca dje Scol di Ministerio Teocrático n’e Salon di Reino ta percurá medionan pa haci investigacion den publicacionnan cu tal bes di otro manera lo no ta disponibel. Pues, e mester ta bon ekipá cu un variedad di traduccion di Bijbel, e publicacionnan actual di Sociedad, copianan di Nos Ministerio di Reino, volúmennan di Atalaya i ¡Despertad! i e vários Watch Tower Publications Index. Ademas, mester agregá un bon diccionario moderno. Si tin disponibel, enciclopedia, atlas of bukinan di referencia tocante gramática i historia lo por ta útil. Sin embargo, nos interes principal mester ta riba e publicacionnan percurá dor di “e esclabo fiel i discreto.”—Mat. 24:45.

Den algun caso ta ser raportá cu bukinan di naturalesa cuestionabel a ser poné den e biblioteca dje Scol di Ministerio Teocrático. Lo no ta apropiado pa incluí bukinan di ficcion, bukinan cu ta resaltá crítica textual di Bijbel, ni bukinan tocante filosofia of spiritismo. E biblioteca dje Scol di Ministerio Teocrático mester incluí solamente material cu lo haci posibel pa esnan cu ta us’é haci progreso spiritual continuo.—1 Tim. 4:15.

E superintendente di scol ta responsabel p’e biblioteca, aunke por asigná un otro ruman homber pa yud’é soru p’e biblioteca. E mester soru p’e biblioteca ta ser mantené al dia, cu publicacionnan nobo ta ser agregá asina cu nan bira disponibel. Cada buki mester ta marcá claramente paden dje portada cu e nomber dje congregacion na cua e ta pertenecé. Anualmente, mester controlá e bukinan pa wak si mester drecha of reemplasá cualkier di nan.

Tur hende por cooperá pa soru p’e biblioteca. Mester tene cuidou ora di trata i usa e bukinan. No mester permití mucha hunga cu nan, tampoco ningun hende mag di skirbi den nan. Mester cologá un borchi nechi cu ta recordá e rumannan cu no tin mag di bai cu e bukinan for dje Salon di Reino.

Siendo cu congregacionnan nobo ta ser formá constantemente, ta probabel cu hopi biblioteca ta limitá na tamaño. Algun publicador cu tin publicacionnan mas bieu tal bes por pensa pa duna nan como regalo n’e congregacion. E ancianonan lo kier haci pedido pa e volúmennan di Atalaya cu ta ser reimprimí. Den e maneranan aki, e biblioteca dje Scol di Ministerio Teocrático lo resultá di ta masha útil den yuda tur ruman descubrí e tesoronan scondí dje Palabra di Dios, cu ta duna conocimentu, sabiduria i comprendimentu.—Pro. 2:4-6.