Filosofia Griego​—A Enrikesé Cristianismo?

“Aunke cristianismo tabata contra cultura pagano griego i romano, de facto el a absorbá hopi filosofia clásico.”—The Encyclopedia Americana.

ENTRE esnan cu tabatin un influencia permanente riba pensamentu “cristian,” “San” Agustin tin un posicion indiscutí. Segun The New Encyclopædia Britannica, ta den e “mente” di Agustin “e religion dje Testament Nobo a mescla mas completo cu e tradicion platónico di filosofia griego; i ta e mente aki tambe a sirbi pa transmití e producto dje fusion aki na cristiandad di catolicismo romano di Edad Medio i protestantismo dje época di Renaissance.”

Loke Agustin a laga atras en berdad ta duradero. Papiando dje grado cu filosofia griego a influenciá cristiandad, Douglas T. Holden a declará: “Teologia cristian a mescla asina tantu cu filosofia griego cu el a producí individuonan cu tin 90% pensamentu griego i 10% pensamentu cristian.”

Algun erudito ta kere firmemente cu e influencia filosófico ei a haci cristianismo atractivo na su comienso, a enrikesé su siñansa i a hacié mas convincente. Esei tabata e caso? Con i na ki tempu e influencia di filosofia griego a tuma lugá? De echo, el a enrikesé cristianismo of el a contamin’é?

Ta instructivo pa analisá un cantidad di desaroyo cu a tuma lugá for di siglo 3 P.E.C. te cu siglo 5 E.C. Nos lo haci esei mediante un examinacion di cuater expresion straño: (1) “Hudaismo helenisá,” (2) “helenismo cristianisá,” (3) “cristianismo helenisá” i (4) “filosofia cristian.”a

“Hudaismo Helenisá”

E promé, esta, “hudaismo helenisá,” ta ègt un contradiccion. E hebreonan no tabatin mag di contaminá nan religion original cu Jehova, e Dios berdadero, a instituí, cu ideanan religioso falsu. (Deuteronomio 12:32; Proverbionan 30:5, 6) Pero, for di e adoracion puru su cuminsamentu mes, prácticanan i pensamentu religioso falsu rond di dje—manera e influencia di fuentenan egipcio, cananeo i babilónico—a menasá di corumpié. Ta tristu pa bisa cu Israel a permití su adoracion berdadero bira profundamente corumpí.—Huesnan 2:11-13.

Siglonan mas despues, ora Palestina di antigwedad a bira parti dje Imperio Griego bou di Alexander e Grandi den siglo 4 P.E.C., e corupcion aki a alcansá su condicion di mas baho i a laga atras un herencia duradero i dañino. Alexander a reclutá hudiu den su ehército. E contacto entre e hudiunan i nan conkistadó a influenciá pensamentu religioso hudiu profundamente. Ideanan helenista (esta, di griego antiguo) a penetrá den educacion hudiu. Sumo Sacerdote Jason ta esun cu supuestamente a establecé un academia griego den Jerusalem na aña 175 P.E.C. pa promové e estudio di Homero.

Ta interesante pa nota cu un samaritano cu a skirbi den e di dos mitar di siglo 2 P.E.C., a purba presentá historia di Bijbel como skirbimentu di historia di griego antiguo. Bukinan hudiu apócrifo, manera Judith i Tobías, en realidad ta referí indirectamente na leyenda griego erótico. A presentá un cantidad di filósofo hudiu cu a purba cuadra pensamentu griego cu e religion hudiu i cu Bijbel.

E figura cu a ricibí mas crédito pa esaki ta Filo, un hudiu di promé siglo E.C. El a coge e doctrinanan di Plato (siglo 4 P.E.C.), dje pitágoranan i dje stoiconan. E ideanan di Filo a influenciá hudiunan profundamente. Resumiendo e infiltracion intelectual aki di pensamentu griego den cultura hudiu, e autor hudiu Max Dimont ta bisa: “Enrikesé cu pensamentu di Plato, lógica di Aristóteles i ciencia di Euclidio, eruditonan hudiu a abordá e Tora cu hermentnan nobo. . . . Nan a cuminsá agregá razonamentu griego na revelacion hudiu.”

Cu tempu, e romanonan a absorbá e Imperio Griego i a haña control riba Jerusalem. Esaki a habri caminda pa cambionan asta mas significativo. Pa siglo 3 E.C., e doctrinanan filosófico i religioso di pensadónan cu a trata na desaroyá i combiná e ideanan di Plato a haña nan forma definitivo, awe conocí colectivamente como neoplatonismo. E scol aki di cierto liña di pensamentu sigur lo tabatin un influencia profundo riba cristianismo apóstata.

