Capitulo Un

Abo i e Buki di Daniel

1, 2. (a) Cua ta algun situacion poco comun cu e buki bíblico di Daniel ta presentá? (b) Den nos tempu actual, ki preguntanan ta lanta relacioná cu e buki di Daniel?

UN REY poderoso ta menasá di ehecutá su sabionan, pasobra nan no por revelá i interpretá su soño misterioso. Ta tira tres homber hóben cu ta nenga di adorá un imágen haltu, den un fornu extra cayente, i tog nan ta sobrebibí. Meimei di un fiesta, cientos di persona ta mira un man skirbi palabranan misterioso riba muraya di un palacio. Algun homber malicioso ta conspirá pa laga benta un homber bieu den un cueba di leon, pero e ta sali ileso. Un profeta di Dios ta mira cuater bestia den un vision, i nan tin nificacion profético pa miles di aña den futuro.

² Esakinan ta djis un par dje relatonan cu tin den e buki bíblico di Daniel. Mester tuma nan na serio? Kico relevante e buki aki di siglonan bieu por tin pa nos dia? Pakico nos mester ta interesá den sucesonan cu a tuma lugá un 2.600 aña pasá?

DANIEL—UN BUKI ANTIGUO PA TEMPU MODERNO

3, 4. Pakico hopi hende tin bon motibu pa ta preocupá tocante e futuro di humanidad?

³ Mayor parti dje buki di Daniel ta enfocá riba e tema di gobernacion mundial, un tema cu ta di sumo interes awe. Casi tur hende lo bai di acuerdo cu nos ta biba den tempu difícil. Tur dia, reportahenan ta bombardiá nos cu noticianan tristu cu ta haci nos realisá cu berdad e sociedad humano ta bezig ta sink den un pos yen di problema confundidor, i tur esaki apesar di logronan remarcabel riba tereno di ciencia i tecnologia.

⁴ Pensa riba esaki: Hende a cana riba luna, pero na hopi lugá riba su mes planeta, e no por cana riba caya sin miedu. E por yena un cas cu tur sorto di comodidad moderno, pero e no por para e ola di famianan kibrá. I e por trece e era di informacion, pero e no por siña hende con pa biba na pas cu otro. Hugh Thomas, profesor di historia, a yega di skirbi: “E plamamentu di conocimentu i educacion a siña humanidad masha poco tocante dominio propio i ménos tocante e arte di biba bon cu otro hende.”

5. Kico tabata den mayoria caso e resultado di gobernacion den man di hende?

⁵ Den un intento pa establecé un midí di órden den sociedad, hende a organisá nan mes bou di un gran variedad di gobiernu. Sin embargo, ningun di nan tabata un excepcion pa loke ta e veracidad dje comentario aki di rey Sálomon: “Hende a dominá hende pa su perhuicio.” (Eclesiástes 4:1; 8:9) Naturalmente, tabatin algun gobernante cu idealnan noble. No obstante, ningun rey, presidente ni dictador no por eradicá malesa i morto. Ningun hende no por restorá nos tera na Dios su propósito p’e, esta, un Paradijs.

6. Pakico Jehova no tin mester di cooperacion di gobiernunan humano pa efectuá su boluntad?

⁶ Sin embargo, e Creador ta dispuesto i tambe capas pa haci e cosnan ei. E no tin mester di permit di gobiernunan humano pa efectuá su propósito, pasobra p’e “e nacionnan ta manera un gota for di un hember; i ta considerá nan manera e capa fini di stòf riba e balansa.” (Isaías 40:15) Sí, Jehova ta e Gobernante Soberano dje universo. Como tal, su autoridad ta muchu mas haltu cu gobiernunan humano. Ta e Reino di Dios lo reemplasá tur gobernacion humano, p’e bendicion eterno di humanidad. Kisas no tin nada cu ta haci esaki mas cla cu e buki bíblico di Daniel.

