E Idea Ta Drenta Hudaismo, Cristiandad i Islam

“Religion ta entre otro un manera pa pone hende aceptá e echo cu un dia nan tin cu muri. E ta haci esei sea dor di primintí un mihó bida mas ayá di graf, un renacementu of ámbos.”—GERHARD HERM, AUTOR ALEMAN.

1. Mayoria religion ta basa nan promesa di bida despues di morto riba ki creencia básico?

DOR di primintí un bida despues di morto, prácticamente tur religion ta dependé riba e creencia cu hende tin un alma cu ta inmortal i cu na ora di morto e ta biaha bai un otro region of ta transmigrá bai den un otro criatura. Manera a ser mencioná den e seccion anterior, e creencia den inmortalidad humano tabata un parti integral di religionnan oriental desde nan comienso. Pero kico di hudaismo, cristiandad i islam? Con e siñansa a bira central den e religionnan aki?

Hudaismo Ta Absorbá Conceptonan Griego

2, 3. Segun Encyclopaedia Judaica, e scrituranan sagrado na hebreo a siña tocante inmortalidad di alma?

² E rais di hudaismo ta bai bek un 4.000 aña te na Abraham. Skirbimentu dje scrituranan sagrado na hebreo a cuminsá den siglo 16 P.E.C. i a ser completá rond dje tempu cu Sócrates i Plato a forma e teoria di inmortalidad di alma. E Scritura Hebreo a siña tocante inmortalidad di alma?

³ Encyclopaedia Judaica ta contestá: “Solamente den e periodo postbíblico, un creencia cla i firme den e inmortalidad di alma a saca rais . . . i a bira un dje elementonan fundamental dje religion hudiu i cristian.” Tambe e ta declará: “Den e periodo bíblico a considerá e persona como algu completo. Di manera cu no a haci un separacion distintivo dje alma for dje curpa.” E hudiunan di promé a kere den resureccion dje mortonan. Anto e enciclopedia ei ta señalá cu “mester distinguí [esaki] for dje creencia den . . . inmortalidad di alma.”

4-6. Con e doctrina di inmortalidad di alma a bira “un dje elementonan fundamental” di hudaismo?

⁴ Con anto, e doctrina a bira “un dje elementonan fundamental” di hudaismo? Historia ta duna e contesta. Na 332 P.E.C., Alexander de Grote a conkistá gran parti di Medio Oriente cu rapides di weerlicht. Na su yegada na Jerusalem, e hudiunan a ricibié cu brasa habrí. Segun historiadó hudiu di promé siglo, Flavio Josefo, asta nan a mustr’é e profecia den e buki di Daniel, skirbí mas cu 200 aña promé, cu a describí claramente Alexander su conkista den papel dje “rey di Grecia.” (Daniel 8:5-8, 21) E sucesornan di Alexander a sigui cu su plan di helenisacion, saturando tur parti dje imperio cu idioma, cultura i filosofia griego. E dos culturanan—griego i hudiu—no por a keda sin mescla cu otro.

⁵ Na comienso di siglo tres P.E.C., a cuminsá cu e promé traduccion dje Scritura Hebreo na griego, yamá Septuaginta. Dor di dje hopi gentil a haña respet p’e religion hudiu i a familiarisá nan mes cuné. Algun asta a combertí na hudaismo. Na otro un banda, hudiunan tabata birando versá den pensamentu griego, i algun a bira filósofo, algu completamente nobo pa nan. Filo di Alexandria, di promé siglo E.C., tabata un dje filósofonan hudiu ei.

⁶ Filo a venerá Plato i a purba splica hudaismo den términonan di filosofia griego. Segun e buki Heaven—A History (Shelu—Un Historia): “Filo a prepará e caminda pa pensadónan cristian [i tambe hudiu] cu a bini despues, dor di crea un combinacion único di filosofia platónico i tradicion bíblico.” I kico Filo a kere tocante alma? E buki ta sigui bisa: “P’e, morto ta restorá e alma na su estado original promé cu nacementu. Siendo cu e alma ta pertenecé n’e mundu spiritual, bida den e curpa ta bira nada otro sino un episodio breve, i hopi bes desafortuná.” Otro pensadónan hudiu cu a kere den inmortalidad di alma ta, entre otro, Isaac Israeli, e conocido dokter di siglo 10, i Moses Mendelssohn, un filósofo aleman hudiu di siglo 18.

7, 8. (a) Con e Talmud ta describí e alma? (b) Kico literatura hudiu místico posterior ta bisa tocante e alma?

⁷ Un buki cu tambe tabatin un influencia profundo riba manera di pensa i bida hudiu ta e Talmud, e resúmen skirbí dje asina yamá ley oral, na cua posteriormente a agregá comentario i splicacionnan dje ley oral aki, cu rabinan for di siglo dos E.C. te den Edad Medio a compilá. Segun Encyclopaedia Judaica: “E rabinan dje Talmud a kere den e existencia continuo dje alma despues di morto.” E Talmud ta bisa cu e mortonan ta tuma contacto cu e bibunan. Encyclopædia of Religion and Ethics ta bisa: “Probablemente debí n’e influencia di platonismo, [rabinan] a kere den e preexistencia di alma.”