“Helenismo Cristianisá”

Durante e promé cincu siglonan di nos era comun, cierto personanan intelectual a trata na demostrá cu ta existí un relacion entre filosofia griego i e berdad revelá di Bijbel. E buki A History of Christianity (Un Historia di Cristianismo) ta declará: “Despues metafísiconan cristian a pinta e griegonan den e décadanan promé cu Cristo ta lucha balentemente pero ciegamente pa haña un conocimentu di Dios. Na moda di papia, e griegonan a purba laga Jesus aparecé for di nan filosofia fofo, pa inventá cristianismo for di nan cabes pagano bashí.”

Plotino (205-270 E.C.), pionero dje pensadónan ei, a desaroyá un sistema cu tabata basá principalmente riba Plato su teoria di ideanan. Plotino a introducí e concepto di un alma separá for dje curpa. Profesor E. W. Hopkins a bisa di Plotino: “Su teologia . . . tabatin hopi influencia riba e lidernan di opinion cristian.”

“Cristianismo Helenisá” i “Filosofia Cristian”

Cuminsando den siglo 2 E.C., pensadónan “cristian” a haci un esfuerso determiná pa impresioná hende intelectual pagano. Apesar cu apostel Pablo a spierta bon cla contra “papiamentu bano cu ta violá loke ta santu” i “e contradiccionnan di loke falsamente ta ser yamá ‘conocimentu,’” tog e maestronan ei a hinca den nan siñansa elementonan filosófico for dje cultura helenístico cu tabatin rond di nan. (1 Timoteo 6:20) E ehempel di Filo a parce di indicá cu lo por ta posibel pa pone Bijbel cuadra cu ideanan platónico.—Compará cu 2 Pedro 1:16.

Claro cu e berdadero víctima tabata e berdad di Bijbel. Maestronan “cristian” a purba mustra cu cristianismo tabata na armonia cu humanismo griego-romano. Clemente di Alexandria i Orígen (siglo 2 i 3 E.C.) a haci neoplatonismo e fundeshi di loke a bin bira “filosofia cristian.” Ambrosio, (339-397 E.C.), obispu di Milan, a “adkerí e educacion griego mas actualisá, tantu cristian como pagano—foral e obranan . . . dje neoplatonista pagano, Plotino.” El a trata na duna latinonan educá un version griego-romano di cristianismo. Agustin a sigui su ehempel.

Un siglo despues, Dionisio e areopagita (kende su bijnaam mes tambe tabata Dionisio), probablemente un mónik sirio, a purba uni filosofia neoplatónico cu teologia “cristian.” Segun un enciclopedia, su “skirbimentunan a establecé un tendencia neoplatónico definí den un segmento grandi di doctrina i spiritualidad cristian di Edad Media . . . cu a determiná facetanan di [e doctrina] su caracter religioso i di debocion te awe.” Ki un menosprecio flagrante di apostel Pablo su spiertamentu contra “e filosofia i engaño bano segun e tradicion di hende”!—Colosensenan 2:8.

Contaminadónan Corupto

Un buki a comentá cu “platonistanan cristian a duna mas importancia na revelacion i a mira filosofia platónico como e mihó instrumento disponibel pa comprendé i defendé e siñansanan dje Scritura i di tradicion di iglesia.”

Plato mes tabata convencí cu ta existí un alma inmortal. Ta notabel cu un dje siñansanan falsu mas prominente cu a gatia drenta teologia “cristian” ta esun di inmortalidad di alma. No por hustificá aceptacion dje siñansa aki riba e base cu dor di haci esei, cristianismo a bira mas atractivo p’e masa. Ora apostel Pablo tabata predicá na Aténas, e curason di cultura griego, e no a siña e doctrina platónico di alma. Mas bien, el a predicá e doctrina cristian di resureccion, maske hopi di su oyentenan griego a haña loke el a bisa difícil pa aceptá.—Echonan 17:22-32.

Contrario na filosofia griego, e Scritura ta mustra claramente cu un persona no tin un alma, sino cu e mes ta un alma. (Génesis 2:7) Ora e persona muri, e alma ta stop di existí. (Ezekiel 18:4) Eclesiástes 9:5 ta bisa nos: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto, tampoco nan no tin salario mas, pasobra e recuerdo di nan a ser lubidá.” Bo no ta haña e doctrina di inmortalidad di alma den Bijbel.

