Samuel A Sigui Hasi Kos Ku Yehova Gusta

Samuel a bai biba i traha na e tabernakel for di tempu ku e tabata mucha chikitu. E tabernakel ta kaminda hende tabata bai pa adorá Yehova. Bo sa ta dikon Samuel a bai biba na e lugá ei? Promé, ban lesa tokante Samuel su mama, Ana.

Pa hopi tempu, Ana tabatin masha gana di tin un yu, pero e no tabata por. P’esei, el a hasi orashon na Yehova i a pidié pa por fabor yud’é. El a primintí Yehova ku si e haña un yu hòmber, e ta lag’é bai biba i traha na e tabernakel. Yehova a hasi loke Ana a pidié, anto Ana a haña un yu hòmber. El a yam’é Samuel. Anto despues, Ana a hasi presis manera el a primintí Yehova. Ora Samuel tabatin tres òf kuater aña, Ana a hib’é na e tabernakel pa e bai sirbi Dios aya.

Elí tabata sumo saserdote na e tabernakel. Su dos yu hòmbernan tambe tabata traha ei. Kòrda ku e tabernakel tabata Dios su kas di adorashon. Esei ke men ku na e lugá ei ta kos bon so hende mester a hasi. Pero e dos yunan di Elí tabata hasi kos masha malu mes. Samuel a mira e kosnan ku nan tabata hasi. Samuel tambe a kuminsá hasi malu meskos ku e yunan di Elí?— Nò, el a sigui hasi kos ku Yehova gusta, manera su tata ku su mama a siñ’é.

Kiko abo ta haña ku Elí mester a hasi ku su dos yu hòmbernan?— E mester a straf nan. E no mester a laga nan traha mas na e kas di Dios. Pero Elí no a hasié. P’esei, Yehova a rabia kuné i ku su dos yunan. Yehova a disidí ku e ta bai kastigá nan.

Un anochi ora ku Samuel tabata drumi, el a tende un stèm ta yam’é: ‘Samuel!’ El a kore bai serka Elí, ma Elí di kuné: ‘Mi no a yama bo.’ E mesun kos ei a bolbe sosodé dos biaha mas. E di tres biaha, Elí a bisa Samuel ku si e bolbe tende e stèm, e mester kontestá: ‘Ata mi aki, Yehova. Mi ta skucha.’ Anto asina Samuel a hasi tambe. E ora ei, Yehova a bisa Samuel: ‘Bisa Elí ku mi ta bai kastigá su famia pa e mal kosnan ku nan a hasi.’ Bo ta kere ku tabata fásil pa Samuel duna Elí e rospondi ei?— Nò, no tabata fásil. Pero maske Samuel tabatin miedu, el a hasi manera Yehova a mand’é. Loke Yehova a bisa a pasa tambe. Nan a mata e dos yunan di Elí, anto Elí mes tambe a muri.

Samuel ta un bon ehèmpel pa nos. Maske el a mira otro hende ta hasi kos malu, e sí a sigui hasi kos ku Yehova gusta. Anto, abo awor? Abo ke ta manera Samuel i sigui hasi kos ku Yehova gusta? Si bo hasi asina, lo bo hasi Yehova i bo tata ku bo mama masha kontentu.