Capitulo Diesocho

Jehova Ta Primintí Daniel un Recompensa Maraviyoso

1, 2. (a) Ki cualidad importante un coredó tin mester pa por tin éxito? (b) Con apostel Pablo a compará un bida di fieldad den Jehova su sirbishi cu un careda?

UN COREDO ta forsa pa yega e meta final. E ta casi agotá, pero cu su meta na bista, e ta hinca tur su energia den e último stapnan ei. Por fin, forsando delaster un músculo, e ta crusa e liña! Su cara ta reflehá alivio i triunfo. Dor di perseverá te na fin, el a logra.

² Na conclusion di Daniel capítulo 12, nos ta haña e profeta stimá ta acercá e final di su propio “careda”—su bida di sirbishi na Jehova. Despues di cita vários ehempel di fe entre Jehova su sirbidónan pre-cristian, apostel Pablo a skirbi: “Pues anto, dor cu nos tin un nubia asina grandi di testigo rond di nos, laga nos tambe kita tur carga i e picá cu fácilmente ta coge nos den trampa, i laga nos core e careda cu ta poné dilanti nos cu awante, miéntras nos ta mira atentamente n’e Agente Principal i Perfeccionador di nos fe, Jesus. P’e goso cu a ser poné su dilanti el a wanta un staca di tormento, despreciando bergwensa, i a sinta na man drechi dje trono di Dios.”—Hebreonan 12:1, 2.

3. (a) Kico a motivá Daniel pa “core cu awante”? (b) Kico ta e tres cosnan cu e angel di Jehova a bisa Daniel?

³ Daniel tabata entre e ‘nubia grandi ei di testigo.’ E sigur tabata unu cu mester a “core cu awante,” i su amor profundo pa Dios a motiv’é pa haci esei. Jehova a revelá na Daniel hopi cos tocante e futuro di gobiernunan mundial, pero awor El a manda e animacion personal aki p’e: “Pa loke ta abo mes, bai na e fin; i lo bo sosegá, pero lo bo lanta para pa bo porcion na fin dje dianan.” (Daniel 12:13) Ta tres cos e angel di Jehova a bisa Daniel: (1) cu Daniel mester a “bai na e fin,” (2) cu lo e “sosegá” i (3) cu lo e “lanta para” atrobe den futuro. Con e palabranan aki por animá cristiannan djawe pa wanta te na e meta final den e careda pa bida?

“BAI NA E FIN”

4. Kico e angel di Jehova tabata kier men dor di bisa “bai na e fin,” i di con esaki lo por tabata un tiki difícil pa Daniel?

⁴ Kico e angel tabata kier men ora el a bisa Daniel: “Pa loke ta abo mes, bai na e fin”? Fin di kico? Wel, como cu Daniel tabatin casi 100 aña di edad, aparentemente esaki a referí na fin di su propio bida, cu probablemente tabata masha cerca.a E angel tabata urgi Daniel pa wanta fiel te na morto. Pero esei no necesariamente lo tabata fácil. Daniel a mira conkista di Babilonia i un resto dje exiliadonan hudiu regresá Huda i Jerusalem. Esei mester a haci e profeta di edad hopi contentu. Sin embargo, no tin ningun registro cu ta mustra cu el a participá den e biahe pisá ei. Por ta masha bon cu p’e tempu ei e tabata muchu bieu i débil. Of kisas tabata Jehova su boluntad p’e keda na Babilonia. Di tur manera, bo no por keda sin puntra bo mes si Daniel no a sinti un poco nostalgia ora el a mira su paisanonan sali pa Huda.

5. Ki indicacion tin cu Daniel a wanta te na fin?

⁵ Sin duda, Daniel a saca hopi fortalesa for dje declaracion bondadoso dje angel: “Bai na e fin.” Esaki por pone nos corda e palabranan cu Jesucristo a papia un seis siglo despues: “Esun cu a wanta te na fin ta esun cu lo ser salbá.” (Mateo 24:13) No tin duda cu ta esaki Daniel a haci. El a wanta te na fin, coriendo e careda pa bida fielmente te na final. Esei por ta un motibu pakico mas despues e Palabra di Dios ta papia bon di dje. (Hebreonan 11:32, 33) Kico a capacitá Daniel pa wanta te na fin? E registro di su bida ta yuda nos haña e contesta.

