Siña Kon Bo Mester Kontestá

TIN pregunta ta manera ijsberg. E parti mas grandi ta skondí bou di superfisie. Hopi bes tin un kuestion fundamental su tras ku ta mas importante ku e pregunta mes.

Siña kon bo mester kontestá ta nifiká determiná kuantu kos lo bo bisa i for di ki ángulo lo bo trata e pregunta, asta ora esun ku a hasi e pregunta ta ansioso pa haña e kontesta. (Huan 16:12) Manera Hesus a mustra su apòstelnan, por sosodé den algun kaso ku un persona ta puntra pa informashon ku e no tin derecho di sa òf ku en realidat lo no benefisi’é.—Echo. 1:6, 7.

E Skritura ta konsehá nos: “Laga boso palabranan ta semper ku grasia, sasoná ku salu, pa boso por sa kon boso mester kontestá kada persona.” (Kol. 4:6) Pues promé ku nos kontestá, nos tin ku konsiderá no solamente kiko nos lo bisa, sino tambe kon nos lo bis’é.

Determiná e Punto di Bista di Esun Ku Ta Puntra

E saduseonan a purba gara Hesus den trampa ku un pregunta tokante e resurekshon di un muhé ku a kasa vários biaha. Sin embargo, Hesus tabata sa ku en realidat e saduseonan no tabata kere den resurekshon. P’esei ora el a rospondé e pregunta el a hasié di tal manera ku e kontesta a trata ku nan punto di bista ekiboká ku tabata e motibu pakiko nan a hasi e pregunta. Usando un rasonamentu maestral i un relato bíbliko konosí, Hesus a hala nan atenshon riba algu ku nunka promé nan no a para ketu na dje: evidensia kla ku Dios realmente ta bai resusitá e mortonan. Hesus su kontesta a asombrá su opositornan asina tantu ku nan no a tribi puntr’é nada mas.—Luk. 20:27-40.

Pa bo por sa kon bo mester kontestá, abo tambe mester determiná ki punto di bista i preokupashon esnan ku ta hasi bo pregunta tin. Por ehèmpel, un kompañero di skol òf un kolega di trabou por puntra bo dikon bo no ta selebrá Pasku. Dikon e ta puntra esei? E ta realmente interesá den e motibu, òf djis e kier sa si bo tin mag di dibertí? Pa bo haña sa, lo bo tin ku puntr’é ta kiko a pon’é hasi e pregunta, anto kaba kontest’é a base di loke e bisa. Tambe lo bo por usa e oportunidat pa mustr’é ku dor di sigui e guia bíbliko nos ta ser protehá kontra e aspektonan di e fiesta ei ku ta kousa frustrashon i bira un peso pa hende.

Suponé ku bo haña un invitashon pa papia tokante Testigunan di Yehova dilanti un grupo di studiante na skol. Despues di bo presentashon, kisas nan ta hasi pregunta. Si e preguntanan ta parse sinsero, lo por ta mihó pa duna kontesta simpel i stret. Si e preguntanan ta reflehá prehuisio ku tin den komunidat, lo bo por tin mihó resultado si promé ku bo kontestá bo komentá brevemente riba e faktornan ku sa forma puntonan di bista popular i dikon Testigunan di Yehova ta skohe pa laga Beibel fiha e norma pa nan. Hopi bes ta bon pa konsiderá e preguntanan ei komo tópikonan ku ta preokupá e hendenan, no komo kos pa pone bo rabia, maske kisas nan ta duna bo e impreshon ei. Pues ora di rospondé bo tin chèns di amplia e punto di bista di bo ouditorio, duna nan informashon eksakto i splika nan e base bíbliko di loke nos ta kere.

Kon lo bo reakshoná si bo doño di trabou no kier duna bo liber pa bo asistí na kongreso? Na promé lugá, purba wak e asuntu for di su punto di bista. Si bo ofresé pa traha overtaim un otro dia, esei lo yuda? Si bo splik’é ku e instrukshon ku nos ta haña na kongreso ta yuda nos pa ta empleadonan onesto i digno di konfiansa, esei lo por hasi un diferensia? Si bo mustra ku bo ta tene kuenta ku e interesnan di bo doño di trabou, podisé e tambe lo tene konsiderashon ku loke e ta ripará ta importante den bo bida. Pero kiko awor si e kier pa bo hasi algu desonesto? Dor di bisa “nò” bon kla, anto huntu ku esei dun’é un pensamentu bíbliko, lo mustr’é bo posishon. Pero lo no ta mas mihó si promé ku esei bo rasoná kuné i mustr’é ku un persona ku ta dispuesto pa gaña òf hòrta p’e, un dia lo por gaña òf hòrta e mes tambe?

