Uso di Mikrofon

NOS rumannan kristian ta dediká hopi tempu i energia pa asistí na reunionnan kristian. Pa nan por benefisiá di nan, nan mester por tende e informashon bon kla.

Den tempu di Israel di pasado, no tabatin ekipo eléktriko pa amplifiká zonidu. Kon un ouditorio di miónes di persona por a tende Moises ora el a papia ku e nashon di Israel riba e sabananan di Moab promé ku nan a drenta e Tera Primintí? Posiblemente Moises a laga hòmbernan para na sierto distansia for di otro pa ripití su palabranan pa henter e kampamentu. (Deu. 1:1; 31:1) Djis despues ku e israelitanan a kuminsá ku nan konkista di e pais na wèst di Yordan, Hosué a reuní e nashon dilanti di Seru Gerizim i Seru Ebal, i e levitanan evidentemente tabata den e vaye ku a separá e pueblo. Einan henter e pueblo a tende e bendishonnan i e maldishonnan ku a keda presentá na nan, i a kontestá “Amèn.” (Hos. 8:33-35) Ta posibel ku na e okashon ei tambe nan a usa e sistema di pone hòmber para na sierto distansia pa ripití e palabranan, pero sin duda e bon akústika di e área tambe a yuda transmití e zonidu.

Un 1.500 aña despues, “asina un multitut grandi” a reuní na Laman di Galilea pa tende Hesus, kende a subi den un boto, hala for di kantu i kai sinta pa papia ku e multitut. (Mar. 4:1, 2) Dikon Hesus a papia for di un boto? Aparentemente pasobra stèm di hende ta proyektá ku un klaridat remarkabel riba e superfisie lizu di laman.

Te na prinsipio di siglo 20, ta e volúmen i klaridat di stèm di un oradó a determiná kuantu hende den ouditorio lo por a tende loke e ta bisa. Sin embargo, for di e dékada di 1920 padilanti, sirbidónan di Yehova a kuminsá hasi uso di ekipo di zonidu eléktriko na nan kongresonan.

Ekipo di Zonidu. Esakinan por amplifiká e volúmen di un oradó su stèm i tòg mantené e kalidat i tono di su bos. E oradó no tin nodi fòrsa su stèmbant ni su oyentenan no tin ku hasi esfuerso pa tende loke e ta bisa. Mas bien nan por konsentrá riba e mensahe.

E rumannan a hasi hopi esfuerso pa garantisá ku tin bon ekipo di zonidu disponibel na e asambleanan di Testigunan di Yehova. Ademas, hopi Salòn di Reino ta usa ekipo di zonidu pa amplifiká stèm di esnan ku ta duna diskurso, kondusí e reunion òf lesa for di plataforma. Algun kongregashon tambe tin mikrofon ku nan ta usa pa ora e ouditorio duna komentario durante reunion. Si bo kongregashon tin tal ekipo, siña us’é bon.

Algun Sugerensia Básiko. Pa usa e ekipo manera mester ta, tene e siguiente puntonan na mente: (1) Por lo general, e mikrofon mester ta mas o ménos 10 pa 15 centimeter for di bo boka. Si e mikrofon ta muchu serka, bo palabranan no ta sali kla. Si e ta muchu leu, hende apénas lo tende bo stèm. (2) E mikrofon mester ta bo dilanti, no na banda. Si bo ta move bo kabes na banda drechi òf banda robes, bo tin ku papia solamente ora bo kara ta dilanti di e mikrofon. (3) Papia ku un tiki mas volúmen i intensidat ku ora bo ta kòmbersá normalmente. Pero bo no tin nodi grita, pasobra e ekipo di zonidu lo hiba bo stèm fásilmente na esnan sintá mas leu den bo ouditorio. (4) Si bo tin ku raspa bo garganta òf bo tin ku tosa òf nister, hasi sigur di kita bo kara for di e mikrofon.

Ora di Duna un Diskurso. Na momentu ku bo subi riba plataforma i para dilanti e stènt di oradó, normalmente un ruman hòmber lo ahustá e posishon di e mikrofon. Para na un manera natural ku bo kara pa ouditorio miéntras ku e ta hasi esaki. Pone bo notanan riba e stènt di oradó, i hasi sigur ku e mikrofon no ta stroba bo di mira nan.

