Kon Lo Bo Kontestá?
1. Dikon nos mester imitá Hesus su ehèmpel ora hende hasi nos un pregunta?
1 Te awe, e manera efektivo ku Hesus tabata kontestá pregunta ta impreshoná hende. Ta bon pa nos imitá Hesus ora nos tin ku kontestá e diferente preguntanan ku hende ta hasi nos den sirbishi.—1 Ped. 2:21.
2. Kiko lo yuda nos duna un kontesta efikas?
2 Skucha Promé: Hesus tabata purba saka afó dikon e hende a hasi pregunta. Tin bes ta nesesario pa hasi pregunta pa haña sa kiko realmente e persona ta pensa. Un hende ku puntra, “Boso ta kere den Hesus?” kisas lo kier sa ta dikon nos no ta selebrá Pasku. Si bo por saka afó kiko realmente ta su preokupashon, bo por rasoná na un manera mas efikas kuné.—Luk. 10:25-37.
3. Kiko nos tin na nos disposishon pa yuda nos duna kontestanan bíbliko satisfaktorio?
3 Usa e Palabra di Dios pa Kontestá Pregunta: Hopi biaha ta mihó pa bo usa Beibel pa kontestá pregunta. (2 Tim. 3:16, 17; Heb. 4:12) E buki Rasonamentu i “Temanan Bíbliko pa Kòmbersashon” den e Tradukshon di Mundu Nobo di e Santu Skritura (na spañó) a resultá masha útil pa duna kontesta satisfaktorio. Asta si e hende ku a hasi pregunta no ta aseptá Beibel komo un outoridat, lo bo por bis’é ku takto loke e Skritura ta siña. Animá e persona pa pensa seriamente riba e sabiduria bíbliko ku a resultá di ta práktiko. Ora nos ta imitá Hesus, nos kontestanan lo ta “manera . . . apel di oro den montura di plata,” esta, kontestanan agradabel, útil i dignifiká.—Pro. 25:11.
4. Ki ora ta mihó pa no purba kontestá tur pregunta?
4 Nos Mester Kontestá Tur Pregunta? Si bo no por kontestá un pregunta, no tene bèrgwensa di bisa: “Mi no por kontestá bo pregunta, pero lo mi bai buska informashon i bini bèk ku e kontesta.” E modestia ei i interes personal ku bo ta mustra den e doño di kas por konmov’é pa invitá bo pa bishit’é atrobe. Si bo nota ku un pregunta ta bini di un persona ku ta oponé e mensahe djis pa lanta un diskushon, imitá Hesus i limitá bo kontesta. (Luk. 20:1-8) Asina tambe, si un hende no ta realmente interesá den e bèrdat i ke drenta den un debate ku bo, den un forma kortes terminá e kòmbersashon i usa bo tempu pa buska hende sinsero.—Mat. 7:6.
5. Ki ehèmpel Hesus a pone ora di kontestá pregunta?
5 Hesus tabata sa ku ta sumamente importante pa dependé riba Yehova pa e por a kumpli ku su asignashon di “duna testimonio di e bèrdat,” esaki a inkluí kontestá preguntanan sinsero. (Juan 18:37) Ta un privilegio ku nos por imitá Hesus ora nos tin ku kontestá pregunta di hende ku tin “e disposishon korekto pa bida eterno”!—Echo. 13:48, NW.