EL A PERSEVERA COMO STUDIANTE DJE PALABRA DI DIOS

6. Con nos sa cu Daniel tabata un studiante diligente dje Palabra di Dios?

⁶ Pa Daniel, wanta te na fin a encerá sigui studia i meditá profundamente riba Dios su promesanan excitante. Nos sa cu Daniel tabata un studiante deboto dje Palabra di Dios. Si no, con lo e por tabata sa di Jehova su promesa na Jeremías cu e exilio lo a dura 70 aña? Daniel mes a skirbi: “Ami . . . a dicerní mediante e bukinan e cantidad di aña.” (Daniel 9:2; Jeremías 25:11, 12) Sin duda, Daniel a busca pa haña e bukinan dje Palabra di Dios cu tabata existí e tempu ei. E obranan skirbí di Moises, David, Sálomon, Isaías, Jeremías, Ezekiel—loke sea tabatin disponibel—sigur a duna Daniel hopi ora dushi di lesamentu i meditacion.

7. Ora nos compará nos tempu cu esun di Daniel, ki bentahanan nos tin ora di studia e Palabra di Dios?

⁷ Pa nos cultivá awante awe, ta vital pa nos studia e Palabra di Dios i keda absorbá den dje. (Romanonan 15:4-6; 1 Timoteo 4:15) I nos tin e Bijbel completo, cu ta contené e registro skirbí dje manera cu algun profecia di Daniel a cumpli siglonan despues. Ademas, nos ta bendicioná di ta biba durante “e tempu di fin,” pronosticá na Daniel 12:4. Den nos tempu mes, e ungínan a ser bendicioná cu perspicacia spiritual, i nan ta briya manera lusnan grandi dje berdad den e mundu scur aki. Como resultado, hopi dje profecianan profundo den e buki di Daniel, di cua algun a confundí asta Daniel mes, ta yen di nificacion pa nos awe. P’esei, laga nos sigui studia e Palabra di Dios tur dia, i no mira e cosnan aki nunca como di poco importancia. Esei lo yuda nos wanta.

DANIEL A PERSEVERA DEN ORACION

8. Ki ehempel Daniel a pone den e asuntu di oracion?

⁸ Oracion tambe a yuda Daniel wanta te na fin. Tur dia, cu un curason yen di fe i confiansa, e tabata acudí na Jehova Dios i a papia cuné abiertamente. E tabata sa cu Jehova ta e “Tendedor di oracion.” (Salmo 65:2; compará cu Hebreonan 11:6.) Ora Daniel su curason tabata cargá cu pena debí na e caminda rebelde cu Israel a sigui, el a deshogá su mes cerca Jehova. (Daniel 9:4-19) Asta ora Dario a decretá cu ta na dje so mester haci peticion pa 30 dia, Daniel no a laga esei stop e di haci oracion na Jehova Dios. (Daniel 6:10) Nos curason no ta keda conmoví ora nos visualisá e fiel homber bieu ei cu a preferá di enfrentá un cueba yen di leon, cu renunciá e privilegio precioso di oracion? No por tin ningun duda cu Daniel a bai na su fin fielmente, haciendo oracion ferviente na Jehova tur dia.

9. Pakico nunca nos no mag trata e privilegio di oracion como di poco importancia?

⁹ Oracion ta un acto simpel. Nos por haci oracion na casi cualkier ora i cualkier caminda, na bos haltu of den nos mes. Sin embargo, nunca nos no mag trata e privilegio precioso aki como di poco importancia. Bijbel ta conectá oracion cu awante, perseverancia i cu keda lantá spiritualmente. (Lucas 18:1; Romanonan 12:12; Efesionan 6:18; Colosensenan 4:2) No ta algu remarcabel cu nos tin un canal di comunicacion liber i habrí cu e personahe mas haltu den universo? I e ta scucha! Corda e ocasion ora cu Daniel a haci oracion, i como contesta Jehova a manda un angel. E angel a yega miéntras Daniel tabata haci oracion ainda! (Daniel 9:20, 21) Kisas nos no ta biba awor den e era di ricibí tal bishitanan di angel, pero Jehova no a cambia. (Malakías 3:6) Mescos cu el a tende e oracion di Daniel, lo e scucha esun di nos. I segun cu nos ta haci oracion, nos lo hala mas cerca di Jehova, i forma un banchi cu lo yuda nos wanta te na fin, mescos cu Daniel.