DANIEL—MASHA STIMÁ PA DIOS

7. Ken Daniel tabata, i con Jehova a mir’é?

⁷ Jehova Dios tabatin masha cariño pa Daniel, kende a sirbi como su profeta pa hopi aña. Realmente, e angel di Dios a describí Daniel como “un persona masha deseabel.” (Daniel 9:23) E palabra na hebreo original traducí como “un persona masha deseabel,” por nificá “masha stimá,” “sumamente apreciá,” asta “un faborito.” Daniel tabata specialmente precioso den bista di Dios.

8. Con Daniel a bin resultá na Babilonia?

⁸ Laga nos repasá e circunstancianan único dje profeta stimá aki brevemente. Na aña 618 P.E.C., rey Nabucodonosor di Babilonia a sitia Jerusalem. (Daniel 1:1) Djis despues di esei, a obligá cierto hóbennan hudiu bon educá bai den exilio na Babilonia. Daniel tabata entre nan. Na e tempu ei, e tabata probablemente un tiener.

9. Ki entrenamentu Daniel i su compañeronan hebreo a haña?

⁹ Daniel i su compañeronan Hananías, Misael i Azarías tabata entre e hebreonan scogí pa ricibí un entrenamentu di tres aña den “e forma di skirbi i lenga dje caldeonan.” (Daniel 1:3, 4) Algun erudito ta bisa cu probablemente esaki tabata mas cu djis un curso di idioma. Por ehempel, profesor C. F. Keil ta declará: “Mester a educá Daniel i su compañeronan den e sabiduria dje sacerdote i sabionan di Caldea, loke e scolnan di Babilonia a siña.” Pues, a entrená Daniel i su compañeronan specialmente pa traha den gobiernu.

10, 11. Ki desafionan Daniel i su compañeronan a enfrentá, i ki yudansa Jehova a duna nan?

¹⁰ Ki un cambio drástico esaki tabata pa Daniel i su socionan! Na Huda nan a biba entre adoradónan di Jehova. Awor nan a haña nan rondoná di hende cu a adorá dios i diosanan di mitologia. Tog, esei no a intimidá e hóbennan Daniel, Hananías, Misael i Azarías. Apesar dje situacion aki cu a pone nan fe na prueba, nan tabata decididu pa tene duru na adoracion berdadero.

¹¹ Esaki lo no tabata fácil. Rey Nabucodonosor tabata un gran deboto di Marduk, e dios principal di Babilonia. Tabatin biaha cu e exigencianan dje rey tabata totalmente inaceptabel pa un adoradó di Jehova. (Pa un ehempel, lesa Daniel 3:1-7.) Sin embargo, Daniel i su compañeronan tabatin Jehova su guia infalibel. Durante nan tres añanan di entrenamentu, Dios a bendicioná nan cu “conocimentu i perspicacia den tur skirbimentu i sabiduria.” Ademas, Dios a duna Daniel e abilidad pa comprendé e nificacion di vision i soñonan. Despues ora rey a examiná e cuater hóbennan aki, el a haña nan “dies biaha mas mihó cu tur e sacerdotenan practicadó di magia i tovenarnan cu tabatin den henter su region real.”—Daniel 1:17, 20.

DANIEL TA PROCLAMA MENSAHENAN DI DIOS

12. Ki asignacion special Daniel tabatin?

¹² Durante e hopi añanan cu el a pasa na Babilonia, Daniel a sirbi como mensahero di Dios pa hombernan manera rey Nabucodonosor i rey Bélsasar. Daniel su asignacion tabata unu crucial. Jehova a usa Nabucodonosor como Su instrumento, i a permitié destruí Jerusalem. Cu tempu, lo a destruí Babilonia tambe. E buki di Daniel en berdad ta engrandecé Jehova Dios como e Haltísimo i e Gobernante den “e reino di humanidad.”—Daniel 4:17.

13, 14. Kico a pasa cu Daniel despues dje caida di Babilonia?

