Hesus A Hasi Obranan Grandi na Kapernaum

Tabata riba un sabat. Hesus i su kuater disipelnan—Pedro, Andres, Santiago i Huan—kendenan el a bisa ku nan lo a bira piskadó di hende, a bai snoa na Kapernaum. Ei, Hesus a kuminsá siña e hendenan, i atrobe nan a keda asombrá di su manera di siña hende. E tabata siña nan manera un hende ku outoridat, i no manera e eskribanan.

Awor, tabatin un hòmber endemoniá einan kende tabata grita: “Ta kiko nos tin di haber ku bo, Hesus, e nazareno? Bo a bini pa destruí nos? Mi sa bon bon ken bo ta: e Santu di Dios.” Hesus a skual e demoño ku tabata dominá e hòmber, bisando: “Keda ketu, i sali for di dje!”—Marko 1:24, 25.

E demoño a benta e hòmber abou i lag’é kai steipi; despues di a grita masha duru mes, el a sali for di e hòmber “sin hasié daño.” (Lukas 4:35) E hendenan den snoa a keda babuká. Nan a kuminsá bisa otro: “Kiko esaki? . . . Ku outoridat e ta duna òrdu na asta e spiritunan impuru, i nan ta obedes’é.” (Marko 1:27) Ta komprendibel ku e notisia tokante e suseso asombroso akí a plama den henter Galilea.

Ora Hesus i su disipelnan a sali snoa, nan a bai kas di Simon, kende nan tabata yama Pedro tambe. E suegra di Pedro tabata hopi malu ku keintura haltu. I nan a roga Hesus pa yud’é. Hesus a bai serka dje, kue su man tene i yud’é lanta. Mesora el a bira bon i a kuminsá sirbi Hesus i su disipelnan, kisas preparando algu di kome pa nan.

Ora nochi a kuminsá sera, hende di tur parti tabata trese nan hendenan malu na kas di Pedro. Tabata parse ku ta henter e stat a reuní dilanti di Pedro su porta. E hendenan tabata ke pa Hesus kura nan. De echo, “tur esnan ku tabatin hende malu—hende ku tur sorto di malesa”—a trese nan hendenan malu serka Hesus. I Hesus tabata “pone man riba kada un di nan i kura nan.” (Lukas 4:40) Sí, sea kual sea e malesa ku e hendenan tabatin, Hesus a kura tur, manera e Skritura a profetisá. (Isaías 53:4) El a asta saka demoño for di hende. Anto ora e demoñonan akí tabata sali for di e hendenan, nan tabata grita: “Abo ta Yu di Dios.” (Lukas 4:41) Pero Hesus tabata skual e demoñonan akí i no tabata laga nan papia. Dikon? Pasobra nan tabata sa ku e ta e Kristu i e no tabata ke pa nan duna e impreshon ku nan tabata sirbi e Dios berdadero.