Uso Efikas di Medionan Visual

PAKIKO usa medionan visual pa siña hende? Pasobra esei ta hasi bo siñansa mas efikas. Yehova Dios i Hesukristu a usa medionan visual, i nos por siña for di nan ehèmpel. Ora medionan visual ta bai kompañá pa un splikashon, e informashon ta ser risibí via dos sentido: bista i oido. Esaki por yuda tene e atenshon di bo ouditorio i hasi un impreshon mas grandi. Kon bo por inkluí medionan visual den bo presentashon di e bon nobo? Kon bo por hasi sigur ku bo ta usando nan bon?

E Ehèmpel di e Maestronan di Mas Grandi. Yehova a usa medionan visual inolvidabel pa siña lèsnan balioso. Un anochi el a hiba Abraham pafó i a bisa: “Awor wak na e shelunan i konta e streanan, si bo por konta nan. . . . Asina bo desendientenan lo ta.” (Gén. 15:5) Maske e promesa a parse imposibel desde e punto di bista humano, esei a konmové Abraham profundamente i el a pone fe den Yehova. Na un otro okashon, Yehova a manda Yeremías bai na kas di un trahadó di pòchi di klei p’e mira kon esaki ta duna e klei forma den su tayer. Esei tabata un lès impaktante di e outoridat ku e Kreadó tin riba hende. (Yer. 18:1-6) I kon Yónas por a lubidá e lès di miserikòrdia ku Yehova a siñ’é mediante e mata ku a krese over di su kabes? (Yón. 4:6-11) Yehova asta a manda algun profeta presentá skèch di mensahenan profétiko hasiendo uso di sierto ophetonan. (1 Rei. 11:29-32; Yer. 27:1-8; Eze. 4:1-17) E tabernakel i e tèmpel riba nan mes tabata símbolonan ku ta yuda nos komprondé realidatnan selestial. (Heb. 9:9, 23, 24) Tambe Dios a usa hopi vishon pa transmití informashon importante.—Eze. 1:4-28; 8:2-18; Echo. 10:9-16; 16:9, 10; Rev. 1:1.

Kon Hesus a hasi uso di medionan visual? Ora e fariseonan i e partidarionan di Herodes a purba koh’é den trampa a base di su deklarashonnan, Hesus a pidi nan un denario, i a hala atenshon na e kara di Sésar riba e moneda. Anto el a splika ku mester duna Sésar loke ta di Sésar i Dios loke ta di Dios. (Mat. 22:19-21) Pa siña nos e lès ku nos mester onra Dios ku tur loke nos tin, Hesus a mustra riba un biuda pober den e tèmpel kende su kontribushon—dos plaka di koper—tabata tur loke ku e tabatin pa biba di dje. (Luk. 21:1-4) Na un otro okashon el a usa un mucha komo un ehèmpel di un persona humilde i sin ambishon. (Mat. 18:2-6) I e mes a demostrá kiko humildat ta nifiká ora el a laba pia di su disipelnan.—Huan 13:14.

Maneranan pa Usa Medionan Visual. Distinto for di Yehova, nos no por komuniká via vishon. Sin embargo, e publikashonnan di Testigunan di Yehova tin hopi plachi i potrèt ku ta pone hende reflekshoná. Usa nan pa yuda hende interesá imaginá kon e Paradeis terenal ku e Palabra di Dios ta primintí lo ta. Òf mustra un studiante di Beibel un plachi ku tin di haber ku e tema ku bo ta tratando i puntr’é kiko e ta opservá einan. Ta interesante ku ora Yehova tabata duna profeta Ámos sierto vishonnan, el a puntr’é: “Kiko bo ta mira, Ámos?” (Ámos 7:7, 8; 8:1, 2) Bo tambe por hasi preguntanan similar ora bo ta dirigí hende su atenshon na e plachinan diseñá komo un medio visual pa siña hende.

Pa yuda hende komprondé sierto profesianan mihó, manera esun di shete tempu (òf “shete periodo”) di Daniel 4:16 i e “setenta siman” di Daniel 9:24 bo por skirbi kálkulonan matemátiko òf pinta un liña di tempu ku ta mustra e órden den kua susesonan importante a tuma lugá. Bo ta haña e medionan visual ei den vários di nos publikashonnan di studio.