Un otro siñansa engañoso tabatin di haber cu e posicion di Jesus promé cu el a bira hende. E nocion ta cu e tabata igual cu su Tata. E buki The Church of the First Three Centuries (E Iglesia dje Promé Tres Siglonan) ta splica: “E doctrina di Trinidad . . . a originá di un fuente henteramente aheno for di esun dje Scritura hudiu i cristian.” Cua tabata e fuente ei? E doctrina a “crece i a ser di enter den cristianismo mediante e Tatanan [di Iglesia] influenciá dor dje doctrina di Plato.”

Sí, segun cu tempu tabata pasa i neoplatonismo tabatin mas i mas influencia riba e Tatanan di Iglesia, e defensornan di Trinidad a gana tereno. Aparentemente, filosofia neoplatónico di siglo 3 a permití nan reconciliá loke ta ireconciliabel, esta, haci un Dios formá di tres persona parce un solo Dios. Cu razonamentu filosófico nan a pretendé cu tres persona por ta un solo Dios aunke cada un ta keda cu nan individualidad!

Sin embargo, e berdad di Bijbel ta mustra bon cla cu Jehova so ta Dios Todopoderoso, cu Jesucristo ta Su Yu creá inferior cuné, i cu spiritu santu ta Su forsa activo. (Deuteronomio 6:4; Isaías 45:5; Echonan 2:4; Colosensenan 1:15; Revelacion 3:14) E doctrina di Trinidad ta desonrá e único Dios berdadero i ta confundí hende i alehá nan for di un Dios cu nan no por comprendé.

Un víctima mas dje influencia neoplatónico riba pensamentu cristian tabata e speransa di mil aña basá riba e Scritura. (Revelacion 20:4-6) Orígen tabata conocí pa a condená esnan cu ta kere den e mil aña. Pakico e tabata asina contra e doctrina bíblico bon fundá aki di Cristo su gobiernu di mil aña? The Catholic Encyclopedia ta contestá: “En bista dje neoplatonismo riba cua su doctrinanan tabata fundá . . . , [Orígen] no por a uni su mes cu esnan cu ta kere den e mil aña.”

E Berdad

Ningun dje desaroyonan mencioná ariba tabatin di haber cu e berdad. E berdad aki ta henter e cuerpo di siñansa cristian manera e ta ser hañá den Bijbel. (2 Corintionan 4:2; Tito 1:1, 14; 2 Juan 1-4) Bijbel ta e único fuente di berdad.—Juan 17:17; 2 Timoteo 3:16.

Sin embargo, e enemigu di Jehova, di e berdad, di humanidad i di bida eterno—Satanas e Diabel, e “matadó” i e “tata di mentira”—a usa un variedad di manera mañoso pa contaminá e berdad ei. (Juan 8:44; compará cu 2 Corintionan 11:3.) E siñansanan di filósofo griego pagano—eigenlijk un refleho di su mes manera di pensa—ta entre e hermentnan mas poderoso cu el a usa den su esfuerso pa cambia e contenido i caracter di siñansanan cristian.

E mescla innatural aki di siñansa cristian cu filosofia griego ta un intento pa larga e berdad di Bijbel, pa debilitá su forsa i hacié ménos atractivo pa buscadónan dje berdad cu ta mansu, sincero i cla pa siña. (1 Corintionan 3:1, 2, 19, 20) Tambe e tin tendencia di mancha e puresa di doctrina bíblico cu ta cla manera cristal, dor di hacié difícil pa distinguí e berdad for di falsedad claramente.

Awe, bou di direccion di e Cabes dje congregacion, Jesucristo, a restorá siñansa cristian berdadero. Tambe, buscadónan sincero dje berdad por identificá e congregacion cristian berdadero fácilmente na su frutanan. (Mateo 7:16, 20) Testigonan di Jehova ta dispuesto i ansioso pa yuda hende asina haña e awa puru dje berdad i yuda nan haña un gara firme riba e herencia di bida eterno cu nos Tata, Jehova, ta ofrecé.—Juan 4:14; 1 Timoteo 6:19.

[Nota]

[Plachi na página 11]

Agustin

[Rekonosementu pa Potrèt na página 10]

Texto griego: For dje buki Ancient Greek Writers: Plato’s Phaedo, 1957, Ioannis N. Zacharopoulos, Athens; Plato: Musei Capitolini, Roma