Lo Bo Kier Sa Mas Tocante Bijbel?

Pakico Lesa Bijbel?

BIJBEL no ta mescos cu otro buki. E ta contené instruccion amoroso for di Dios. (1 Tesalonicensenan 2:13) Si bo pone loke Bijbel ta siña na práctica, lo bo beneficiá masha hopi. Bo amor pa Dios lo crece i lo bo hala cerca dje, e Dunador di “tur bon don i tur regalo perfecto.” (Santiago 1:17) Lo bo haña sa con pa acerk’é den oracion. Den tempu difícil bo por experenciá Dios su yudansa. Si bo pone bo bida na armonia cu e normanan cu Bijbel ta describí, Dios lo duna bo bida eterno.—Romanonan 6:23.

Bijbel ta contené berdadnan cu ta clarificá hopi asuntu. Esnan cu haña conocimentu di Bijbel ta ser librá di conceptonan robes cu ta dominá bida di miyones di hende. Por ehempel, haña sa e berdad tocante loke ta sosodé despues cu nos muri ta libra nos dje miedu cu e mortonan por haci nos daño of cu nos defuntu famia i amigunan ta sufriendo. (Ezekiel 18:4) E siñansa bíblico di resureccion ta duna consuelo na esnan cu a perde nan sernan kerí. (Juan 11:25) Conocé e berdad relacioná cu angelnan malbado ta alertá nos pa e peligernan di spiritismo i ta yuda nos comprendé di con tin asina tantu problema riba tera.

E principionan divino den Bijbel ta mustra nos con pa biba di tal manera cu nos ta haña beneficionan físico. Por ehempel, si un hende tin ‘custumbernan moderá’ esei ta contribuí na bon salú. (1 Timoteo 3:2) Dor di “limpia nos mes di tur contaminacion di carni i di spiritu” nos ta evitá di daña nos salú. (2 Corintionan 7:1) Ademas, aplicando e conseho di Dios cu tin den Bijbel ta contribuí na felicidad den matrimonio i na respet propio.—1 Corintionan 6:18.

Si bo pone loke e Palabra di Dios ta bisa na práctica, lo bo ta un persona mas felis. Conocimentu di Bijbel ta yuda nos haña pas i satisfaccion interno, i e ta duna nos speransa. E ta yuda nos cultivá cualidadnan atractivo manera compasion, amor, goso, pas, bondad i fe. (Galationan 5:22, 23; Efesionan 4:24, 32) E cualidadnan ei ta haci nos un mihó esposo of esposa, tata of mama, yu homber of yu muher.

Bo a yega di puntra bo mes kico lo tin den futuro? Profecia bíblico ta mustra cu nos ta biba den un tempu importante di historia humano. No ta e condicion awe di mundu so e profecianan aki ta describí sino tambe nan ta mustra cu Dios pronto lo transformá tera den un paradijs.—Revelacion 21:3, 4.

Yudansa pa Comprendé Bijbel

Kisas bo a yega di purba lesa Bijbel, pero bo ta haña cu e ta difícil pa comprendé. Por ta bo no sa unda pa busca den Bijbel pa haña contesta pa bo preguntanan. Si ta asina, bo no ta e único. Nos tur tin mester di yudansa pa comprendé e Palabra di Dios. Den mas o ménos 235 pais, Testigonan di Jehova ta proveé instruccion di Bijbel grátis na miyones di hende. Gustosamente nan lo yuda bo tambe.

Por lo general ta mihó pa studia Bijbel gradualmente, cuminsando cu siñansanan básico. (Hebreonan 6:1) Segun cu bo ta sigui, lo bo ta mihó prepará pa comprendé “cuminda sólido,” esta, berdadnan mas profundo. (Hebreonan 5:14) Bijbel ta é autoridad. Publicacionnan basá riba Bijbel manera e buki Kico Beibel Ta Siña Realmente?, lo yuda bo comprendé pasashinan bíblico cu ta trata cu vários tópico.

Bo Ta Dispuesto pa Dedicá Tempu Tur Siman pa Comprendé Bijbel?

Generalmente por haci areglo pa bo studia Bijbel e ora i lugá cu ta cumbiní bo. Hopi hende ta studia den e privacidad di nan mes cas. Tin hende asta ta studia via telefon. E programa di studio no ta tuma lugá den un klas; e ta un areglo privá, adaptá na bo circunstancianan personal, incluso bo nivel di conocimentu i educacion. No tin exámen, i ningun hende lo pone bo sinti incómodo. Lo bo haña contesta pa bo preguntanan bíblico, i lo bo siña con pa hala cerca Dios.

Bo no tin cu paga pa e studio di Bijbel aki. (Mateo 10:8) E ta ser ofrecé grátis na hende di tur religion i tambe na esnan cu no tin religion pero cu sinceramente ta interesá pa aumentá nan conocimentu di e Palabra di Dios.

Ken por participá den e studio? Henter bo famia. Cualkier amigu cu bo kier invitá tambe por participá. Of si bo ta preferá, por haci e consideracion cu bo so.

Hopi hende ta apartá un ora tur siman pa studia Bijbel. Asta si bo por studia mas tempu of ménos tempu pa siman, e Testigonan lo ta dispuesto pa yuda bo.

Un Invitacion pa Siña

Nos ta invitá bo pa tuma contacto cu Testigonan di Jehova. Un manera cu bo por haci esaki ta dor di skirbi na un di e adresnan aki bou. E ora ei nan lo haci areglo pa un hende conducí un studio di Bijbel grátis cu bo na bo cas.

□ Manda mi un ehemplar di e buki Kico Beibel Ta Siña Realmente?

□ Por fabor, tuma contacto cu mi pa un studio di Bijbel grátis na cas.

A ménos cu tin otro indicacion, texto di Bijbel citá ta traducí for dje Traduccion di Mundu Nobo dje Santu Scritura na ingles.