¹³ Daniel a sigui den servicio real un shete década, te n’e caida di Babilonia. E tabata na bida pa mira hopi hudiu regresá nan patria na aña 537 P.E.C., maske Bijbel no ta bisa cu el a compañá nan. E tabata masha activo te cu por lo ménos e tercer aña dje reinado di rey Ciro, fundadó dje Imperio Perso. Pa e tempu ei, Daniel mester tabata cerca di haci 100 aña di edad!

¹⁴ Despues dje caida di Babilonia, Daniel a skirbi e sucesonan mas significativo di su bida. Awor su documento ta un parti remarcabel dje Bijbel Santu i ta conocí como e buki di Daniel. Pero, pakico nos mester presta atencion n’e buki antiguo aki?

DOS ELEMENTO, UN MENSAHE

15. (a) Cua dos elemento e buki bíblico di Daniel ta contené? (b) Con e parti di naracion di Daniel por beneficiá nos?

¹⁵ E buki único di Daniel ta contené dos elemento masha distinto: unu ta naracion i e otro ta profecia. Tur dos aspecto dje buki di Daniel por edificá nos fe. Con? E partinan di naracion—entre esnan mas bibu den Bijbel—ta mustra nos cu Jehova Dios lo bendicioná i percurá pa esnan cu ta warda nan integridad na dje. Daniel i su tres compañeronan a keda firme apesar di pruebanan cu a pone nan bida na peliger. Awe, un estudio cuidadoso di nan ehempel lo fortalecé tur hende cu kier keda leal na Jehova.

16. Ki les nos ta siña for dje partinan profético di Daniel?

¹⁶ E partinan profético di Daniel ta edificá fe dor cu nan ta mustra cu Jehova conocé e curso di historia cientos di aña—asta miles di aña—di antemano. Por ehempel, Daniel ta duna detayenan relacioná cu e subida i caida di potencianan mundial for dje tempu di Babilonia di antigwedad te cu “e tempu di fin.” (Daniel 12:4) Daniel ta dirigí nos atencion n’e Reino di Dios den man di Su Rey nombrá i “santunan” socio, señalando na dje como e gobiernu cu lo dura pa semper. E gobiernu aki lo cumpli plenamente cu Jehova su propósito pa nos tera i lo resultá den e bendicion di tur esnan cu kier sirbi Dios.—Daniel 2:44; 7:13, 14, 22.

17, 18. (a) Con un examinacion cuidadoso dje buki di Daniel lo fortalecé nos fe? (b) Ki asuntu nos tin cu trata promé cu nos cuminsá cu un studio dje buki bíblico profético aki?

¹⁷ Afortunadamente, Jehova no ta tene conocimentu di futuro sucesonan pa su mes. Mas bien, e ta e “Revelador di secreto.” (Daniel 2:28) Segun nos ta considerá cumplimentu dje profecianan registrá den e buki di Daniel, esei lo fortalecé nos fe den e promesanan di Dios. Nos lo ta mas convencí cu nunca, cu Dios lo efectuá su propósito precis n’e tempu i manera cu e kier.

¹⁸ Fe di tur hende cu studia e buki bíblico di Daniel cu un curason receptivo, lo crece. Pero, promé cu nos cuminsá cu un examinacion profundo dje buki aki, nos tin cu considerá evidencia pa wak si e buki aki ta realmente auténtico. Algun crítico a atacá e buki di Daniel, bisando cu en realidad su profecianan tabata skirbí despues di nan cumplimentu. E pretensionnan di sképticonan ta válido? E siguiente capítulo lo trata e asuntu aki.

KICO BO A SACA AFO?

• Pakico Daniel ta un buki pa tempu actual?

• Con bin Daniel i su compañeronan a haña nan den servicio di gobiernu di Babilonia?

• Kico tabata Daniel su asignacion special na Babilonia?

• Pakico nos mester presta atencion na e profecia di Daniel?

[Plachi di henter página 4]

[Plachi di henter página 11]