Métodonan Cu Nan Ta Usa pa Compartí e Bon Nobo

CRISTIANNAN a haña e mandamentu pa “haci disipel di hende di tur nacion,” pero esaki no ta nificá cu nan tin cu preshoná of forsa otro hende pa combertí. E comision cu Jesus a duna tabata pa “anunciá e bon nobo na mansunan,” pa “verband hende di curason kibrá” i pa “consolá tur esnan cu ta na luto.” (Mateo 28:19; Isaías 61:1, 2; Lucas 4:18, 19) Testigonan di Jehova ta purba haci esaki dor di declará e bon nobo di Bijbel. Mescos cu profeta Ezekiel di ántes, awe Testigonan di Jehova ta purba haña esnan “cu ta suspirá i keha debí na tur e cosnan detestabel cu ta ser hací.”—Ezekiel 9:4.

E manera mas conocí cu nan ta usa pa haña esnan cu ta afligí pa motibu dje situacion actual, ta dor di bai di cas pa cas. Pues nan ta haci un esfuerso sincero pa hiba e mensahe pa hende, mescos cu Jesus a haci ora “el a bai biahando di stad pa stad i di pueblo pa pueblo, predicando i declarando e bon nobo dje reino di Dios.” Su promé disipelnan a haci mescos. (Lucas 8:1; 9:1-6; 10:1-9) Awe, caminda ta posibel, Testigonan di Jehova ta purba bishitá cada cas vários bes pa aña, tratando di combersá cu e doño di cas pa un par di minuut riba un tópico local of internacional cu hende ta interesá aden of cu hende ta preocupá cuné. Un of dos texto di Bijbel por ser considerá, i si e doño di cas mustra interes, e Testigo por haci areglo pa bolbe bishit’é na un ora cumbiniente pa sigui cu e combersacion. Bijbel i literatura cu ta splica Bijbel ta disponibel, i si e doño di cas ta deseá, e por haña un studio di Bijbel grátis. Miyones dje studionan di Bijbel probechoso aki ta ser conducí rond mundu regularmente cu hende individual i cu famianan.

Un otro manera cu nan ta compartí “e bon nobo di reino” cu otro hende ta mediante reunionnan na Salonnan di Reino local. Tur siman Testigonan ta tene reunion einan. Un dje reunionnan ta un discurso público riba un tema di interes actual, siguí pa un análisis di un tema bíblico of un profecia, usando e revista E Toren di Vigilancia como fuente di informacion. Un otro reunion ta un scol cu ta entrená Testigonan pa bira mihó proclamadó dje bon nobo, siguí pa un otro parti dje reunion cu ta trata cu e trabou di predicá den e teritorio local. Tambe Testigonan ta reuní huntu un bes pa siman den casnan privá na gruponan chikitu pa studia Bijbel.

Tur e reunionnan aki ta habrí pa público. Nunca no ta pasa colect. E reunionnan aki ta beneficioso pa tur hende. Bijbel ta bisa: “Nos mester mira con ta e mihó manera pa cada un di nos por incitá otro na amor i bondad activo, no keda sin bini na nos reunionnan, manera algun ta haci, sino animá otro, mas ainda pasobra nos ta mira e Dia ta yega cerca.” Studio personal i investigacion ta necesario, pero reuní cu otro hende ta animador: “Mescos cu heru ta haci heru skerpi, asina un hende ta haci e inteligencia dje otro skerpi.”—Hebreonan 10:24, 25; Proverbionan 27:17, The New English Bible.

Tambe Testigonan ta haci bon uso di oportunidadnan cu ta presentá pa papia tocante e bon nobo segun cu nan ta drenta den contacto cu otro hende den nan bida diario. Kisas nan ta intercambiá algun palabra cu un bisiña of un hende cu ta den bus of den avion cu nan, of nan ta tene un combersacion mas largu cu un amigu of un conocí of cu un compañero di trabou durante ora di come. Tempu Jesus tabata riba tera mayoria bes el a duna e clase di testimonio aki: segun cu e tabata cana cant’i laman, sintá cant’i ceru, comiendo na cas di un hende, na un casamentu, of ora e tabata den boto di piscadó riba laman di Galilea. E tabata siña hende den snoa i den tempel na Jerusalem. Unda cu el a bira, el a haña oportunidad pa papia tocante e Reino di Dios. Testigonan di Jehova ta trata na sigui Jesus su pasonan den e aspecto aki tambe.—1 Pedro 2:21.

PREDICÁ MEDIANTE EHEMPEL

Ningun di e maneranan aki di compartí e bon nobo lo no ta balioso pa bo si esun cu ta papia tocante dje mes no ta aplicá e siñansanan. Bisa un cos i haci otro ta hipocresia, i hipocresia religioso a pone miyones di hende rechasá Bijbel. Pero no tin motibu pa culpa Bijbel. Maske escriba i fariseonan tabatin e Scritura Hebreo, tog Jesus a denunciá nan como hipócrita. El a papia di nan lesamentu for di e Ley di Moises, anto a sigui bisa su disipelnan: “Tur loke nan bisa boso, haci nan i warda nan, pero no haci segun nan obranan, pasobra nan ta bisa pero nan no ta haci.” (Mateo 23:3) Ora un cristian ta hiba un bida ehemplar esei ta papia mas cu duna sermon oranan largu. A hala atencion di esposanan cristian cu tabatin esposonan incrédulo riba esaki: “Nan por ser ganá sin un palabra dor dje conducta di nan esposa, debí cu nan tabata testigo ocular di boso conducta decente.”—1 Pedro 3:1, 2.

P’esei, Testigonan di Jehova ta purba recomendá e bon nobo na otronan dje manera aki tambe: dor di ta bon ehempel den e conducta cristian cu nan ta recomendá na otro hende. Nan ta purba ‘haci na otro hende loke nan lo kier pa otro hende haci na nan.’ (Mateo 7:12) Nan ta purba di ta asina cu tur hende, no cu compañeronan Testigo, amigu, bisiña of famianan so. Dor cu nan ta imperfecto no ta semper nan ta logra esaki 100 porciento. Pero di curason nan ta deseá di haci bon na tur hende, no dor di conta nan e bon nobo dje Reino so, sino tambe dor di duna un man ora ta posibel.—Santiago 2:14-17.

[Plachi na página 19]

Hawai

[Plachi na página 19]

Venezuela

[Plachi na página 19]

Yugoslavia

[Plachi na página 20]

Salonnan di Reino, cu diseño práctico, ta lugánan pa consideracion di Bijbel

[Plachi na página 21]

Tantu den nan bida di famia como den nan contacto cu otro hende, Testigonan sinceramente ta purba haci e cosnan cu nan ta animá otro hende haci