Hesus A Demostrá Zelo pa Adorashon Berdadero

Despues di e kasamentu na Kana, Hesus a kue rumbo pa Kapernaum. Su mama i su rumannan—Santiago, Hose, Simon i Hudas—a bai huntu kuné.

Pero dikon Hesus tabata bayendo Kapernaum? Wèl, e stat akí tabata mihó situá ku Názarèt òf Kana, i evidentemente e tabata mas grandi. Ademas, hopi di Hesus su disipelnan nobo tabata biba na Kapernaum òf serka ei banda. Pues, Hesus por a duna nan entrenamentu den nan teritorio mes.

Na Kapernaum tambe Hesus a hasi milager. Hopi hende den e stat ei i den bisindario a tende di e kosnan ku el a hasi einan. Pero djis despues, Hesus i su kompañeronan, kendenan tabata hudiu deboto, tabata riba kaminda atrobe pa bai Herúsalèm pa selebrá e Pasku Hudiu di aña 30 di promé siglo.

Ora nan tabata den e tèmpel, e disipelnan di Hesus a mira un karakterístika masha impreshonante di Hesus ku nunka nan a mira.

Segun e Lei di Dios, e israelitanan tabatin ku ofresé sakrifisio di bestia na e tèmpel; ademas, bishitantenan tabatin mester di kuminda durante nan estadia. P’esei, Lei a permití esnan ku mester a biaha distansia largu pa yega Herúsalèm bini ku plaka pa nan por a kumpra por ehèmpel ‘bue i karné’ i otro kosnan útil pa nan estadia den e stat. (Deuteronomio 14:24-26) Esei a pone ku e komersiantenan na Herúsalèm tabata bende para òf otro bestia den un patio grandi di e tèmpel. Algun di nan tabata hòrta e hendenan, kobrando nan muchu mas ku tabata nesesario.

Hesus a rabia mashá; el a basha e plakanan di e kambiadónan abou, bòltu nan mesanan i saka nan for di e tèmpel. Despues, Hesus a bisa e bendedónan di para: “Saka e kosnan ei fo’i djaki! Stòp di hasi e kas di mi Tata un kas di negoshi!”—Huan 2:16.

Ora e disipelnan di Hesus a mira esei, nan a kòrda e profesia tokante e Yu di Dios ku ta bisa: “Zelo pa bo kas a kaba ku mi.” Pero e hudiunan a puntr’é: “Ki señal bo tin pa proba nos ku bo tin derecho di hasi e kosnan akí?” Hesus a kontestá nan: “Basha e tèmpel akí abou, i den tres dia lo mi lant’é bèk.”—Huan 2:17-19; Salmo 69:9.

E hudiunan a asumí ku Hesus tabata referí na e tèmpel literal na Herúsalèm. P’esei, nan a puntr’é: “A tuma 46 aña pa traha e tèmpel akí, i abo lo lant’é den tres dia?” (Huan 2:20) Pero Hesus tabata referí na su kurpa komo un tèmpel. Tres aña despues, ora Hesus lo a ser resusitá, su disipelnan lo a kòrda e palabranan akí.