EL A PERSEVERA COMO MAESTRO DJE PALABRA DI DIOS

10. Pakico tabata importante pa Daniel p’e siña otronan e berdad dje Palabra di Dios?

¹⁰ Daniel tabatin cu “bai na e fin” den un otro sentido tambe. E tabatin cu perseverá como maestro dje berdad. E no a lubidá nunca cu e tabata parti dje pueblo scogí di cua e Scritura a bisa: “‘Boso ta mi testigonan,’ ta e expresion di Jehova, ‘asta mi sirbidó kende mi a scoge.’” (Isaías 43:10) Daniel a haci tur loke e tabata por pa cumpli cu e comision ei. Probablemente su trabou a encerá siña su mes pueblo cu tabata exiliá na Babilonia. Nos sa masha tiki di su trato cu e otro hudiunan, cu excepcion di su coneccion cu e tresnan cu Bijbel ta yama “su compañeronan”: Hananías, Misael i Azarías. (Daniel 1:7; 2:13, 17, 18) Sigur nan amistad cerá a yuda nan cada un hopi pa wanta. (Proverbionan 17:17) Daniel, bendicioná pa Jehova cu perspicacia special, tabatin hopi di siña su amigunan. (Daniel 1:17) Pero tambe e tabatin otro trabou di siña.

11. (a) Kico tabata algu único dje trabou di Daniel? (b) Con eficas Daniel tabata den efectuá su asignacion inusual?

¹¹ Mas cu cualkier otro profeta, Daniel tabatin e trabou di duna testimonio na dignatarionan gentil. Aunke hopi bes e mester a entregá mensahenan impopular, e no a trata e gobernantenan aki como si fuera nan tabata repugnante of den un manera of otro inferior cuné. El a papia cu nan cu respet i bon abilidad. Tabatin algun hende—manera e sátrapanan yalurs i mañoso—cu kier a caba cu Daniel. Sin embargo, otro dignatarionan a siña respet’é. Debí cu Jehova a capacitá Daniel pa splica secretonan cu a confundí rey i sabionan, e profeta a ricibí gran prominencia. (Daniel 2:47, 48; 5:29) Ta berdad cu segun su edad a subi, e no por tabata mes activo cu den su hubentud. Pero sigur el a bai na su fin, fiel ainda ta busca cualkier manera cu lo e por a sirbi como un testigo di su Dios stimá.

12. (a) Den ki actividad di siña nos como cristian ta participá awe? (b) Con nos por aplicá Pablo su conseho pa “sigui cana den sabiduria pa cu esnan di pafó”?

¹² Awe den e congregacion cristian, nos ta haña hopi compañero fiel cu lo yuda nos wanta, mescos cu Daniel i su tres socionan un a yuda otro. Nos tambe un ta siña otro, percurando “un intercambio di estímulo.” (Romanonan 1:11, 12) Mescos cu Daniel, nos tin un comision pa duna testimonio na incrédulonan. (Mateo 24:14; 28:19, 20) P’esei, nos tin cu mehorá nos abilidadnan, pa asina nos ‘manehá e palabra dje berdad corectamente’ ora di papia cu hende tocante Jehova. (2 Timoteo 2:15) Loke tambe lo yuda ta si nos obedecé e conseho di apostel Pablo: “Sigui cana den sabiduria pa cu esnan di pafó.” (Colosensenan 4:5) E sabiduria ei ta encerá un punto di bista balansá di esnan cu tin otro creencia. Nos no ta menospreciá hende asina, i considerá nos mes como superior. (1 Pedro 3:15) Mas bien, nos ta busca pa atraé nan n’e berdad dor di usa e Palabra di Dios ábilmente i cu tacto, pa asina yega na nan curason. Ora nos logra yega na curason di un hende, esta un goso esaki ta duna nos! Tal goso sigur ta yuda nos wanta te na fin, mescos Daniel.