Òf podisé bo ta un alumno ku no kier partisipá den sierto aktividat eskolar ku ta bai kontra di loke Beibel ta bisa. Kòrda ku e maestro probablemente no tin mesun punto di bista ku bo, i ta su responsabilidat pa mantené òrdu den klas. E retonan ku bo ta konfrontá ta (1) tene konsiderashon ku loke ta preokupá e maestro, (2) splika bo posishon ku rèspèt i (3) keda firme ora bo sa ku ta un kos ku ta agradá Yehova. Pa mihó resultado, kisas bo mester di mas ku un deklarashon simpel i stret di loke bo ta kere. (Pro. 15:28) Si bo ta yòn, sin duda bo tata òf mama lo yuda bo prepará algu pa bisa.

Tin okashon ku bo mester proba ku e akusashonnan ku un persona den puesto di outoridat a presentá kontra bo no ta bèrdat. Un polis, un funshonario di gobièrnu òf un hues kisas ta eksigí pa bo splika dikon bo no ta obedesé sierto lei, e motibu di bo posishon neutral komo kristian, òf bo punto di bista relashoná ku partisipashon den seremonianan patriótiko. Kon bo mester kontestá? Beibel ta konsehá: “Ku suavedat i reverensia [“rèspèt profundo,” NW].” (1 Ped. 3:15) Tambe bo por puntra bo mes dikon nan ta preokupá ku e kuestionnan aki, i respetá esei. Kiko mas lo bo por hasi? Meskos ku apòstel Pablo a referí na e lei romano ku ta protehá derecho di siudadanonan, lo bo por señalá na leinan asina ku ta apliká den bo kaso. (Echo. 22:25-29) Podisé si bo menshoná algun echo tokante e posishon ku e promé kristiannan i tambe Testigunan di Yehova rònt mundu a tuma, esei lo amplia e punto di bista di e funshonario. Òf kisas bo por mustra ku ora hende ta rekonosé e outoridat di Dios esei en realidat ta motivá nan pa ta mas konsistente den obedesé e leinan di hende ku no ta bai kontra esnan di Dios. (Rom. 13:1-14) Despues di haña tal informashon, kisas nan lo ta mas habrí pa tende e motibunan bíbliko di bo posishon.

Kon Esun Ku Ta Hasi Pregunta Ta Mira e Skritura

Promé ku bo kontestá, podisé lo bo tin ku konsiderá tambe kon esun ku ta hasi pregunta ta mira Beibel. Hesus a hasi esei ora el a kontestá e pregunta di e saduseonan tokante resurekshon. Sabiendo ku nan a aseptá solamente e bukinan ku Moises a skirbi, Hesus a rasoná riba un relato ku tin den e Pentateuko (e promé sinku bukinan di Beibel), i promé ku el a komentá riba esei e di: “Ma ku e mortonan ta wòrdu lantá, esei Moises tambe a mustra.” (Luk. 20:37) Pues, ta bon tambe pa sita for di e partinan di Beibel ku bo oyente ta aseptá i ku e konosé.

Pero kiko si bo oyente no ta rekonosé e outoridat di Beibel? Tuma nota di loke apòstel Pablo a hasi den e diskurso ku el a duna pará riba Areópago, ku nos ta haña skirbí na Echonan 17:22-31. El a kompartí bèrdatnan bíbliko sin sita direktamente for di Beibel. Kaminda ta nesesario, bo por hasi meskos. Na algun lugá bo tin ku tene vários kòmbersashon ku un persona promé ku bo por referí direktamente na Beibel. I asina mes, ora bo introdusí Beibel lo ta sabí pa bo menshoná promé un òf otro motibu pakiko e ta meresé nos konsiderashon en bes di deklará firmemente ku e ta e Palabra di Dios. Sin embargo, bo meta mester ta pa duna un testimonio kla di Dios su propósito i, ku tempu, laga bo oyente mira pa su mes kiko Beibel ta bisa, ya ku Beibel riba su mes tin hopi mas poder pa konvens’é ku kualkier kos ku nos por bisa personalmente.—Heb. 4:12.

“Semper ku Grasia”

Yehova mes ta trata hende den un manera bondadoso i agradabel, pues ta na su lugá ku Beibel ta bisa su sirbidónan pa nan palabranan ta “semper ku grasia, sasoná ku salu”! (Kol. 4:6; Éks. 34:6) Esaki kier men ku nos mester papia ku bondat, asta ora ta parse ku e persona no ta meresé esei. Nos palabranan mester ta agradabel, no brutu òf sin takto.