⁸ Literatura místico hudiu posterior, e Cabala, asta ta bai asina leu di siña reencarnacion. Relacioná cu e creencia aki, The New Standard Jewish Encyclopedia ta declará: “Ta parce cu e idea a originá na India. . . . Den Kabbalah e ta bini dilanti pa promé bes den e buki Bahir, anto, for di Zohar padilanti, el a ser aceptá comunmente dor di místiconan, hungando un papel importante den creencia i literatura hasídico.” Den Israel awe, reencarnacion ta ampliamente aceptá como un siñansa hudiu.

9. Kico ta e punto di bista di mayoria faccion di hudaismo djawe pa loke ta inmortalidad di alma?

⁹ Pues anto, e idea di inmortalidad di alma, a drenta hudaismo mediante e influencia di filosofia griego, i e concepto ta ser aceptá awe dor di mayoria di su faccionnan. Kico por bisa tocante e entrada dje siñansa den cristiandad?

Cristiandad Ta Adoptá e Pensamentunan di Plato

10. Kico un prominente erudito spañó a concluí tocante Jesus su creencia den inmortalidad di alma?

¹⁰ Cristianismo berdadero a cuminsá cu Cristo Jesus. Relacioná cu Jesus, Miguel de Unamuno, un prominente erudito spañó di siglo 20, a skirbi: “El a kere mas bien den resureccion dje carni, segun e manera hudiu, no den inmortalidad di alma, segun e manera [griego] platónico. . . . Por mira pruebanan di esaki den cualkier buki di interpretacion onesto.” El a concluí: “Inmortalidad di alma . . . ta un dogma filosófico pagano.”

11. Na ki tempu filosofia griego a cuminsá infiltrá den cristianismo?

¹¹ Na ki tempu i con e “dogma filosófico pagano” aki a infiltrá den cristianismo? New Encyclopædia Britannica ta señalá: “For di meimei di siglo 2 AD, cristiannan cu tabatin algun entrenamentu den filosofia griego a cuminsá sinti e necesidad pa expresá nan fe den su términonan, tantu pa nan propio satisfaccion intelectual como pa combertí paganonan educá. E filosofia cu mas a pas pa nan tabata platonismo.”

12-14. Ki papel Origen i Agustin a hunga den mescla filosofia platónico cu cristianismo?

¹² Dos dje filósofonan ei di ántes a ehercé un influencia masha grandi riba doctrinanan di cristiandad. Un tabata Origen di Alexandria (rond di 185-254 E.C.), i e otro, Agustin di Hippo (354-430 E.C.). Relacioná cu nan, New Catholic Encyclopedia ta declará: “Cu e alma a ser establecí como un substancia spiritual i for di su naturalesa a forma un concepto filosófico, ta debí solamente n’e echo cu Origen tabata prominente den Oriente i San Agustin den Occidente.” Riba ki base Origen i Agustin a forma nan conceptonan tocante alma?

¹³ Origen tabata alumno di Clemente di Alexandria, cu tabata “e promé dje Tatanan cu explícitamente a fia e concepto di alma for dje tradicion griego,” segun New Catholic Encyclopedia. Plato su ideanan tocante alma mester a influenciá Origen profundamente. “[Origen] a hinca den e doctrina cristian henter e drama cósmico dje alma, cu el a tuma for di Plato,” teólogo Werner Jaeger a comentá den The Harvard Theological Review.

¹⁴ Algun hende den cristiandad ta considerá Agustin como e pensadó principal di antigwedad. Promé cu Agustin a combertí na “cristianismo” n’e edad di 33 aña, e tabatin interes intenso den filosofia i a bira un neoplatonista.a Despues di a combertí, el a keda cu su forma di pensa neoplatónico. Segun The New Encyclopædia Britannica: “Ta den su mente e religion dje Testament Nobo a mescla mas completo cu e tradicion platónico di filosofia griego.” New Catholic Encyclopedia ta admití cu Agustin su “doctrina [dje alma], cu a bira standard den Occidente te cu fin di siglo 12, a debe hopi . . . na neoplatonismo.”

15, 16. E interes cu tabatin den siglo 13 pa siñansanan di Aristóteles, a cambia e punto di bista di iglesia riba e siñansa di inmortalidad di alma?

¹⁵ Den siglo 13, e siñansanan di Aristóteles tabata ganando popularidad na Europa, en gran parti pasobra tabatin obranan di eruditonan arabir disponibel na latin, kendenan a comentá extensivamente riba obranan skirbí di Aristóteles. Un erudito católico yamá Thomas Aquinas tabata profundamente impresioná cu pensamentu aristoteliano. Debí na artículonan skirbí dor di Aquinas, e puntonan di bista di Aristóteles a ehercé mas influencia riba e siñansa di iglesia cu esnan di Plato. Sin embargo, e tendencia aki no a afectá e siñansa tocante inmortalidad di alma.

