Entusiasmo

ENTUSIASMO ta duna bida na un diskurso. Ounke ta importante pa e kontenido ta informativo, loke ta yuda kapta e atenshon di bo ouditorio ta un presentashon animá. Sin importá ki antesedente kultural òf personalidat bo tin, bo por kultivá entusiasmo.

Papia ku Sintimentu. Hesus a bisa un muhé di Samaria ku esnan ku ta adorá Yehova tin ku hasi esei ku “spiritu i bèrdat.” (Huan 4:24) Nan mester adorá Yehova motivá pa un kurason yen di apresio i na armonia ku e bèrdat hañá den e Palabra di Dios. Ora un persona ta sinti tal apresio profundo, su manera di papia ta reflehá esei. Lo e ta ansioso pa papia ku hende tokante Yehova su areglonan amoroso. Su ekspreshon di kara, su gestonan i su stèm lo reflehá loke berdaderamente e ta sinti.

Pero kon por ta ku un oradó ku stima Yehova i ku ta konvensí di loke e ta bisa den su diskurso, tòg ta falta entusiasmo? Pasobra no ta sufisiente pa e djis prepará loke e ta bai bisa. E mester biba e tema; e ouditorio mester sinti ku e ta papia di kurason. Suponé ku un ruman a haña e asignashon pa papia tokante e sakrifisio di reskate di Hesukristu. Ora e oradó aki ta presentá su diskurso, e no mester ta pensando riba e detayenan so, sino tambe riba e apresio ku tantu e komo e ouditorio mester tin pa e sakrifisio di Hesus. E tin ku kòrda kon gradisidu e ta na Yehova Dios i Kristu Hesus pa e areglo maravioso aki. E tin ku pensa riba e gran perspektiva ku esaki ta ofresé humanidat: bida eterno ku salú perfekto i felisidat den un paradeis restorá riba tera! Pues e tin ku sinti den su kurason loke e ta bai bisa.

Beibel ta bisa ku Èsdras, un eskriba i maestro den Israel, “a dediká [òf “prepará,” NW] su kurason pa studia e lei di SEÑOR i pa pon’é na práktika, i pa siña e hendenan di Israel.” (Èsd. 7:10) Si nos hasi meskos—prepará no solamente e informashon sino tambe nos kurason—nos lo papia di kurason. Ora nos ta ekspresá e bèrdat di un manera sinsero asina, nos por yuda esnan ku nos ta papia kuné kultivá un berdadero amor pa e bèrdat.

Pensa Riba Bo Ouditorio. Un otro faktor importante pa bo por mustra entusiasmo ta si abo ta konvensí ku bo ouditorio tin mester di loke bo ta bai bisa. Esaki ta nifiká ku ora di prepará bo presentashon, no solamente bo ta skohe material instruktivo, sino tambe ta resa pidi Yehova guia bo pa bo us’é na un manera ku ta benefisiá bo oyentenan. (Sal. 32:8; Mat. 7:7, 8) Analisá dikon bo ouditorio tin ku tende e informashon, kon lo e benefisiá nan i kon bo por present’é di manera ku nan ta kapta su balor.

Traha riba bo diskurso te ora ku bo ta sinti bo entusiasmá ku e resultado. E no tin nodi ta algu nobo, pero sí bo por trata e tema di un ángulo diferente. Si loke bo a prepará di bèrdat lo yuda bo ouditorio fortalesé nan relashon ku Yehova, apresiá loke e ta perkurá, enfrentá e preshonnan di bida den e sistema bieu aki òf bira mas efikas den nan sirbishi, lo bo tin tur motibu pa ta entusiasmá ku bo diskurso.

Kiko si bo asignashon ta pa lesa públikamente? Pa bo por hasi esei ku entusiasmo, bo mester hasi mas ku solamente pronunsiá e palabranan korektamente i wak kua palabranan bo tin ku lesa huntu. Studia lokual bo tin ku lesa. Si bo ta bai lesa for di Beibel, buska informashon riba e pasashi. Hasi sigur ku bo ta komprondé su nifikashon básiko. Pensa riba kon e ta benefisiá abo i bo ouditorio, i lesa ku e deseo di transmití esei na esnan ku ta skucha bo.

Bo ta preparando pa sirbishi di vèlt? Repasá bo tema di kòmbersashon i e tekstonan bíbliko ku bo ta bai usa. Pensa tambe riba kiko ta okupá e hendenan su mente. Kiko tabatin den notisia? Kua ta e problemanan ku nan ta konfrontá? Si bo ta ekipá pa mustra hende ku e Palabra di Dios tin e solushon pa e problemanan ku ta preokupá nan, lo bo ta ansioso pa mustra nan esei, i di mes lo bo tin entusiasmo.

Mustra Entusiasmo dor di un Presentashon Animá. Entusiasmo ta mas bisto ora bo ta papia ku smak. Hende mester por mira esaki na bo ekspreshon di kara. Bo mester zona konvensí, pero sin bira outoritario.

Pa logra esei, bo mester ta balansá. Tin hende ta inkliná na bira entusiasmá pa tur kos. Kisas mester yuda nan realisá ku ora un persona ta presentá su diskurso demasiado emoshonal òf ku hopi buya, su ouditorio lo konsentrá mas riba dje ku riba e mensahe. Na otro banda, mester animá esnan tímido pa ta mas ekspresivo.

Entusiasmo ta kontagioso. Si bo tin bon kontakto visual ku e ouditorio i ta papia ku smak, bo ouditorio lo sinti e entusiasmo ei. Apólos tabata duna diskurso animá, i Beibel ta deskribié komo un oradó elokuente. Si bo tin e spiritu ferviente di Dios, bo presentashon animá lo motivá esnan ku ta skucha bo pa aktua.—Echo. 18:24, 25; Rom. 12:11.

Entusiasmo Adekuá pa e Informashon. Tene kuidou pa bo no ta demasiado entusiasmá durante henter bo diskurso te ku bo ouditorio ta kansa. Si esei sosodé, nan lo no hasi kaso di bo spièrtamentunan pa aktua. Esaki ta enfatisá e nesesidat di prepará e informashon di tal manera ku lo tin variedat den bo presentashon. Sòru pa bo no adoptá un estilo ku ta reflehá indiferensia. Si bo skohe bo informashon kuidadosamente, lo bo haña tur punto masha interesante. Pero di mes tin algun punto ku ta rekerí mas entusiasmo ku otro ora di presentá nan, i bo mester meskla esakinan bon den henter bo diskurso.

Foral puntonan prinsipal bo mester presentá ku entusiasmo. Bo diskurso mester yega na puntonan kulminante, i komo ku ta nan ta loke lo destaká mas den bo diskurso, generalmente nan lo ta destiná na motivá bo ouditorio. Despues di a konvensé bo ouditorio, bo tin ku stimulá nan, mustra nan e benefisionan ku nan lo saka si nan apliká loke a ser tratá. Bo entusiasmo lo yuda bo konmové e kurason di bo oyentenan. En resúmen, entusiasmo nunka mester ta fòrsá; bo mester tin un motibu pa ta entusiasmá, i ta e kontenido di bo diskurso mester duna bo e motibu ei.