Yehova A Papia ku Sámuèl

Sumo Saserdote Elí tabatin dos yu hòmber ku tabata sirbi komo saserdote na e tabernakel. Un tabata yama Hòfni i e otro Fínehas. Nan no tabata hasi loke e leinan di Yehova ta bisa, i nan tabata trata hende masha malu mes. Ora e israelitanan tabata hiba sakrifisio na e tabernakel pa Yehova, Hòfni i Fínehas tabata tuma e mihó karni pa nan mes. Elí a haña sa ku su yunan tabata hasi malu, pero e no a hasi nèt nèt nada. Kiko di Yehova? Yehova a hasi algu?

Aunke Sámuèl tabata hopi mas yòn ku Hòfni i Fínehas, e no a hasi e kosnan malu ku nan tabata hasi. P’esei, Yehova tabata masha kontentu ku Sámuèl. Un anochi ora ku Sámuèl tabata drumí, el a tende un stèm yam’é. El a lanta for di su kama, kore bai serka Elí, i bis’é: ‘Ata mi aki!’ Pero Elí a bis’é: ‘Mi no a yama bo. Bai drumi bèk.’ I Sámuèl a bai drumi bèk. Esei a sosodé dos biaha mas. Ora Sámuèl a tende e stèm pa di tres biaha, Elí a komprondé ku ta Yehova tabata yama Sámuèl. Elí a bisa Sámuèl ku si e tende e stèm un biaha mas, e mester bisa: ‘Yehova, papia numa, mi ta skucha.’

Sámuèl a bai drumi bèk. I despues, el a bolbe tende e stèm. E stèm a bis’é: ‘Sámuèl! Sámuèl!’ Anto Sámuèl a kontestá: ‘Yehova, papia numa, mi ta skucha.’ Yehova a bisa Sámuèl: ‘Bisa Elí ku mi ta bai kastigá e i su famia, pasobra e sa ku su yunan ta hasi kos malu den tabernakel, pero e no ta hasi nada.’ E siguiente mainta Sámuèl a habri e portanan di e tabernakel, manera tabata su kustumber. E tabatin miedu di konta Elí loke Yehova a bisa. Pero Elí a yam’é, i bis’é: ‘Mi yu, kiko Yehova a bisa bo? Konta mi tur kos.’ Anto Sámuèl a konta Elí tur kos.

Segun ku Sámuèl tabata krese, Yehova a keda su amigu. Tur e israelitanan den e pais tabata sa ku Yehova a skohe Sámuèl pa bira profeta i hues.