Un Skol Ku Ta Prepará Nos pa e Kos di Mas Importante
1 Hende ta bai skol pa nan siña kos ku lo yuda nan alkansá nan metanan den bida. Pero ki meta por ta mas importante ku alabá e Dunadó di bida i yuda hende siña konosé su propósito i su kaminda? Den un palabra, niun. E Skol di Ministerio Teokrátiko su meta ta pa prepará nos pa siña nos fe na otro hende. P’esei, ora nos asistí na e skol tur siman, nos ta desaroyá abilidatnan ku ta prepará nos pa e aktividatnan di mas importante den bida.
2 E suplemento ku nos a haña di e “Programa pa Skol di Ministerio Teokrátiko pa 2003” ta kontené detaye tokante kon mester dirigí e skol. Kisas ta práktiko pa bo tene e programa den bo buki Benefisiá di e Skol di Ministerio Teokrátiko, ya ku lo bo tin ku bini ku e buki tur siman p’e Skol di Ministerio Teokrátiko. Laga nos wak algun dje partinan dje Skol di Ministerio Teokrátiko pa aña 2003.
3 Kualidat di Papia: Entrante yanüari, tur reunion lo kuminsá ku un diskurso di 5 minüt tokante un kualidat di papia òf un aspekto di lesamentu, studiamentu òf di siña hende. E superintendente di skol lo presentá e diskursonan aki, òf e por asigná un otro ansiano kapas pa dun’é. E oradó lo por splika kiko e kualidat di papia ta enserá i dikon e ta importante. Despues e mester papia un poko mas riba e tema dor di trata ehèmpelnan bíbliko i mustra kon por usa e kualidat en kuestion. Lo e konsentrá prinsipalmente riba kon esei lo por mehorá nos sirbishi di vèlt.
4 Parti Num. 1: Ta bolbe pidi e rumannan ku tin ku duna e diskurso di instrukshon pa “konsentrá riba e balor práktiko dje informashon ku ta ser tratá.” Esei kier men ku nan mester mustra e kongregashon kon pa usa e informashon. Si bo risibí e asignashon aki, konsultá ku página 48-9 dje buki di Skol di Ministerio, kaminda lo bo haña sugerensia tokante kon pa prepará. Studia tambe e referensianan ku e indèks dje buki ta menshoná bou di “Aplikashon práktiko.”
5 Programa di Lesamentu di Beibel: Si te awor bo no a logra mantené bo na e programa semanal di lesamentu di Beibel, pakiko bo no ta pone un meta pa mantené bo na dje e aña aki? Esnan ku hasié lo kaba di lesa e Skritura Griego Kristian pa fin di aña. Paragraf 4 na página 10 dje buki di Skol di Ministerio ta trata e benefisionan di kuminsá ku un programa di lesamentu di Skritura Griego Kristian.
6 Puntonan Sobresaliente dje Lesamentu di Beibel: A rèk e parti aki hasi’é 10 minüt pa e ouditorio por tin chèns di duna komentario riba e lesamentu di siman. Esnan asigná mester tene nan mes na e tempu ku a duna nan. Lo presentá e parti aki tur siman, inkluso den e siman di e repaso oral. Segun ku bo ta lesa e kapítulonan asigná, paga tinu riba puntonan ku lo yuda bo den bo studio di famia, den predikashon òf den bo bida personal. Ki kualidatnan di Yehova a bini dilanti den e manera ku el a trata su pueblo i otro nashonnan? Kiko bo a siña ku a fortalesé bo fe i duna bo mas apresio pa Yehova? Sinti bo liber pa komentá riba kualkier punto den e kapítulonan asigná, i asta riba e versíkulonan ku ta kai bou dje lesamentu di Parti Num. 2, pasobra e ruman ku ta bai lesa nan no ta bai komentá riba e versíkulonan.
7 Parti Num. 2: E promé asignashon di studiante di tur siman ta train e rumannan den lesamentu públiko. Tur e lesamentunan, ménos e último lesamentu di luna, lo ta for di e lesamentu semanal di Beibel. E último lesamentu di luna lo ta for di E Toren di Vigilansia. E studiante mester lesa e informashon asigná sin un introdukshon ni un konklushon. Asina e tin chèns di konsentrá mihó riba su abilidat di lesa.—1 Tim. 4:13.
8 Parti Num. 3 i Num. 4: E asignashonnan aki por tin sea un tema so òf e buki Rasonamentu komo fuente di informashon. Algun di nan tin masha tiki fuente di informashon. Esnan ku risibí asignashon ku djis un tema so òf tiki fuente di informashon tin chèns di desaroyá nan presentashon dor di hasi investigashon den nos publikashonnan kristian. Asina ta mas fásil pa rumannan muhé adaptá e parti na e sirkunstansianan di nan yudante.