“LO BO SOSEGA”

13, 14. Di con e prospecto di muri a spanta hopi babilonio, i ki punto di bista distinto Daniel tabatin?

¹³ Siguientemente e angel a sigurá Daniel: “Lo bo sosegá.” (Daniel 12:13) Kico e palabranan ei a nificá? Wel, Daniel tabata sa cu morto ta sper’é. Morto ta e fin inevitabel pa tur hende, for di tempu di Adam te cu awor. Aptamente Bijbel ta yama morto un “enemigu.” (1 Corintionan 15:26) Sin embargo, pa Daniel e prospecto di muri a nificá algu hopi distinto for di loke el a nificá pa e babilonionan tur rond di dje. Pa nan, cu tabata profundamente enbolbí den adoracion complicá di un 4.000 dios falsu, morto a contené tur clase di cos spantoso. Nan a kere cu despues di morto, hende cu a biba infelis of cu a muri den un forma violento, lo a bira spiritu vengativo cu a spanta hende bibu. Tambe e babilonionan a kere den un mundu spantoso den e mas ayá, habitá pa monsternan horibel cu curpa di hende i di bestia.

¹⁴ Pa Daniel, morto no a nificá ningun dje cosnan ei. Cientos di aña promé cu su tempu, rey Sálomon a bisa bou di inspiracion divino: “En cuanto e mortonan, nan no ta conciente di nada en absoluto.” (Eclesiástes 9:5) I relacioná cu e persona cu muri, e salmista a canta: “Su spiritu ta sali, e ta bolbe na su suela; den e dia ei su pensamentunan en berdad ta perecé.” (Salmo 146:4) Pues Daniel tabata sa cu e palabranan cu e angel a bis’é lo resultá cierto. Morto a nificá sosiegu. Ningun pensamentu, ningun lamento amargo, ningun tormento, i sigur ningun monster. Jesucristo a usa palabranan similar ora Lázaro a muri. El a bisa: “Lázaro nos amigu a bai sosegá.”—Juan 11:11.

15. Con e dia di morto por ta mihó cu e dia di nacementu?

¹⁵ Considerá un otro motibu pakico e prospecto di muri no tabata algu spantoso pa Daniel. E Palabra di Dios ta bisa: “Un nomber ta mihó cu bon zeta, i e dia di morto ta mihó cu e dia cu un hende nace.” (Eclesiástes 7:1) Con por ta cu e dia di morto, sigur un ocasion di tristesa profundo, ta mihó cu e dia gososo di nacementu? E clave ta den e “nomber.” “Bon zeta” por tabata masha costoso mes. Un biaha Maria, ruman muher di Lázaro, a hunta Jesus su pianan cu zeta perfumá cu tabata costa casi mes tantu cu e salario di un aña! (Juan 12:1-7) Con un nomber por ta asina precioso? Na Eclesiástes 7:1, e Septuaginta na griego ta bisa, “un bon nomber.” Loke ta asina balioso no ta djis e nomber, sino loke e nomber ta representá. Ora un hende nace, e no tin ningun reputacion, no ta existí ningun registro di obranan excelente, ningun grato recuerdo dje personalidad i cualidadnan di esun cu ta carga e nomber. Pero na fin di un hende su bida, e nomber ta nificá tur e cosnan aki. I si desde e punto di bista di Dios e ta un bon nomber, e ta hopi mas precioso cu cualkier posesion material hamas lo por ta.

16. (a) Con Daniel a haci esfuerso pa traha un bon nomber cerca Dios? (b) Di con Daniel por a bai sosegá cu pleno confiansa cu el a logra traha un bon nomber cerca Jehova?