Na momentu ku bo kuminsá papia, skucha kon bo stèm ta zona dor di e loutspiker. E volúmen ta muchu duru, òf algun palabra ta sali ku un zonidu skèrpi ku ta iritante? Kisas bo tin ku hala un tres òf kuater centimeter patras. Kòrda ku ora bo ta wak bo notanan, bo tin ku papia i lesa solamente na momentu ku bo kara ta pa e mikrofon òf djis un tiki riba dje, nunka bou di dje.

Ora di Lesa for di Plataforma. Ta mihó pa bo tene bo Beibel òf otro publikashon na haltu ya asina bo ta keda kara pa e ouditorio. Komo ku e mikrofon probablemente lo ta nèt bo dilanti, lo bo tin ku tene loke bo ta lesa un poko na banda. Esaki ta nifiká ku bo kabes mester ta un poko na e otro banda di e mikrofon, ya asina ora bo lesa bo stèm lo bai dirèkt den e mikrofon.

Mayoria ruman ku ta lesa na e Studio di Toren di Vigilansia ta lanta para i lesa den un mikrofon pará. E posishon aki ta permití nan hala rosea mas fásilmente i lesa mas kla i ekspresivo. Kòrda ku lesamentu di e paragrafnan ta un rasgo importante di e reunion. Ta solamente si e ouditorio por tende e informashon ku ta ser lesá bon, nan lo por saka benefisio for di dje.

Ora di Komentá Durante Reunion. Si bo kongregashon ta usa mikrofon ora ouditorio ta partisipá den reunion, kòrda ku tòg bo tin ku papia kla i sufisiente duru. Ora di komentá, purba tene bo Beibel òf e publikashon ku ta ser studiá den bo man. Esaki lo yuda bo mira e informashon fásilmente miéntras ku bo ta papia den e mikrofon.

Den algun kongregashon tin ruman hòmber asigná pa hiba e mikrofon na esnan ku haña bùrt pa komentá. Si esei ta e kaso den bo kongregashon, ora bo haña bùrt pa papia, keda ku bo man hisá na haltu ya asina e ruman ku ta kana ku mikrofon por mira unda bo ta sintá i por yega umbes serka bo. Si e mikrofon ta e tipo ku bo tin ku tene den man, prepará pa tum’é. Kuminsá papia ora ku bo tin e mikrofon bon posishoná, i duna e ruman e mikrofon bèk asina ku bo kaba di duna bo komentario.

Ora di Partisipá den un Demostrashon. Uso di mikrofon durante un demostrashon ta rekerí atenshon spesial di antemano. Si e mikrofon ta poné riba un stènt, lo bo tin ámbos man liber pa atendé ku bo Beibel i bo notanan. Ku un mikrofon di tene den man bo tin mas libertat pa move, pero kisas lo bo tin ku hasi areglo pa bo kompañero ten’é, ya asina bo mannan lo ta liber pa bo usa bo Beibel. Bo tin ku train esaki ku bo doño di kas pa e sa kon e tin ku ten’é korektamente durante e demostrashon. Kòrda tambe ku ora bo ta riba plataforma bo no mester bira lomba pa ouditorio, foral si ta abo ta papia.

Kisas tin demostrashonnan den e Reunion di Sirbishi ku tin vários partisipante, i podisé nan tin ku move riba plataforma. Pues, lo tin mester di vários mikrofon. Mester pone esakinan na nan lugá di antemano òf duna nan n’e partisipantenan ora nan subi plataforma. Pa hasi sigur ku e mikrofonnan ta na e lugá i momentu korekto, mester planea tur kos di antemano. Ora di train e demostrashonnan ta un bon chèns pa e oradó siña e partisipantenan kon pa hasi bon uso di e mikrofon. Ora no por train un demostrashon riba plataforma, lo ta sabí pa e partisipantenan tene un opheto chikí di mesun tamaño ku un mikrofon pa asina nan por train kon pa ten’é bon. Despues di e demostrashon, e partisipantenan mester pone e mikrofonnan bèk suavemente, i tene kuidou pa nan no trompeká riba e wayanan di otro mikrofon ora nan ta baha for di plataforma.

Nos tin ku duna atenshon na e uso di mikrofon ya ku esei ta direktamente ligá ku un di e metanan prinsipal di nos reunionnan, esta, enkurashá otro dor di studia e Palabra di Dios. (Heb. 10:24, 25) Dor di siña usa mikrofon na un manera efikas, nos por kontribuí personalmente na e meta importante aki.