9 Marko di Sirkunstansia: Manera e buki di Skol di Ministerio ta indiká na página 45, e superintendente di skol por asigná un marko di sirkunstansia. Si e no hasié, e rumannan muhé por skohe unu for dje lista na página 82. Si un ruman muhé ta duna un parti kada dos luna, ainda e lista tin sufisiente variedat pa skohe di dje pa sinku aña largu. Si un ruman muhé skohé Num. 30, esta, “Un otro marko di sirkunstansia ku ta pas pa bo área,” e mester skirbi e marko di sirkunstansia na pia òf parti patras dje papel di asignashon (S-89-PA). E superintendente di skol lo skirbi e fecha dje studiante su parti na página 82 den e studiante su buki, banda dje marko di sirkunstansia ku el a usa. E por hasi esaki ora e marka e papel di konseho dje studiante ku tambe ta den e buki.
10 Papel di Konseho: Bo papel di konseho ta forma parti di bo buki. E ta aparesé na página 79-81. Pues, lo bo tin ku duna e superintendente di skol bo buki despues di kada parti ku bo duna. E superintendente di skol lo mester tene un registro dje puntonan di konseho ku e studiantenan ta trahando ariba.
11 Repaso Oral: Lo tene e repaso di e Skol di Ministerio Teokrátiko di forma oral. Lo ten’é un biaha kada dos luna, i lo e dura 30 minüt. E preguntanan ku lo ser konsiderá lo aparesé den Nos Ministerio di Reino. Si e siman di repaso kai pareu ku e siman di asamblea di sirkuito òf ku e bishita di superintendente di sirkuito, mester duna e partinan dje siman siguiente un siman promé, anto tene e repaso e siman siguiente.
12 Salanan Adishonal: Si un kongregashon tin mas ku 50 studiante inskribí den e skol, e ansianonan por konsiderá pa usa un òf mas sala adishonal. “Por usa e areglo aki pa tur e partinan di studiante, òf pa e último dosnan so.” (Skol di Ministerio, pág. 285) E último sugerensia aki por ta útil pa kongregashonnan ku tin hopi ruman muhé i poko ruman hòmber pa duna e parti di lesamentu. E ansianonan mester skohe rumannan hòmber kapas pa dirigí e salanan adishonal.
13 Konsehero Asistente: Manera e programa di Skol di Ministerio Teokrátiko ta indiká, e kuerpo di ansiano mester nombra un konsehero asistente pa duna ansiano i sirbidó ministerial konseho den privá ora nan presentá e puntonan sobresaliente òf e diskurso di instrukshon. E ruman asigná pa hasi esaki mester tin eksperensia, i e otro ansianonan mester por respetá su konseho. Su konseho mester ta konstruktivo. E mester elogiá e rumannan pa nan bon kualidatnan di papia i instruí, anto rekomendá un òf dos punto ku nan por mehorá ariba. E no tin nodi duna konseho despues di kada parti ku un ruman duna si e ruman aki ta duna parti frekuentemente. Sin embargo, e ruman asigná pa duna konseho mester usa disernimentu i komprondé ku por yuda asta rumannan ku ta duna diskurso públiko pa nan progresá mas.—1 Tim. 4:15.
14 Riba Kiko e Konsehero Mester Paga Tinu: Kiko por yuda un konsehero analisá un presentashon? E di tres kuadro den mayoria dje 53 kapítulonan dje buki di Skol di Ministerio ta kontené un resúmen breve di loke mester paga tinu ariba. E superintendente di skol mester tene kuenta tambe ku otro rekordatorionan i sugerensianan den e buki ku lo yud’é determiná si e parti tabatin un desaroyo koherente, i kon efikas e presentashon tabata. Por ehèmpel, wak e seri di pregunta na e parti ariba di página 55, i e tepnan den e último paragraf na página 163.
15 Usa e Espasionan Bashí: Ademas di e márgennan hanchu, e buki di Skol di Ministerio tin tambe algun espasio bashí pa bo hasi anotashon durante bo studio personal i ora ku bo asistí na e Skol di Ministerio Teokrátiko. (Mira página 77, 92, 165, 243, 246 i 250.) Sòru di bini ku bo buki tur siman. Us’é pa sigui e desaroyo dje promé diskurso. Tene bo buki habrí durante sobrá dje skol. Paga tinu riba e sugerensianan ku e superintendente di skol hasi. Nota kon e oradónan ta usa diferente método di instruí, pregunta, ehèmpel, komparashon, ilustrashon, medio visual i kontraste. Dor di hasi bon anotashon lo bo por kòrda i usa hopi bon punto ku bo a saka for di e skol.
16 Hesukristu tabata sa ku e privilegio di mas grandi ku kualkier hende por risibí ta di prediká e bon nobo di e Reino di Dios. Esei tabata su enkargo prinsipal. (Mar. 1:38) El a bisa: “Mi mester prediká e reino di Dios na e otro statnan tambe, pasobra ta pa e propósito aki mi a wòrdu mandá.” (Luk. 4:43) Nos tambe, meskos ku esnan ku a aseptá e invitashon pa siguié, ta intensamente okupá predikando e bon nobo, i semper nos ta buska manera pa mehorá e kalidat di nos “sakrifisio di alabansa.” (Heb. 13:15) Ku esei na mente, laga nos ta determiná pa partisipá regularmente den e Skol di Ministerio Teokrátiko, un skol ku lo yuda nos prepará pa e kos di mas importante den bida.