¹⁶ Atrabes di henter su bida, Daniel a haci tur loke tabata den su poder pa traha un bon nomber cerca Dios, i nada di esaki no a scapa Jehova su atencion. El a vigilá Daniel i a examiná su curason. Dios a haci mescos cu rey David tambe, kende a canta: “O Jehova, bo a scudriñá mi completamente, i bo conocé mi. Bo mes a yega di conocé mi sintamentu i mi lantamentu. Bo a considerá mi pensamentu for di leu.” (Salmo 139:1, 2) Ta berdad cu Daniel no tabata perfecto. E tabata un desendiente dje pecadó Adam, i miembro di un nacion pecaminoso. (Romanonan 3:23) Pero Daniel a repentí di su picánan i a sigui purba cana cu su Dios den un manera recto. P’esei e fiel profeta por tabatin confiansa cu Jehova lo a pordoná su picánan i lo no a tene nan na curason. (Salmo 103:10-14; Isaías 1:18) Jehova ta scoge pa corda e bon obranan di su sirbidónan fiel. (Hebreonan 6:10) P’esei, dos biaha e angel di Jehova a yama Daniel un “homber masha deseabel.” (Daniel 10:11, 19) Esaki a nificá cu Daniel tabata un ser kerí di Dios. Daniel por a bai sosegá satisfecho, sabiendo cu el a traha un bon nomber cerca Jehova.

17. Pakico ta urgente pa nos traha un bon nomber cerca Jehova awe?

¹⁷ Nos cada un ta haci bon di puntra nos mes: ‘Ami a traha un bon nomber cerca Jehova?’ Nos ta biba den tempu difícil. Nos mester reconocé cu cualkier momento morto por cai riba cualkier un di nos. Esei no ta un pensamentu abnormalmente pesimista, sino simplemente realístico. (Eclesiástes 9:11) Ki vital ta anto, pa nos cada un keda decididu pa traha un bon nomber cerca Dios awor aki mes, sin tarda. Si nos haci esei, nos no tin nodi tin miedu di morto. E ta djis un sosiegu, mescos cu soño. I mescos cu soño, despues bo ta lanta!

“LO BO LANTA PARA”

18, 19. (a) Kico e angel tabata kier men ora el a pronosticá cu Daniel lo “lanta para” den futuro? (b) Di con Daniel lo mester tabata conocí cu e speransa di resureccion?

¹⁸ E buki di Daniel ta cera cu un dje promesanan mas bunita cu Dios a yega di duna un hende. E angel di Jehova a bisa Daniel: “Lo bo lanta para pa bo porcion na fin dje dianan.” Kico e angel tabata kier men? Wel, ya cu e ‘sosiegu’ cu el a caba di referí na dje tabata morto, e promesa cu Daniel lo a “lanta para” na un tempu den futuro, por kier men un solo cos: resureccion!b Echo ta cu algun erudito a afirmá cu Daniel capítulo 12 ta contené e promé referencia explícito na resureccion den e Scritura Hebreo. (Daniel 12:2) Sin embargo, nan ta ekibocá den esaki. Daniel tabata bon conocí cu e speransa di resureccion.

¹⁹ Por ehempel, no tin duda cu Daniel a conocé e palabranan aki cu Isaías a registrá dos siglo promé: “Bo mortonan lo biba. Un cadaver di mi—nan lo lanta. Spierta i sclama cu goso, boso cu ta biba den stòf! Pasobra . . . e tera mes lo laga asta esnan impotente den morto sali cai manera den nacementu.” (Isaías 26:19) Hopi tempu promé cu esei, Jehova a duna Elías i Eliseo poder pa berdaderamente efectuá resureccion. (1 Reynan 17:17-24; 2 Reynan 4:32-37) Asta mas promé, Hana, mama di profeta Samuel, a reconocé cu Jehova por lanta hende for di Sheol, e graf. (1 Samuel 2:6) Asta mas promé ainda, fiel Job a expresá su mes speransa cu e palabranan aki: “Si un homber físicamente fuerte muri, e por biba atrobe? Tur e dianan di mi sirbishi obligatorio lo mi spera, te ora mi relevo yega. Lo bo yama, i mi mes lo contestá bo. Pa e obra di bo mannan lo bo sinti un anhelo.”—Job 14:14, 15.

