Kon e Skol di Ministerio Teokrátiko Ta Benefisiá Nos
1 Yehova su pueblo tin e privilegio úniko di risibí edukashon teokrátiko. (Isa. 54:13; Juan 6:45) Sin embargo, e grado ku nos lo benefisiá di dje ta dependé pa un gran parti di e esfuerso ku nos ta hasi. Abo a ripará kiko ta e efektonan positivo ku e Skol di Ministerio Teokrátiko tin riba bo spiritualidat?
2 Palabranan di Apresio: Hopi superintendente di skol a komentá ku e estudio profundo di e kualidatnan di papia a hasi nan kongregashon mas efektivo den sirbishi di vèlt. Ademas, un superintendente di skol a haña ku e areglo pa ouditorio partisipá durante e konsiderashon di e puntonan sobresaliente di Beibel tabatin komo resultado ku mas ruman ta perkurá pa keda al dia ku e programa di lesamentu di Beibel. Pa loke ta trata Asignashon Num. 2, hopi ruman hòmber a papia di un manera positivo tokante e benefisionan di konsentrá riba e informashon so, sin tin mester di prepará un introdukshon ku konklushon. Esnan ku ta haña e parti aki awor ta enfoká mas tantu riba mehorá nan abilidat di lesa.—1 Tim. 4:13.
3 Tur Hende Por Benefisiá: Dunamentu di komentario na reunion por ta algu gososo. (Pro. 15:23) Dor ku nos ta haña e preguntanan di e repaso oral di antemano, nos por prepará pa e repaso i partisipá fásilmente den dje. Ademas, kuminsando ku e edishon di E Toren di Vigilansia di 1 di yanüari 2004, nos ta hañando puntonan sobresaliente di e bukinan di Beibel ku ta kuadra ku nos asignashon di lesamentu den e Skol di Ministerio Teokrátiko. E artíkulonan aki a yuda hopi di nos duna komentarionan edifikante durante e konsiderashon di puntonan sobresaliente di Beibel.
4 Tur hende inskribí den e skol tin e privilegio spesial di prepará i duna parti. Nos tur por benefisiá di e komentarionan positivo ku e superintendente di skol ta duna for di plataforma. Ademas kada studiante ta benefisiá mas ainda for di puntonan di konseho ku e superintendente lo por duna nan den privá despues di reunion. E tareanan ku ta trata kualidatnan di papia na fin di kada kapítulo di e buki Benefisiá di e Skol di Ministerio Teokrátiko ta duna yudansa adishonal.
5 Ora ku durante e skol (òf despues dor di e superintendente di skol) sierto punto bin padilanti ku ta importante, sea di Beibel òf algu otro di balor práktiko, not’é den bo buki di instrukshon di Skol di Ministerio. Reflekshoná riba loke bo a siña, i wak kon e aspekto aki di edukashon divino ta yuda bo mehorá bo spiritualidat.