Inmortalidad di Alma—Orígen dje Doctrina

“Ningun tópico conectá cu hende su bida síkico a ocupá su mente asina tantu manera esun di su condicion despues di morto.”—“ENCYCLOPÆDIA OF RELIGION AND ETHICS.”

1-3. Con Sócrates i Plato a promové e idea cu alma ta inmortal?

UN ERUDITO i maestro di 70 aña di edad ta ser acusá di falta di respet pa lo sagrado i di ta corumpí mentenan hóben cu su siñansa. Maske e ta presentá un defensa briyante durante su huicio, un hurado cu prehuicio ta hañ’é culpabel i ta sentenci’é na morto. Djis un par di ora promé cu su ehecucion, e maestro di edad ta presentá n’e alumnonan reuní rond di dje un seri di argumento pa afirmá cu e alma ta inmortal i cu no mester tin miedu di muri.

² E homber condená no ta ningun otro sino Sócrates, filósofo griego renombrá di siglo cincu P.E.C.a Su alumno Plato a registrá e incidentenan aki den e ensayo Apology i Phaedo. Sócrates i Plato ta ser acreditá di ta entre e proménan cu a promové e idea cu e alma ta inmortal. Pero no ta nan a originá e siñansa aki.

³ Manera nos lo mira, e orígennan dje idea di inmortalidad humano ta bai hopi mas tempu atras. Sin embargo, Sócrates i Plato a refiná e concepto i a transform’é den un siñansa filosófico, haciend’e asina mas atractivo pa e clasenan culto di nan tempu i despues.

Di Pitágoras te na Piramid

4. Promé cu Sócrates, ki punto di bista e griegonan tabatin di bida despues di morto?

⁴ E griegonan promé cu Sócrates i Plato tambe a kere cu e alma a sigui biba despues di morto. Pitágoras, e famoso matemático griego di siglo seis P.E.C., tabata di opinion cu e alma ta inmortal i sometí na transmigracion, esta, cu e alma ta sali bai den un otro criatura. Promé cuné, Tales di Mileto, segun algun e promé filósofo griego conocí, a sinti cu un alma inmortal ta existí no solamente den hende, bestia i mata, sino tambe den obhetonan manera magneet, ya cu nan por move heru. Segun e griegonan di antigwedad, alma dje mortonan tabata ser transportá cu barcu n’e otro banda dje riu Styx na un inmenso region subteráneo, yamá, e otro mundu of e mundu subteráneo. Ei, huesnan a sentenciá e almanan sea na tormento den un prizon cu muraya masha haltu of na dicha den Campo Elisio.

5, 6. Con e personan a mira e alma?

⁵ Na Iran, of Persia, den direccion oost, un profeta di nomber Zoroastro a aparecé riba esenario den siglo shete P.E.C. El a introducí un forma di adoracion cu a bira conocí como zoroastrismo. Esaki tabata e religion dje Imperio di Persia, cu a dominá e esena di mundu promé cu Grecia a bira un potencia grandi. E scrituranan zoroástrico ta bisa: “Den Inmortalidad e alma dje Hustu lo ta Gososo pa semper, pero e alma dje Mentiroso sigur lo ta den tormento. I e Leynan aki Ahura Mazda [nificando: “un dios sabí”] a ordená mediante Su autoridad soberano.”

⁶ E siñansa di inmortalidad di alma tabata tambe parti dje religion iraní promé cu zoroastrismo. Por ehempel, tribunan antiguo di Iran a percurá pa alma dje defuntunan dor di ofrecé nan cuminda i paña pa nan usa den e otro mundu.

7, 8. Kico e egipcionan di antigwedad a kere tocante e alma cu ta keda na bida despues cu e curpa muri?

⁷ Creencia den bida despues di morto tabata un punto central den e religion egipcio. E egipcionan a kere cu alma dje persona morto lo a ser husgá dor di Osíris, e dios principal dje otro mundu. Por ehempel, un documento di papiro, cu supuestamente ta data di siglo 14 P.E.C., ta presentá Anúbis, dios dje defuntonan, guiando alma dje escriba Hunefer dilanti Osíris. Riba un balansa ta pisa e curason dje escriba, cu ta representá su concenshi, contra e pluma cu e diosa di berdad i husticia ta carga riba su cabes. Thot, un otro dios, ta registrá e resultadonan. Como cu e curason di Hunefer no ta cargá cu culpa, e ta pisa ménos cu e pluma, i ta permití Hunefer drenta e dominio di Osíris i ricibí inmortalidad. Tambe e papiro ta mustra un monster hembra pará banda dje balansa, cla pa devorá e defuntu si e curason no pasa e test. Tambe e egipcionan a balsamá nan mortonan i a conserbá e curpa di fáraonan den piramidnan impresionante, como cu nan a pensa cu si e curpa keda conserbá, e alma ta sobrebibí.

