Programa pa Kultivá Bon Kualidatnan di Oradó i Maestro

SEA ku bo ta yòn òf di edat, hòmber òf muhé, e programa aki por yuda bo ekspresá bo mes mihó i bira un maestro mas kompetente di e Palabra di Dios.

E superintendente di e Skol di Ministerio Teokrátiko lo asigná e partinan na esnan ku ta inskribí den e skol. Riba e siguiente tres páginanan bo ta haña e formulario di konseho personal. E number dilanti di e vários puntonan ta korespondé ku e number di e lès riba e páginanan ku ta sigui. Kada lès ta splika kon pa dominá e diferente aspektonan aki di papia komo oradó i di siña otro hende, i dikon kada un di nan ta importante. Tambe lo bo haña instrukshon útil pa logra loke ta ser rekomendá.

E baranan di koló riba e formulario di konseho ta indiká kua puntonan ta apliká na asignashonnan ku ta trata ku (1) lesamentu pa ouditorio, (2) demostrashon ku dos òf mas hende òf (3) diskurso na e kongregashon. E superintendente di skol lo indiká riba kua punto bo tin ku traha. Preferiblemente, traha un pa un riba nan. Lo ta probechoso pa bo si bo hasi e tareanan rekomendá na fin di e lès asigná. Si ta bisto ku bo a apliká e konseho di e lès bon, bo konsehero lo pone bo traha riba un otro punto.

Si bo asignashon ta den forma di un demostrashon, lo bo tin mester di un marko di sirkunstansia. Na página 82 tin vários marko di sirkunstansia, pero bo no ta mará na e órden den kua nan ta riba e lista aki. Podisé bo konsehero ta rekomendá bo pa purba un sierto marko di sirkunstansia pa bo por haña eksperensia, òf e por laga bo mes skohe esei.

Bo por progresá mas lihé dor di lesa e buki aki i hasi e tareanan asta ora bo no ta preparando un asignashon p’e skol. Talbes bo por studia mas o ménos un lès pa siman.

Maske kuantu tempu bo tin ta partisipá den e skol òf den sirbishi di vèlt, semper bo por mehorá. Pues nos ta spera ku lo bo benefisiá plenamente di e formashon ku e Skol di Ministerio Teokrátiko ta duna.