TÓPIKO PRINSIPAL | BO KE SIÑA TOKANTE BEIBEL?

Un Kurso Di Beibel Pa Un I tur

Testigunan di Yehova ta bon konosí pa nan trabou di prediká. Pero bo tabata sa ku nos ta duna kurso di Beibel na tur parti di mundu tambe?

Un hòmber ta tuma un kurso di Beibel na su trabou

Na 2014, mas ku 8.000.000 Testigu den 240 pais a dirigí kasi 9.500.000 kurso di Beibel tur luna.a Sí, e kantidat di hende ku ta siguiendo un kurso di Beibel ku nos ta mas ku e kantidat di habitante ku mas o ménos 140 pais tin!

Pa kumpli ku e trabou mundial di siña hende, tur aña Testigunan di Yehova ta publiká kasi 1.5 mil mion Beibel, buki, revista i otro publikashonnan pa yuda hende analisá Beibel. Tur e publikashonnan akí ta disponibel den mas o ménos 700 idioma. Tur e esfuerso akí ta pa yuda hende analisá Beibel den e idioma ku nan ta preferá.

“Nunka mi no tabata gusta siña na skol, pero e kurso di Beibel akí sí tabata dushi. Anto e kosnan ku mi a siña a duna mi konsuelo.”—Katlego, Suráfrika.

“E kurso a kontestá tur mi preguntanan i mi a siña hopi kos mas.”—Bertha, México.

“Nos tabata studia na mi kas i na e ora ku tabata mas kumbiniente pa mi. Kiko mas mi por ke!”—Eziquiel, Brazil.

“Algun di e seshonnan di e kurso a dura 15 pa 30 minüt. Tin biaha mas tantu, pero ami tabata disidí.”—Viniana, Australia.

“E kurso tabata grátis. Esei tabata great!”—Aimé, Benin.

“E Testigu ku a studia Beibel ku mi tabatin hopi pasenshi i tabata masha amabel. Nos a bira hopi bon ku otro.”—Karen, Nort di Irlanda.

“Tin hopi hende ku a sigui un kurso di Beibel sin bira Testigu.”—Denton, Inglatera.

KONTESTA RIBA PREGUNTA KU HOPI HENDE SA HASI TOKANTE NOS KURSO DI BEIBEL

Kon un kurso di Beibel ta hinká den otro?

Nos ta skohe vários tópiko di Beibel i analisá tekstonan di Beibel ku tin di haber ku nan. Por ehèmpel, Beibel ta duna kontesta riba preguntanan manera: Ken Dios ta? Kon e ta? Dios tin un nòmber? Unda e ta biba? Nos por hala serka dje? E úniko kos ta ku tin bes ta difísil pa bo mes yega na e kontestanan ku tin den Beibel.

Pa yuda hende haña kontesta riba e preguntanan akí, por lo general nos ta usa e buki di 224 página titulá Kiko Beibel Ta Siña Realmente?b Meta di e buki akí ta pa yuda hende komprondé e siñansanan básiko di Beibel. E ta kontené lèsnan tokante Dios, Hesukristu, sufrimentu di hende, resurekshon, orashon i hopi tópiko mas.

Na unda i ki ora e kurso por tuma lugá?

E kurso por tuma lugá na un ora i lugá ku ta kumbiniente pa bo.

Kuantu tempu kada seshon di e kurso ta tuma?

Hopi hende ta dediká mas o ménos ún ora tur siman pa risibí un kurso di Beibel. Pero bo no ta mará na un kantidat di ora fiho. Nos lo adaptá e tempu na bo skèdjel. Algun hende ta dediká 10 òf 15 minüt pa siman na e kurso.

Kuantu e kurso ta kosta?

E kurso i e material ta grátis. Esaki ta di akuerdo ku loke Hesus a instruí su disipelnan: “Boso a risibí pòrnada, duna pòrnada.”—Mateo 10:8.

Kuantu tempu e kurso ta dura?

Esei ta keda na abo. E buki Kiko Beibel Ta Siña Realmente? tin 19 lès. Nos por trata sea algun òf tur e lèsnan akí ku bo na e ritmo ku bo ta deseá.

Mi tin ku bira un Testigu di Yehova?

No nesesariamente. Nos ta respetá kada hende su derecho di skohe loke e ke kere aden. Sinembargo, e konosementu di Beibel ku un persona ta haña por yud’é hasi un eskoho konsiente.

Unda mi por haña mas informashon?

E website jw.org ta duna informashon eksakto tokante e kreensia- i aktividatnan di Testigunan di Yehova.

Kon mi por pidi un kurso di Beibel?

Yena e formulario riba www.jw.org.
Bai na página 2 di e revista akí, skohe e adrès ku ta mas serka di bo i manda bo petishon.
Tuma kontakto ku Testigunan di Yehova den bo área. Bo por buska “Testigunan di Yehova” den buki di telefòn.

a Generalmente, nos ta duna kurso di Beibel sea na ún hende òf na un grupo chikitu.

b Publiká pa Testigunan di Yehova. Mas ku 230 mion ehemplar di e buki akí a ser imprimí den mas ku 260 idioma.

YUDANSA PA FAMIA

“Mi a mira kambionan grandi den mi esposa ora ku el a kuminsá studia Beibel i nos bida di famia a bira mas mihó. Mi tabatin gana di sa kiko e tabata siñando i p’esei mi tambe a kuminsá studia. Loke mi a siña a hasi mi un mihó persona. E kurso di Beibel a uni nos famia.”—Eziquiel.

“Despues ku mi a kuminsá studia Beibel, mi a stòp di usa droga i bebe hopi alkohòl. Tambe mi a siña kon pa kontrolá mi rabia. Mi kas ta mas limpi i mas ordená. Mi ta apresiá mi famia mas tantu i mi ta disfrutá di hasi kos ku ta hasi nan felis. Mi ta hopi mas felis awor.”—Karen.

“Algun hende a kritiká mi pasobra mi tabata studia Beibel. Pero mi esposo a apoyá mi desishon, i el a bisa: ‘Mi no tin kunes kiko hende bisa. Loke ta importante pa mi ta ku bo a kambia i bira un mihó persona. Sigui hasi loke bo ta hasiendo.’ Nos bida di famia ta mas mihó ku nunka.”—Viniana.