E Mortonan Por Bolbe Biba?

LOKE BEIBEL TA BISA

“Lo bai tin un resurekshon.”​—Echonan 24:15, Tradukshon di Mundu Nobo.

KIKO ESAKI POR NIFIKÁ PA NOS?

Konsuelo pa ora un ser kerí muri.​—2 Korintionan 1:3, 4.

Libertat for di miedu di muri.​—Hebreonan 2:15.

Speransa di mira bo sernan kerí ku a muri na bida atrobe.​—Huan 5:28, 29.

DI BÈRDAT NOS POR KERE LOKE BEIBEL TA BISA?

Sí, i nos tin por lo ménos tres motibu pa esei:

• Dios ta e Kreador di bida. Beibel ta yama Yehova Dios “e fuente di bida.” (Salmo 36:9; Echonan 17:24, 25) Esun ku a duna bida na tur ser bibu mester ta kapas pa pone un hende ku a muri biba atrobe.

• Dios a resusitá hende kaba den pasado. Beibel ta menshoná ocho kaso di hende—yòn, grandi, hòmber i muhé—ku a ser lantá for di morto. Algun tabata morto pa un tempu kòrtiku, pero un di nan tabata den graf pa kuater dia!​—Huan 11:39-44.

• Dios ta ansioso pa lanta hende na bida atrobe. Yehova ta odia morto; e ta konsider’é un enemigu. (1 Korintionan 15:26) E ta “anhelá” pa eliminá e enemigu akí, pa kaba ku morto pa medio di resurekshon. E ta ansioso pa trese esnan ku ta den su memoria bèk na bida i mira nan bolbe biba riba e tera akí.​—Yòb 14:14, 15.