Den bo studio bíbliko di famia, probablemente bo famia lo komprondé ku mas fasilidat sierto aspektonan di e tabernakel, di e tèmpel di Yerúsalèm i di e tèmpel ku Ezekiel a mira den vishon, si bo usa un plachi òf un skema manera esnan ku bo ta haña den e buki Perspikasia pa Komprondé e Skritura, òf den e apèndiks di e Tradukshon di Mundu Nobo di e Santu Skritura (Ku Referensia) i den vários edishon di E Toren di Vigilansia.

Ora boso ta lesa Beibel komo famia, hasi bon uso di mapa. Por ehèmpel, usa un mapa pa sigui e biahe di Abraham for di Ur pa Haran i despues pa Bètel. Analisá e ruta ku e nashon di Israel a sigui ora nan a bandoná Egipto rumbo pa e Tera Primintí. Lokalisá e área ku kada tribu di Israel a risibí komo herensia. Opservá kon leu Sálomon su dominio a yega. Analisá e ruta ku Elías a kore ora ku Yezabel a menas’é i el a hui for di Yezreel te na e desierto, mas ayá di Beerseba. (1 Rei. 18:46–19:4) Wak unda e statnan i pueblonan kaminda Hesus a prediká ta keda, i sigui e biahenan di Pablo, deskribí den e buki di Echonan.

Studiantenan di Beibel lo komprondé mihó kon e kongregashon ta funshoná si nos usa medionan visual. Lo bo por mustra bo studiante un programa di asamblea i splik’é e tipo di temanan ku ta ser tratá na e okashonnan ei. Hopi persona a keda masha impreshoná ora nan a bishitá e Salòn di Reino òf e sukursal di Testigunan di Yehova, i esaki por ta un manera efikas pa korigí ideanan robes tokante nos obra i su propósito. Si bo ta mustra un bishitante e Salòn di Reino, splik’é e diferensianan ku tin entre esakinan ku otro lugánan di adorashon. Destaká e ambiente simpel ku ta promové siñamentu. Mustr’é e kosnan ku tin di haber direktamente ku nos sirbishi públiko, manera e sekshon pa literatura, e mapanan di teritorio i e kahanan di kontribushon (ku ta nèt kontrali di e skalchinan pa pasa kolèkt).

Si bo tin e vidionan ku a ser prepará bou di supervishon di e Kuerpo Gobernante, usa nan pa krea konfiansa den Beibel, pa laga studiantenan sera konosí ku e aktividat di Testigunan di Yehova i pa animá nan pa biba na armonia ku prinsipionan bíbliko.

Uso di Medionan Visual Dilanti Gruponan Grandi. Medionan visual bon prepará i presentá por ta un manera efikas pa yuda siña gruponan grandi. E esklabo fiel i prudente a perkurá e medionan ei den vários forma.

E artíkulonan di studio di E Toren di Vigilansia normalmente tin plachinan ku e konduktor por usa pa enfatisá puntonan importante. Meskos ta konta pa publikashonnan ku nos ta studia na Studio di Buki di Kongregashon.

E kontenido di algun diskurso públiko ta duna e oradó un bon chèns pa usa medionan visual pa ilustrá e ideanan. Sin embargo, por lo general e públiko ta saka mas benefisio si nan konsentrá riba loke Beibel ta bisa, ya ku esei ta loke mayoria di nan tin den nan man. Si de bes en kuando ta nesesario pa mustra un plachi òf skema kòrtiku di puntonan prinsipal pa transmití un òf vários idea klave, hasi sigur promé ku bo usa e medio visual ei, ku asta esnan sintá den e último rei di e sala di reunion por mir’é òf les’é bon. Pero no mester hasi muchu uso di e téknikanan aki.

Nos no ta usa medionan visual ora di papia i siña hende djis pa entretené e ouditorio. Ora bo ta usa un medio visual ku dignidat, e mester reforsá e ideanan ku ta meresé énfasis spesial. Ademas, e medionan ei ta kumpli ku un propósito útil ora nan ta yuda klarifiká loke ta ser bisá i laga e oyentenan komprondé kosnan mihó, òf ora nan ta duna pruebanan konvinsente di loke a ser bisá. Un medio visual adekuá i bon usá por hasi un impreshon asina profundo ku pa hopi aña e ouditorio lo kòrda tantu e medio visual komo e lès ku el a siña for di dje.

Tantu hende su oido komo nan bista ta hunga un papel importante den siñamentu. Kòrda ku e dos Maestronan di mas grandi a hasi uso di nan; hasi esfuerso pa imitá nan ehèmpel ora di siña otro hende.