¹⁶ Aristóteles a siña cu e alma tabata inseparablemente conectá cu e curpa i no a sigui existí individualmente despues di morto i cu si tin algu eterno ta existí den hende, anto esei tabata inteligencia abstracto, no personal. E manera aki di mira e alma no a cuadra cu e creencia di iglesia tocante almanan personal cu ta sigui biba despues di morto. P’esei, Aquinas a modificá Aristóteles su punto di bista dje alma, afirmando cu por proba e inmortalidad di alma mediante lógica. Asina, e creencia di iglesia den inmortalidad di alma a keda intacto.

17, 18. (a) E Reformacion di siglo 16 a introducí un reforma den e siñansa tocante alma? (b) Kico ta e posicion di mayoria denominacion di cristiandad pa loke ta inmortalidad di alma?

¹⁷ Durante siglo 14 i 15, e promé parti di Renaissance, tabatin un rebibamentu di interes den Plato. E famoso famia Medici na Italia asta a yuda establecé un academia na Florencia pa promové estudio di Plato su filosofia. Durante siglo 16 i 17, interes den Aristóteles a mengua. I e Reformacion di siglo 16 no a introducí un reforma den e siñansa tocante alma. Aunke reformadónan protestant no tabata di acuerdo cu e siñansa di purgatorio, nan a aceptá e idea di tormento of recompensa eterno.

¹⁸ Di manera cu e siñansa di inmortalidad di alma ta prevalecé den mayoria denominacion di cristiandad. Riparando esaki, un erudito mericano a skirbi: “De facto, pa e gran mayoria di nos mes hendenan, religion ta nificá inmortalidad, i nada mas. Dios ta e productor di inmortalidad.”

Inmortalidad i Islam

19. Na ki tempu islam a ser fundá, i dor di ken?

¹⁹ Islam a cuminsá ora cu Mohamed a haña un yamada pa ta un profeta tempu e tabatin rond di 40 aña di edad. En general moslimnan ta kere cu e revelacionnan a bini na dje durante un periodo di un 20 pa 23 aña, for di alrededor di 610 E.C. te na su morto na 632 E.C. E revelacionnan aki ta registrá den e Koran, e buki sagrado di moslim. Pa tempu cu islam a bini na existencia, hudaismo i cristiandad tabata infiltrá caba cu e concepto platónico di alma.

20, 21. Kico moslimnan ta kere tocante bida despues di morto?

²⁰ Moslimnan ta kere cu nan religion ta e culminacion dje revelacionnan duná na fiel hebreonan i fiel cristiannan di antigwedad. E Koran ta cita tantu for dje Scritura Hebreo como dje Scritura Griego. Pero riba e siñansa di inmortalidad di alma, Koran ta desviá for dje scrituranan aki. Koran ta siña cu hende tin un alma cu ta sigui biba despues di morto. Tambe e ta papia di resureccion dje mortonan, un dia di huicio i e destino final dje alma: sea bida den un hardin celestial paradísico of castigu den un fiernu di candela.

²¹ Moslimnan ta di opinion cu un persona morto su alma ta bai Barzakh, of “Barera,” “e lugá of estado den cua hende lo ta despues di morto i promé cu Huicio.” (Sura 23:99, 100, The Holy Qur-an, nota) Eiden e alma ta conciente i e ta experenciá loke ta ser yamá e “Castigu dje Graf” si e persona tabata malbado of e ta disfrutá di felicidad si e tabata fiel. Pero e fielnan tambe tin cu experenciá algu di tormento, debí na nan poco picánan cu nan a cometé tempu nan tabata na bida. Riba e dia di huicio, cada persona ta confrontá su destino eterno, loke ta terminá e estado intermedio.

22. Relacioná cu destino dje alma, ki teorianan distinto for di otro algun filósofo arabir a presentá?

²² E idea di inmortalidad di alma den hudaismo i cristiandad a aparecé debí na influencia platónico, pero e concepto a ser hincá den islam desde su principio. Esaki no kier men cu eruditonan arabir no a purba combiná siñansanan islámico cu filosofia griego. En realidad, e mundu arabir a ser influenciá mashá dor dje obranan di Aristóteles. I eruditonan arabir renombrá, manera Avicenna i Averroës, a splica i elaborá riba pensamentu aristoteliano. Sin embargo, den nan esfuersonan pa armonisá pensamentu griego cu e siñansa moslim tocante alma, nan a desaroyá teorianan distinto for di otro. Por ehempel, Avicenna a declará cu e alma personal ta inmortal. Na otro un banda, Averroës a argumentá contra e punto di bista ei. Apesar dje puntonan di bista aki, inmortalidad di alma ta keda e creencia dje moslimnan.

23. Na unda hudaismo, cristiandad i islam ta pará riba e cuestion di inmortalidad di alma?

²³ Ta bisto anto, cu hudaismo, cristiandad i islam tur ta siña e doctrina di inmortalidad di alma.

[Nota]

[Plachi na página 14]

E conkista di Alexander de Grote a hiba na mesclamentu dje culturanan griego i hudiu

[Plachinan na página 15]

Origen, ariba, i Agustin a purba combiná filosofia platónico cu cristianismo

[Plachinan na página 16]

Avicenna, ariba, a declará cu e alma personal ta inmortal. Averroës a argumentá contra e punto di bista ei