20, 21. (a) Den cua resureccion Daniel lo tin parti sigur? (b) Den ki manera e resureccion den Paradijs probablemente lo tuma lugá?

²⁰ Mescos cu Job, Daniel tabatin motibu pa tene confiansa cu Jehova en realidad tabata anhelá pa trec’é bek na bida un dia den futuro. Tog, lo mester tabata un gran consuelo pa tende un criatura spiritual poderoso confirmá e speransa ei. Sí, Daniel lo lanta para den “e resureccion dje hustunan,” cua lo tuma lugá durante Cristo su Reinado di Mil Aña. (Lucas 14:14) Con esei lo ta pa Daniel? E Palabra di Dios ta conta nos hopi tocante esei.

²¹ Jehova “no ta un Dios di desordu, sino di pas.” (1 Corintionan 14:33) Ta evidente anto, cu e resureccion den Paradijs lo tuma lugá den un manera ordená. Kisas esei lo ta poco tempu despues di Armagedon. (Revelacion 16:14, 16) Lo a eliminá tur rastro dje sistema di cosnan bieu, i sin duda a haci preparacionnan pa ricibí e mortonan bek. Pa loke ta e órden den cua e mortonan lo bini bek, Bijbel ta ofrecé e precedente aki: “Cada un den su mes categoria.” (1 Corintionan 15:23) Ta parce probabel cu na ora dje ‘resureccion dje hustu i e inhustunan,’ lo trece e hustunan bek promé. (Echonan 24:15) Den e manera ei, hombernan fiel di pasado, manera Daniel, lo por yuda den administrá asuntunan terenal, entre otro, e dunamentu di instruccion na miles di miyones di “inhustunan” cu bolbe na bida.—Salmo 45:16.

22. Cua ta algun pregunta cu Daniel sin duda lo ta ansioso pa haña contesta pa nan?

²² Pero promé cu Daniel ta cla pa tuma tal responsabilidad, sigur lo e tin algun pregunta di haci. Al fin i al cabo, e mes a bisa relacioná cu algun dje profecianan profundo confiá na dje: “Mi a tende, pero mi no por a comprendé.” (Daniel 12:8) Ki emocioná lo e ta pa por fin comprendé e misterionan divino aki! Sin duda lo e kier tende tur cos tocante e Mesías. Daniel lo keda fasiná pa sa tocante e marcha di potencianan mundial for di su tempu te den nos tempu, tocante e identidad dje fiel “santunan dje Supremo”—kendenan a perseverá apesar di persecucion durante “e tempu di fin”—i tocante e destruccion final di tur reino humano mediante Dios su Reino Mesiánico.—Daniel 2:44; 7:22; 12:4.

DANIEL SU PORCION —I DI BO TAMBE—DEN PARADIJS!

23, 24. (a) Con e mundu cu Daniel resucitá aden lo ta distinto for di esun cu el a conocé? (b) Daniel lo tin un lugá den Paradijs? I con nos por sa?

²³ Daniel lo kier sa tocante e mundu cu lo e hañ’é aden e tempu ei, un mundu asina distinto for di esun di su tempu. Lo no tin ningun rastro di guera i opresion cu a daña e mundu cu el a conocé. Lo no tin tristesa, ni malesa, ni morto. (Isaías 25:8; 33:24) Pero sí lo tin un abundancia di cuminda, hopi bibienda i trabou satisfaciente pa tur hende. (Salmo 72:16; Isaías 65:21, 22) Humanidad lo ta un solo famia uní i felis.