⁸ Pues anto, vários civilisacion di antigwedad tabatin un siñansa en comun: inmortalidad di alma. Nan a haña e siñansa aki for dje mésun fuente?

E Punto di Orígen

9. Cua religion a influenciá e antiguo mundu di Egipto, Persia i Grecia?

⁹ E buki The Religion of Babylonia and Assyria ta bisa: “Den e mundu di antigwedad, Egipto, Persia i Grecia a sinti e influencia dje religion babilónico.” E buki aki ta sigui splica: “En bista dje contacto for di principio entre Egipto i Babilonia, manera e tablanan di El-Amarna ta revelá, ta sigur cu tabatin oportunidad na abundancia pa puntonan di bista i custumbernan babilónico drenta cultonan egipcio. Na Persia, e culto di Mitra ta revelá e influencia inekibocabel di conceptonan babilónico . . . E mescla fuerte di elementonan semítico tantu den e mitologia griego di promé como den cultonan griego, tin un aceptacion asina amplio awe entre eruditonan, cu no tin pakico comentá mas riba nan. Pa gran parti e elementonan semítico aki ta mas specíficamente babilónico.”b

10, 11. Cua tabata e punto di bista babilónico di bida despues di morto?

¹⁰ Pero e punto di bista babilónico di loke ta sosodé despues di morto no ta hopi diferente for di esun egipcio, perso i griego? Tuma, por ehempel, e leyenda babilónico Epica di Gilgamesh. Gilgamesh, e héroe cu tabata birando bieu i cu tabata perturbá dor dje realidad di morto, ta sali bai en busca di inmortalidad, pero no ta logra hañ’é. Un mosa cu ta sirbi biña, cu e ta topa durante su biahe, asta ta anim’é pa saca lo máximo for dje bida aki, pasobra lo e no haña e bida eterno cu e ta busca. E mensahe di henter e épica ta cu hende no por scapa morto i cu e speransa di inmortalidad ta un ilusion. Esaki lo ta indicá cu e babilonionan no a kere den bida despues di morto?

¹¹ Profesor Morris Jastrow Jr., dje Universidad di Pennsylvania, Merca, a skirbi: “Ni e pueblo ni e lidernan di e forma di pensa religioso [di Babilonia] hamas a considerá e posibilidad di anikilacion total di algu cu un tempu a ricibí existencia. Morto [segun nan] tabata un pasashi na otro clase di bida, i e nengamentu di inmortalidad simplemente a enfatisá e imposibilidad di scapa e cambio cu morto a causa den existencia.” Sí, e babilonionan tambe a kere cu un of otro clase di bida, den un of otro forma, a sigui despues di morto. Nan a manifestá esaki dor di dera huntu cu e mortonan obhetonan pa nan usa den e bida despues di morto.

12-14. (a) Despues dje Diluvio, cua tabata e lugá di orígen dje siñansa di inmortalidad di alma? (b) Con e doctrina a plama riba henter e tera?

¹² Ta bisto cu e siñansa di inmortalidad di alma ta bai bek te na Babilonia di antigwedad. Segun Bijbel, un buki cu ta carga e seyo di historia exacto, e stad di Babel, of Babilonia, a ser fundá dor di Nimrod, un bisanietu di Noe.c Despues dje Diluvio mundial den tempu di Noe, tabatin solamente un idioma i un religion. Dor di funda e stad i construí un toren ei, Nimrod a cuminsá un otro religion. E registro bíblico ta mustra cu despues dje confusion dje idiomanan na Babel, e constructornan di toren cu a fracasá a plama i a cuminsá un bida nobo, hibando nan religion huntu cu nan. (Génesis 10:6-10; 11:4-9) Asina siñansanan religioso babilónico a plama riba henter e cara dje tera.

¹³ Segun tradicion, Nimrod a muri un morto violento. Despues di su morto ta razonabel pa kere cu e babilonionan lo tabata incliná na vener’é como fundadó, constructor i promé rey di nan stad. Siendo cu e dios Marduk (Merodac) ta ser considerá como e fundadó di Babilonia, algun erudito a indicá cu Marduk ta representá Nimrod exaltá na dios. Si ta asina, anto e idea cu un persona tin un alma cu ta keda na bida despues di morto mester tabata comun por lo ménos n’e tempu di Nimrod su morto. Di tur manera, e páginanan di historia ta revelá cu despues dje Diluvio, e lugá di orígen dje siñansa di inmortalidad di alma tabata Babel, of Babilonia.

¹⁴ Sin embargo, con e doctrina a bira un punto central den mayoria religion di nos tempu? E siguiente seccion lo examiná con el a drenta den religionnan oriental.

[Nota]

[Plachi na página 1]

E punto di bista egipcio di almanan den e otro mundu

[Plachi na página 7]

Sócrates a argumentá cu alma ta inmortal