Nan A Skirbi Tokante Hesus

Bo ta mira e hendenan riba e plachi?— Nan yama Mateo, Marko, Lukas, Huan, Pedro, Santiago, Hudas i Pablo. Nan tur a biba na e mesun tempu ku Hesus i nan a skirbi tokante Hesus. Ban lesa mas di nan.

Tres di nan tabata apòstel ku a prediká ku Hesus. Bo sa kua di nan?— Mateo, Huan i Pedro. Apòstel Mateo i apòstel Huan tabata konosé Hesus hopi bon i tur dos a skirbi un buki tokante e bida di Hesus. Apòstel Huan a skirbi un buki tambe, ku yama Revelashon, i tres otro karta. Nan yama Promé Huan, Di Dos Huan i Di Tres Huan. Apòstel Pedro a skirbi dos di e kartanan ku tin den Beibel. Nan yama Promé Pedro i Di Dos Pedro. Den su di dos karta, Pedro a konta kon un biaha Yehova a papia for di shelu i bisa asin’akí di Hesus: ‘Esaki ta mi yu. Mi ta stim’é i mi ta orguyoso di dje.’

E otro hendenan riba e plachi tambe ta siña nos tokante Hesus den e bukinan ku nan a skirbi. Un di nan yama Marko. Ora e hendenan a bin arestá Hesus, kasi sigur Marko tabat’ei i a mira tur loke a pasa. Un otro yama Lukas. E tabata dòkter, i parse ku ta despues ku Hesus a muri el a bira kristian.

Dos otro skirbidó di Beibel ku tin riba e plachi ta ruman chikitu di Hesus. Bo sa nan nòmber?— Un yama Santiago i e otro yama Hudas. Promé promé, nan no tabata kere den Hesus. Nan a asta kere ku el a bira un tiki loko. Pero despues sí nan a kere den Hesus i a bira kristian.

E delaster skirbidó di Beibel ku nos falta riba e plachi yama Pablo. Promé ku el a bira kristian, su nòmber tabata Saulo. E tabatin rabia riba kristian i e tabata hasi hopi kos malu ku nan. Bo sa ta kiko a pone ku Pablo kier a bira kristian?— Un dia, Pablo tabata kanando pa bai un siudat ku yama Damasko, anto diripiente el a tende un stèm ta papia kuné for di shelu. Ta Hesus tabata papiando! El a puntra Pablo: ‘Pakiko bo ta hasi tantu kos malu ku e hendenan ku ta kere den mi?’ Despues di esei, Pablo a kambia i a bira kristian. Pablo a skirbi 14 buki di Beibel, di Romanonan te ku Hebreonan.

Nos ta lesa Beibel tur dia, no?— Asina nos ta siña hopi kos di Hesus. Abo ke siña mas tokante Hesus?—