Hopi hende ta bou di tremendo preshon, i tur dia nan tin ku tende tur klase di insulto. Esei por pone ku ora nos bishitá e hendenan ei, nan ta papia brutu ku nos. Kon nos tin ku reakshoná? Beibel ta bisa: “Un kontesta suave ta kita rabia.” Asina tambe un kontesta trankil por suavisá esnan ku tin un idea robes di nos. (Pro. 15:1; 25:15) Pa hende ku tur dia tin ku soportá palabranan di abusu, bon manera i un stèm ku ta ekspresá bondat por ta asina atraktivo ku esei por pone nan skucha e bon nobo ku nos ta trese.

Nos no ta interesá den diskutí ku esnan ku no ta mustra rèspèt pa e bèrdat. Mas bien, nos deseo ta pa rasoná riba e Skritura ku hende ku ta permití nos hasi esei. Maske ki situashon nos haña nos aden, no lubidá ku nos mester kontestá ku bondat i ku e konvikshon ku e promesanan di Dios ta konfiabel.—1 Tes. 1:5.

Desishonnan Personal i Asuntunan di Konsenshi

Ora un studiante di Beibel òf un ruman den fe puntra bo kiko e mester hasi den un sierto situashon, kiko bo mester kontest’é? Podisé bo sa kiko abo lo a hasi personalmente. Pero kada persona tin ku karga responsabilidat pa su propio desishonnan ku e tuma den bida. (Gal. 6:5) Apòstel Pablo a splika ku den su predikashon el a stimulá hende pa ‘obedesé pa medio di fe.’ (Rom. 16:26) Esei ta un ekselente ehèmpel pa nos sigui. Un persona ku ta tuma su desishonnan pensando prinsipalmente pa komplasé esun ku ta siñ’é Beibel òf un otro persona, ta sirbiendo hende i no ta bibando pa medio di fe. (Gal. 1:10) Pues den un kaso asina, un kontesta simpel i direkto kisas no ta na bienestar di e persona ku ta hasi e pregunta.

Kon anto lo bo por rospondé na armonia ku e guia ku Beibel ta duna? Lo bo por hala e persona su atenshon na prinsipionan i ehèmpelnan bíbliko ku ta kuadra. Den algun kaso, lo bo por mustra e persona kon e mes por hasi investigashon p’e por haña e prinsipionan i ehèmpelnan ei. Lo bo por asta splik’é e prinsipionan i enfatisá e balor di e ehèmpelnan, pero sin mustra kon nan ta apliká den su situashon. Puntra e persona si e ta mira algu den nan ku lo por yud’é tuma un desishon sabí. Anim’é pa konsiderá ki proseder lo agradá Yehova en bista di e prinsipionan i ehèmpelnan aki. Di e manera ei bo ta yud’é ‘entrená su mente pa distinguí loke ta bon i loke ta malu.’—Heb. 5:14.

Komentarionan na Reunion di Kongregashon

Reunionnan di e kongregashon kristian hopi bes ta duna nos oportunidat pa deklará nos fe públikamente. Un manera ku nos ta hasi esei ta dor di kontestá preguntanan ku ta ser hasí. Kon nos mester komentá? Ku e deseo di bendishoná Yehova, papiando bon di dje, manera e salmista David tabata hasi “den e kongregashonnan.” (Sal. 26:12) Tambe nos komentarionan mester animá nos rumannan i stimulá nan “pa stima i hasi bon obra,” manera apòstel Pablo a konsehá. (Heb. 10:23-25) Loke por yuda nos logra esaki ta si nos ta prepará nos lèsnan di antemano.

Sòru pa bo komentarionan ta simpel, kla i kòrtiku. No kubri henter e paragraf; trata un solo punto. Si bo duna solamente parti di e kontesta, otronan lo tin chèns pa duna komentario adishonal. Ta bon pa referí foral na e tekstonan bíbliko sitá den e informashon, i purba hala atenshon na e parti di e teksto ku ta apoyá e punto ku ta ser studiá. Siña duna komentario ku bo mes palabra en bes di lesa direktamente for di e paragraf. No sinti bo malu si un komentario ku bo hasi no sali presis manera bo a deseá. De bes en kuando esei ta sosodé ku tur hende ku ta duna komentario.

Pues ta bisto anto ku sa kon nos mester kontestá ta enserá mas ku sa e kontesta so. Bo mester por distinguí kon pa kontestá. Pero bo ta sinti un gran satisfakshon ora ku bo duna un kontesta ku ta sali di bo kurason i ku ta toka kurason di otro hende!—Pro. 15:23.