²⁴ Daniel lo tin un lugá den e mundu ei sigur. “Lo bo lanta para pa bo porcion,” e angel a bis’é. E palabra hebreo traducí aki como “porcion” ta mescos cu e palabra usá pa pida tereno literal.c Por ta cu Daniel tabata conocé e profecia di Ezekiel tocante partimentu dje tera restorá di Israel. (Ezekiel 47:13–48:35) Kico e profecia di Ezekiel ta indicá pa ora cu e cumpli den Paradijs? Cu henter e pueblo di Dios lo tin un lugá den Paradijs. I cu lo asta parti e tera mes segun porcion den un manera ordená i hustu. Di mes, Daniel su porcion den Paradijs lo ta hopi mas cu pida tereno so. Lo e encerá su papel ei den e propósito di Dios. Daniel su recompensa primintí ta garantisá.

25. (a) Cua ta algun prospecto di bida den Paradijs cu ta atraé bo? (b) Di con nos por bisa cu hende ta pertenecé den Paradijs?

²⁵ Sin embargo, kico di bo porcion? E mésun promesanan por conta pa bo. Jehova kier pa hende obediente “lanta para” pa haña nan porcion, pa nan tin un lugá den Paradijs. Djis imaginá! Lo ta emocionante sigur pa topa Daniel en persona, huntu cu otro homber i muhernan fiel di tempu bíblico. Tambe lo tin un cantidad incontabel di otro hende cu lo bolbe for di morto, i cu lo tin mester di instruccion pa nan siña conocé i stima Jehova Dios. Visualisá bo mes ta cuida nos hogar terenal i ta yuda transform’é den un paradijs yen di variedad i bunitesa eterno. Pensa con lo ta pa ser siñá dor di Jehova, i siña con pa biba e manera cu e tabata kier pa hende biba. (Isaías 11:9; Juan 6:45) Sí, tin un lugá pa bo den Paradijs. Pa straño cu e palabra Paradijs por zona pa algun hende awe, corda cu originalmente Jehova a diseñá hende pa biba den un lugá asina. (Génesis 2:7-9) Den e sentido ei, Paradijs ta e habitat natural dje miyones di hendenan dje tera. Ei ta caminda nan ta pertenecé. Alcansá Paradijs lo ta mescos cu yega cas.

26. Con Jehova ta reconocé cu no ta fácil pa nos warda riba fin dje sistema aki?

²⁶ Nos curason ta salta di aprecio ora nos pensa riba tur esaki, no ta asina? Abo mes no ta anhelá pa ta ei? Nada straño anto, cu Testigonan di Jehova ta ansioso pa sa ki tempu e fin dje sistema di cosnan aki lo bin! No ta fácil pa warda. Jehova tambe ta reconocé esei, pasobra e ta urgi nos pa “keda den expectativa” dje fin, “asta si e tarda.” Jehova kier men cu for di nos punto di bista por parce cu e ta tarda, pasobra e mésun texto ei ta sigurá nos: “Lo e no ta lat.” (Habacuc 2:3; compará cu Proverbionan 13:12.) Sí, e fin lo bini precis na ora.

27. Kico bo tin cu haci pa bo por para dilanti Dios pa tur eternidad?

²⁷ Kico bo mester haci segun cu e fin ta yega cerca? Mescos cu Jehova su profeta stimá Daniel, wanta fielmente. Studia e Palabra di Dios diligentemente. Haci oracion cu fervor. Asociá cu amor cu compañeronan creyente. Siña otro hende e berdad cu celo. Siendo cu fin dje sistema di cosnan malbado aki ta yegando cada dia mas cerca, keda decididu pa ta un sirbidó leal dje Haltísimo i un fiel defensor di su Palabra. Riba tur cos, presta atencion na e profecia di Daniel! I mare e Señor Soberano Jehova duna bo e privilegio di para dilanti dje gososamente pa tur eternidad!

[Nota]

KICO BO A SACA AFO?

• Kico a yuda Daniel wanta te na fin?

• Di con e prospecto di muri no a contené nada spantoso pa Daniel?

• Con e angel su promesa di cu Daniel ‘lo lanta para pa su porcion’ lo cumpli?

• Con abo a beneficiá personalmente dor di presta atencion na e profecia di Daniel?

[Plachi di henter página 307]

[Plachi na página 318]

Mescos cu Daniel, bo ta presta atencion na Dios su palabra profético?